[1] ཕྱི་མའི་ཉིན་མོ་རྣམས་སུ་གཙོ་བོ་ཡ་ཝཱེའི་ཕོ་བྲང་གི་རི་བོ་རྣམས་ནི་བརྟན་པོེར་ལངས་ཅིང་། རི་ཕྲན་ཀུན་ལས་འདས་བ་དང་། རི་བོ་ཀུན་ལས་མཐོའོ།། མི་སྡེ་ཐམས་ཅད་རི་དེར་བརྒྱུག་པར་འགྱུར།
[2] ཡང་མི་རིགས་མང་པོ་འོང་ཞིང་འདི་ལྟར་དུ། ཤོག་དང་། ངེད་རྣམས་ཡར་གཙོ་བོ་ཡ་ཝཱེའི་རི་བོ་དང་། ཡ་ཀོབ་ཀྱི་དཀོན་མཆོག་གི་ཕོ་བྲང་དུ་འཛེགས་དང་། ཁོང་གིས་ཉིད་ཀྱི་གཤེགས་ལམ་ངེད་རྣམས་ལ་སྟོན་ཏེ། ངེད་རྣམས་ཀྱིས་ཀྱང་ཁོང་གི་ལམ་རྣམས་སུ་འགྲུལ་བར་བྱའོ།།ཅིའི་ཕྱིར་ཞེ་ན། ཛ་ཡན་ལས་བཀའ་ཁྲིམས་དང་ཡེ་རུ་སཱ་ལེམ་ནས་གཙོ་བོ་ཡ་ཝཱེའི་གསུང་འབྱུང་བར་འགྱུར།
[3] ཡང་ཁོང་གིས་མི་རིགས་ནང་ནས་ཉེས་ཆད་གཅད་དེ། ས་ཐག་རིང་པོའི་རྒྱལ་ཁབ་སྟོབས་ལྡན་ལ་བཀའ་བཀྱོན་གནང་པར་འགྱུར་པ་དང་། དེ་དག་གིས་རང་གི་རལ་གྲི་ལས་རྨོ་ལྕགས་དང་། མདུང་ལས་ཟོར་བ་བཟོ་བར་བྱ། ཡང་མི་རྒྱུད་གཅིག་གིས་གཅིག་ལ་རལ་གྲིས་མི་སྤར་ཏེ། དེ་རྣམས་ཀྱིས་དམག་ཐབས་མི་བསླབ་བོ།།
[4] རེ་རེ་རང་གི་རྒུན་ཤིང་དང་། སེ་ཡབ་ཀྱི་འོག་ཏུ་བསྡད་དེ། སུས་ཀྱང་དེ་དག་འཇིགས་སུ་མི་གཞུག་གོ ། ཅིའི་ཕྱིར་ཞེ་ན། དཔུང་ཚོགས་ཀྱི་ཡ་ཝཱེས་འདི་སྐད་གསུངས་པའི་ཕྱིར།
[5] མི་རྒྱུད་ཀུན་གྱིས་རང་གི་ལྷའི་མིང་ལ་བརྟེན་ནས་སྤྱོད་པ་དང་། ཡིན་ཡང་ངེད་ཅག་གིས་རྒྱུན་ནས་རྒྱུན་དུ་ཡ་ཝཱེ་རང་གི་དཀོན་མཆོག་གི་མཚན་ལ་བརྟེན་ནས་སྤྱོད་པར་བྱའོ།།
[6] གཙོ་བོ་ཡ་ཝཱེས་འདི་སྐད་དུ། ཉིན་མོ་དེར་བདག་གིས་ཞ་བོ་རྣམས་དགུག་ཅིང་། བསྐྲད་པར་གྱུར་པ་རྣམས་བསྡུ་བ་དང་། ངས་ཉེས་ཆད་བཅད་པ་རྣམས་ཀྱང་བསྔུ་བར་བྱའོ།།
