[1] མི་ཚངས་པ་རྩོམ་ཞིང་རང་གི་མལ་ཁྲིར་གྲོས་ངན་བྱེད་པ་རྣམས་བཀྲ་མི་ཤིས། དེ་དག་གི་ལག་པར་ཤེད་ཡོད་པས། ནམ་ལང་བའི་ཚེ་སྤྱོད་ངན་སྤྱོད་ཅིང་།
[2] དེ་དག་གིས་ཞིང་རྣམས་མཐོང་ཞིང་དབང་གིས་ལེན། ཁང་པར་བརྔམས་ཤིང་འཕྲོག་པར་བྱེད། དེ་ཚོས་ཁྱིམ་བདག་དང་དེའི་ཁྱིམ་མི་ལ་གཉའ་གནོན་བྱེད་པ་དང། མི་དང་དེའི་ནོར་སྐལ་ལའང་བཙན་གྱིས་དབང་བྱེད།
[3] དེ་བས་ན་གཙོ་བོ་ཡ་ཝཱེས་འདི་སྐད་དུ་གསུང་། ཀྱེ་ཧོ། ། བདག་གིས་གནོད་འཚེ་བཀོད་ནས་ཁྱིམ་རྒྱུད་འདི་ལ་ཐེབས་པར་འཇུག གནོད་འཚེ་འདི་ལས་ཁྱོད་ཅག་གི་མཇིང་པ་ཐར་པར་མི་ནུས་ཏེ། ཁྱོད་ཚོས་ཀྱང་རང་མཐོང་གི་ངང་ནས་སྤྱོད་མི་ཐུབ་ལ། ཅིའི་ཕྱིར་ཞེ་ན། དུས་འདི་ནི་གནོད་འཚེའི་དུས་ཡིན་ནོ།།
[4] ཉིན་དེ་བསླེབ་ཚེ། མི་ཡིས་ཁྱོད་ཀྱི་ཕྱིར་དུ་སྙན་ངག་འདོན་ཏེ། སྡུག་བསྔལ་ལྡན་པའི་སྐྱོ་གླུ་བླངས་ཏེ་འདི་ལྟར་དུ། བདག་ཅག་ཐམས་ཅད་ཉམས་པར་གྱུར། བདག་གི་མི་སྡེའི་ནོར་སྐལ་གཞན་གྱིས་ཁྱེར། ཡ་ཝཱེས་དེ་ནི་བདག་ལས་བྲལ་པར་མཛད། བདག་ཅག་གི་ཞིང་ས་རྣམས་ནི་གྱེན་ལོག་བྱེད་པའི་མི་ཡིས་བགོས་པས།
[5] གཙོ་བོ་ཡ་ཝཱེ་ཚོགས་ཀྱི་ནང་ན་རྒྱན་བླངས་པ་བཞིན་ཐག་སྐར་གཏོང་བའི་ཕྱིར། ཁྱོད་ལས་སུའང་ལུས་པར་མི་འགྱུར་རོ།།
[6] དེ་དག་གིས་བརྗོད་མཁན་རྣམས་ལ་མ་བརྗོད་ཅིག མི་སུས་ཀྱང་དོན་འདི་དག་བརྗོད་མི་རུང་ལ། དེ་ལྟར་སྤྱད་ན་ངོ་ཚ་བདག་ལས་བྲལ་ཞེས་སྨྲས་སོ།།
[7] ཀྱེ་ཡ་ཀོབ་ཀྱི་ཁྱིམ་རྒྱུད་ལགས། འདི་ལྟར་བརྗོད་འོས་སམ། གཙོ་བོ་ཡ་ཝཱེ་ལ་བཟོད་སེམས་མེད་པ་ཡིན་ནམ། དོན་འདི་རྣམས་ཁོང་གིས་མཛད་པ་ལགས་སམ། བདག་གི་གཏམ་ནི་སྤྱོད་པ་དྲང་པའི་མི་ལ་ཕན་པ་མ་ཡིན་ནམ།
[8] འོན་ཀྱང་ད་ལྟ་བདག་གི་མི་སྡེ་དགྲ་ལྟར་ལངས། ཁྱོད་ཚོས་འཐབ་མོ་ལ་མི་དགའ་བར་འཇིགས་པ་དང་བྲལ་ནས་འགྲུལ་བ་རྣམས་ཀྱི་གོས་ནི་བཤུ་བར་བྱེད།
[9] ངའི་མི་སྡེའི་བུད་མེད་རྣམས་དགའ་བདེ་ཁྱིམ་ལས་ཕྱིར་འདོན་ཏེ། དེའི་བུ་རྣམས་ལས་ངའི་གཟི་བརྗིད་ནི་གཏན་དུ་འཕྲོག
[10] ཡར་ལོངས་ལ་ཕར་སོང་ཞིག འདི་ནི་ཁྱོད་ཀྱི་ཚུགས་འབབ་ས་མ་ཡིན་ནོ།། ཅིའི་ཕྱིར་ཞེ་ན། མི་གཙང་པས་གཏོར་བརླག་ཁྱེར་འོང་སྟེ། གཏོར་བརླག་དེ་ནི་ཤིན་ཏུ་ཆེའོ།།
[11] ཇི་སྟེ་མི་ཞིག་གི་སེམས་ནང་བཅོས་མས་བཀང་ནས་རྫུན་སྨྲས་ཏེ་འདི་ལྟར་དུ། བདག་གིས་ཁྱོད་ལ་རྒུན་ཆང་དང་བཟི་བྱེད་ཀྱི་ལུང་བསྟན་པར་བྱའོ།། སྨྲ་བ་དེ་ནི་མི་སྡེ་འདིའི་ལུང་སྟོན་པར་འགྱུར་རོ།།
[12] ཀྱེ་ཡ་ཀོབ་ཀྱི་ཁྱིམ་རྒྱུད་ལགས། བདག་གིས་ཁྱོད་རྣམས་བསྡུ་པར་བྱ་སྟེ། ཡེས་ར་ཨེལ་གྱི་མི་རྒྱུད་ལྷག་མ་རྣམས་ཀྱང་བསྡུ་པར་བྱ། དེ་རྣམས་ནི་གནས་གཅིག་ཏུ་བཀོད་པ་དང་། དེ་ནི་བོས་རེའི་ལུག་ལྟར་དགུག་ཅིང་། རྩྭ་ཐང་གི་ལུག་ཁྱུ་བཞིན་དུ་བསྡུ་བར་བྱས་ན།མི་གྲངས་ནི་མང་ཞིང་། ཅ་ཅོ་ནི་སྒྲོག་པའོ།།
[13] ལམ་ཕྱེས་མཁན་དེ་དག་སྔོན་དུ་ཆས་ཏེ། མཁར་སྒོའི་ནང་དུ་འཛུལ་ནས་ཕྱིར་བུད་པ་དང་། དེ་རྣམས་ཀྱི་རྒྱལ་པོ་སྔོན་ལ་སོང་ཞིང་། གཙོ་བོ་ཡ་ཝཱེ་ནི་དེ་རྣམས་ཀྱི་མདུན་ནས་གཤེགས་པར་འགྱུར།