[1] ཡོ་ཤུ་ཨ་ནི་ཞོགས་པ་སྔ་མོ་ཡར་ལངས་ཏེ་ཡེས་ར་ཨེལ་པ་རྣམས་དང་མཉམ་དུ་སིད་ཏིམ་ལ་བྲལ་ནས་ཡོར་དན་གཙང་པོ་རུ་སླེབས་པ་དང་། གཙང་པོ་བརྒལ་བའི་བར་དུ་དེར་བསྡད་དོ། །
[2] ཉིན་གསུམ་འགོར་རྗེས་འགོ་དཔོན་རྣམས་སྒར་ས་ཀུན་ཏུ་འགྲིམས་ནས།
[3] འབངས་མི་རྣམས་ལ་འདི་ལྟར། ཁྱོད་རྣམས་ཀྱིས་ཁྱོད་ཀྱི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་། ཡང་མཆོད་དཔོན་ཡིན་པའི་ལེ་ཝི་པ་རྣམས་ཀྱིས་དེ་འཁུར་ནས་འགྲོ་བ་མཐོང་དུས་སྡོད་སའི་གནས་དང་བྲལ་ནས་དེའི་རྗེས་སུ་འབྲང་དགོས།
[4] འོན་ཀྱང་ཁྱོད་ཅག་དང་ཞལ་ཆད་ཀྱི་ཤུར་སྒམ་བར་དུ་ཁྲུ་ཉི་སྟོང་གི་བར་ཐག་དགོས་ལ། ཞལ་ཆད་ཀྱི་ཤུར་སྒམ་དང་ཉེ་བར་མ་གཅར་ཅིག ཅི་ལ་ཞེ་ན། ཁྱོད་རྣམས་སྔར་ལམ་དེར་སྐྱོད་མ་མྱོང་བས་ཁྱོད་ཅག་བགྲོད་པའི་ལམ་དེ་ཤེས་པའི་ཕྱིར་རོ་ཞེས་བཀའ་བསྒོས།
[5] ཡོ་ཤུ་ཨ་ཡིས་འབངས་རྣམས་ལ། སང་ཉིན་གཙོ་བོ་ཡ་ཝཱེས་ཁྱོད་རྣམས་ཀྱི་ཁྲོད་དུ་དོན་ངོ་མཚར་ཅན་མཛད་རྒྱུ་ཡིན་པས། ཁྱོད་ཅག་གིས་གཙང་སྦྲ་བྱེད་དགོས་ཞེས་བཀའ་བསྒོས།
[6] ཡང་ཡོ་ཤུ་ཨ་ཡིས་མཆོད་དཔོན་ཆེན་པོ་རྣམས་ལ། ཁྱོད་ཅག་གིས་ཞལ་ཆད་ཀྱི་ཤུར་སྒམ་འཁུར་ནས་འབངས་རྣམས་ཀྱི་སྔོན་དུ་སོང་ཞིག་ཅེས་བཀའ་བསྒོས་པ་ལ། ཁོ་རྣམས་ཀྱིས་ཞལ་ཆད་ཀྱི་ཤུར་སྒམ་འཁུར་ནས་འབངས་རྣམས་ཀྱི་སྔོན་ནས་བསྐྱོད་དོ། །
[7] གཙོ་བོ་ཡ་ཝཱེས་ཡོ་ཤུ་ཨ་ལ་འདི་སྐད་དུ། དུས་དེ་རིང་ནས་བཟུང་ངས་ཁྱོད་རང་ཡེས་ར་ཨེལ་པ་རྣམས་ཀྱི་མིག་སྔར་མཆོག་ཏུ་གྱུར་བར་བྱ་སྟེ། ང་རང་ནི་ཅི་ལྟར་མོ་ཤེ་མཉམ་དུ་ཡོད་པ་དེ་བཞིན་དུ་ཁྱོད་དང་ཡང་མཉམ་དུ་ཡོད་པ་ཁོ་རྣམས་ལ་ཤེས་སུ་འཇུག་གོ །
[8] ཁྱོད་ཀྱིས་ཞལ་ཆད་ཀྱི་ཤུར་སྒམ་འཁུར་བའི་མཆོད་དཔོན་རྣམས་ལ། ཁྱོད་ཅག་ཡོར་དན་གཙང་པོའི་འགྲམ་དུ་སླེབས་ཚེ། ཡོར་དན་གཙང་པོའི་ཆུ་ནང་དུ་ལོངས་ལ་སྡོད་ཅེས་བསྒོས་ཤིག་ཅེས་གསུངས་སོ། །
