[1] ཡང་བདག་གིས་འདི་ལྟར་དུ། ཀྱེ་ཡ་ཀོབ་ཀྱི་འགོ་དཔོན་རྣམས་དང་། ཡེས་ར་ཨེལ་ཁྱིམ་རྒྱུད་ཀྱི་ཁྲིམས་དཔོན་རྣམས། ཁྱོད་ཅག་གིས་ཉོན་ཞིག ཁྱོད་རྣམས་ཀྱིས་བདེན་དྲང་རྟོགས་སམ།
[2] བཟང་པོར་སྡང་མཁན་དང་ངན་པར་ཆགས་མཁན་དེ་ཁྱོད་རྣམས་ཡིན། བདག་གི་མི་སྡེའི་ལུས་ལས་པགས་པ་བཤུ་ཞིང་། རུས་པ་ནས་ཤ་ཡང་གཞུར།
[3] ཁྱོད་རྣམས་ཀྱིས་ངའི་མི་སྡེའི་ཤ་ཟ་ཞིང་། པགས་པ་བཤུ་བར་བྱེད་པ་དང་། ཟགས་བུའི་ཤ་ལྟར་དེ་དག་གི་རུས་པ་རྣམས་བཅག་ནས་། ཁོག་མ་ནང་ལ་འཕེན་པའི་ཤ་ལོག་དང་།སྟ་རེ་ཁ་ཡི་ཤ་དང་འདྲའོ།།
[4] ཡང་གནོད་འཚེ་ཐེབས་པའི་ཉིན་མོ་ལ། དེ་དག་གིས་གཙོ་བོ་ཡ་ཝཱེ་ལ་ཞུ་ཡང་།ཁོང་གིས་དེ་རྣམས་གསན་པར་མི་བྱ་སྟེ། དུས་དེར། དེ་རྣམས་ཀྱིས་སྤྱོད་ངན་སྤྱད་པའི་ཕྱིར། ཁོང་ནི་དེ་དག་དང་ཞལ་འཁོར་ནས་བྲལ་བར་འགྱུར།
[5] ངའི་མི་སྡེ་ལམ་ནོར་ལ་འཇུག་པའི་ལུང་སྟོན་པར་སླེབས་ན། དེ་དག་གིས་སོ་ཡིས་འཆའ་བ་དང་། ཞི་བདེ་སྒྲོག་ཅིང་། དེ་དག་ལ་ཁ་ཟས་མི་སྟེར་པ་རྣམས་ལ་རྒོལ་དུ་ལངས་པའི་ལུང་སྟོན་པའི་སྐོར་དུ་གཙོ་བོ་ཡ་ཝཱེས་འདི་སྐད་དུ།
[6] ཁྱོད་རྣམས་དེའི་ཕྱིར་མུན་ནག་ལ་ཐུག་པ་དང་། ཞལ་གཟིགས་ནི་མི་མཐོང་སྟེ། མུན་པ་ཐུག་པ་དང་།མོ་ཡང་འདེབས་ཐབས་བྲལ། ཡང་ཉི་མ་ནི་ལུང་སྟོན་པ་ལས་ནུབ་པར་འགྱུར་ལ། ཉིན་མོ་ཡང་མུན་ནག་ཏུ་གྱུར།
[7] ལུང་སྟོན་པ་ནི་ངོ་གནོང་ཞིང་།མོ་བ་དག་ནི་ངོ་ཚ་ཞིང་། དེ་དག་ཐམས་ཅད་ཀྱིས་རང་གི་ཁ་སྤུ་བཀབ། ཅིའི་ཕྱིར་ཞེ་ན། དཀོན་མཆོག་ལས་ཁོ་ཚོར་བཀའ་ལན་མི་བྱུང་པའི་ཕྱིར།
[8] དེ་ཡང་བདག་ལ་མཚོན་ན། བདག་ནི་གཙོ་བོ་ཡ་ཝཱེའི་ཐུགས་ཉིད་ལ་བརྟེན་ནས་ནུས་མཐུ་དང་དྲང་བདེན། སྤོབས་པ་བཅས་ཡོད་པར་གྱུར་ལ། ཡ་ཀོབ་ལ་དེའི་ཉེས་སྐྱོན་བཤད་པ་དང་། ཡེས་ར་ཨེལ་ལ་དེའི་སྡིག་པ་སྟོན་པའོ།།
[9] གཏམ་འདི་ལ་ཉོན་དང་། ཀྱེ་ཡ་ཀོབ་ཀྱི་ཁྱིམ་རྒྱུད་ཀྱི་འགོ་དཔོན་རྣམས་དང་། ཡེས་ར་ཨེལ་གྱི་ཁྱིམ་རྒྱུད་ཀྱི་ཁྲིམས་དཔོན་རྣམས། ཁྱོད་རྣམས་ནི་བདེན་དྲང་ལ་སྡང་ཞིང་། དོན་ཐམས་ཅད་ཀྱི་ཐོག་ཏུ་དྲང་བདེན་ལ་མ་ཉེས་ཁ་གཡོགས་བྱེད་པ་དང་།
[10] ཁྲག་གིས་ཛ་ཡན་བཙུགས་པ་དང་།སྡིག་པ་ལས་ཡེ་རུ་སཱ་ལེམ་བཞེངས།
[11] དེ་དག་གི་འགོ་དཔོན་རྣམས་ཀྱིས་རྔན་པའི་ཕྱིར་གཤགས་བྱེད་དེ། མཆོད་དཔོན་རྣམས་ཀྱིས་གླ་ལེན་པའི་ཕྱིར་སློབ་སྟོན་བྱེད། ལུང་སྟོན་པ་རྣམས་ཀྱིས་དངུལ་གྱི་ཕྱིར་མོ་བཏབ་ཀྱང་།དེ་དག་གིས་གཙོ་བོ་ཡ་ཝཱེ་ལ་བརྟེན་ཞིང་འདི་ལྟར་དུ། གཙོ་བོ་ཡ་ཝཱེ་ངེད་ཅག་གི་དཀྱིལ་དུ་མེད་དམ། གནོད་འཚེ་གང་ཡང་ངེད་ལ་མི་འབྱུང་ཞེས་ཟེར་རོ།།
[12] དེ་བས་ན་ཁྱོད་ཀྱི་རྐྱེན་གྱིས་ཛ་ཡན་ཞིང་ལྟར་འདེབས་པ་དང་། ཡེ་རུ་སཱ་ལེམ་ནི་གྱང་རོ་དང་། ཕོ་བྲང་གི་རི་བོ་ནི་ནགས་ཀྱི་གནས་མཐོ་ས་རྣམས་དང་འདྲ་བར་འགྱུར་རོ།།