[7] བདག་གིས་ཞ་བོ་རྣམས་ལུས་སུ་བཅུག་སྟེ། རྒྱང་རིང་བསྐྲད་པ་རྣམས་ཀྱི་རྒྱལ་ཁབ་དར་བར་འཇུག་སྟེ། ཇི་སྲིད་བར་དུ་གཙོ་བོ་ཡ་ཝཱེས་རི་བོ་ཛ་ཡན་ནས་དེ་དག་ལ་དབང་མཛད་པར་འགྱུར།
[8] ཀྱེ་ཀྱེ་ཁྱོད་ཁྱུ་བོའི་སྦེའུ་དང་།ཛ་ཡན་གྱི་རི་བོ་ལགས། སྔོན་གྱི་དབང་ནི་ཁྱོད་ལ་སྤྲད་པར་འགྱུར། ཡེ་རུ་སཱ་ལེམ་གྱི་རྒྱལ་སྲིད་ཁྱོད་ལ་བསླེབ་པར་འགྱུར།
[9] ད་ལྟ་ཁྱོད་ཀྱིས་ཅིའི་ཕྱིར་འོ་དོད་འདོན། ཁྱོད་ཀྱི་ནང་དུ་རྒྱལ་པོ་མེད་དམ། ཁྱོད་ཀྱི་གྲོས་དཔོན་མེད་པར་གྱུར་ཏེ། ན་ཟུག་གིས་ཁྱོད་ཉིད་མནར་པ་ནི་ཕྲུ་གུ་བཙའ་པའི་བུད་མེད་བཞིན་ཡིན་ནམ།
[10] ཀྱེ་ཀྱེ་ཛ་ཡན་ལགས། ཁྱོད་ཀྱིས་ན་ཟུག་ངང་ནས་སྐྱེ་པ་དང་། དེ་ནི་ཕྲུ་གུ་བཙའ་པའི་བུད་མེད་འདྲ། ཅིའི་ཕྱིར་ཞེ་ན། ཁྱོད་ནི་གྲོང་ཁྱེར་ལས་ཐོན་ཏེ། རི་ཐང་ལ་གནས་ཤིང་། པཱ་པིས་ལུན་དུ་འགྲོ་བར་འགྱུར་ལ། གནས་དེར་ཁྱོད་ནི་ཐར་ཞིང་། གནས་དེར་གཙོ་བོ་ཡ་ཝཱེས་ཁྱོད་ནི་བསྐྱབས་ཏེ་དགྲ་བོའི་ལག་ནས་ཐར་བར་འགྱུར་རོ། །
[11] ད་ལྟ།རྒྱལ་ཁབ་མང་པོ་འདུས་ཏེ་ཁྱོད་ལ་རྒོལ་ཏེ་འདི་ལྟར་དུ། ཛ་ཡན་ནི་མི་གཙང་བར་བཅུག་ལ། ངེད་རྣམས་ལ་དངོས་སུ་མཐོང་བར་བཅུག་ཅེས་སྨྲས་པ་དང་།
[12] ཡིན་ཡང་དེ་རྣམས་ཀྱིས་གཙོ་བོ་ཡ་ཝཱེའི་ཐུགས་དགོངས་ནི་མ་རྟོགས་ཏེ།ཁོང་གི་བཀོད་པ་ཡང་མི་ཤེས་སོ།། ཁོང་གིས་དེ་དག་བསྡུ་པ་ནི་གྲོ་ཤོག་གཡུལ་ཁར་བསྡུས་པ་བཞིན་ཡིན་ནོ།།
[13] ཀྱེ་ཀྱེ་ཛ་ཡན་ལགས།ཡར་ལོངས་དང་རང་དབང་སྒྲུབས་ཅིག བདག་གིས་ཁྱོད་ཀྱི་ར་ནི་ལྕགས་དང་། རྨིག་པ་ནི་ལི་སུ་འགྱུར་བར་འགྱུར། ཁྱོད་ཀྱིས་མི་རྒྱུད་མང་པོ་དུམ་བུར་བཏུབ་སྟེ། དེ་དག་གི་རིན་པོ་ཆེ་གཙོ་བོ་ཡ་ཝཱེ་ལ་དབུལ་ཞིང་། དེ་དག་གི་རྒྱུ་ནོར་ས་གཞི་ཡོངས་ཀྱི་གཙོ་བོར་དབུལ་པར་འགྱུར།