[9] ཡོ་ཤུ་ཨ་ཡིས་ཡེས་ར་ཨེལ་པ་རྣམས་ལ། ཁྱོད་རྣམས་ཚུར་ཤོག་ལ་ཁྱོད་ཚོའི་དཀོན་མཆོག་ཡ་ཝཱེའི་བཀའ་ལ་ཉོན་ཅིག་ཅེས་སྨྲས་ཤིང་།
[10] ཡོ་ཤུ་ཨ་ཡིས། ལྟོས་དང་། གནམ་འོག་ཀུན་གྱི་གཙོ་བོའི་ཞལ་ཆད་ཀྱི་ཤུར་སྒམ་ནི་ཁྱོད་རྣམས་ཀྱི་སྔོན་དུ་འགྲོ་ཞིང་ཡོར་དན་གཙང་པོར་བསླེབ་པ་སྟེ། དེ་ནས་ཁྱོད་ཅག་གིས་གཏན་དུ་གསོན་པོར་བཞུགས་པའི་དཀོན་མཆོག་ནི་ཁྱོད་ཚོའི་ཁྲོད་དུ་བཞུགས་པར་མ་ཟད། ཁོང་གིས་ཁྱོད་རྣམས་ཀྱི་མདུན་ནས་ཀ་ན་ཨན་པ་དང་། ཧེད་པ། ཧེ་བི་པ། ཕེ་རེ་ཟི་པ། གིར་གས་པ། ཨེ་མོར་པ། ཡེ་བུ་སི་པ་བཅས་རྣམས་ཕྱིར་སྐྲོད་པར་འགྱུར་བ་ཤེས་སོ། །
[12] ད་ལྟ་ཁྱོད་རྣམས་ཀྱིས་ཡེས་ར་ཨེལ་གྱི་ཚོ་བའི་ཁྲོད་ནས་མི་བཅུ་གཉིས་འདེམས་དགོས་པ་སྟེ། ཚོ་བ་རེ་ནས་མི་རེ་འདེམས་དགོས།
[13] གནམ་འོག་ཀུན་གྱི་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཀྱི་རྐང་པ་ཡོར་དན་གཙང་པོའི་ཆུ་ནང་དུ་སྤོས་པ་ན། ཡོར་དན་གཙང་པོའི་ཆུ་སྟེ་ཡར་ནས་མར་འབབ་པའི་ཆུ་ནི་རྒྱུན་ཆད་ཅིང་ཆུ་རགས་སུ་འགྱིང་བར་འགྱུར་ཅེས་སྨྲས།
[14] འབངས་མི་རྣམས་གུར་དང་བྲལ་ནས་ཡོར་དན་གཙང་པོ་བརྒལ་དུ་འགྲོ་དུས། ཞལ་ཆད་ཀྱི་ཤུར་སྒམ་འཁུར་བའི་མཆོད་དཔོན་རྣམས་ནི་འབངས་མི་རྣམས་ཀྱི་སྔོན་དུ་བསྐྱོད་དོ། །
[15] ཁོ་རྣམས་ཡོར་དན་གཙང་པོར་སླེབས་པ་དང་རྐང་པ་ཆུ་ནང་ལ་སྤོས་མ་ཐག དུས་དེར་སྟོན་ཐོག་བསྡུ་བའི་སྐབས་ཡིན་པས་ཡོར་དན་གཙང་པོའི་ཆུ་ནི་འགྲམ་གཉིས་སུ་སླེབས་པའོ། །
[16] ཡར་ནས་མར་འབབ་པའི་ཆུ་ནི་རྒྱང་ཐག་ཧ་ཅང་རིང་སའི་ཟར་ཐན་གྲོང་རྡལ་གྱི་འགྲམ་དུ་ཡོད་པའི་ཨ་དམ་གྲོང་རྡལ་དུ་རྒྱུན་ཆད་ཅིང་ཆུ་རགས་སུ་འགྱིངས་པ་དང་། ཡ་ལ་པཱ་རུ་བཞུར་བའི་མཚོ་སྟེ་ཚྭ་མཚོ་ཡི་མར་འབབ་པའི་ཆུ་ནི་རྒྱུན་ཆད་པར་གྱུར་བས། འབངས་མི་རྣམས་ཡེ་རུ་ཀོའི་ཁ་གཏད་ནས་ཆུའི་ཕ་རོལ་ཏུ་བརྒལ།
[17] གཙོ་བོ་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཡོར་དན་གཙང་པོའི་སྐམ་ས་རུ་བརྟན་པོར་ལངས་པ་དང་། མི་རྒྱུད་ཐམས་ཅད་ཡོར་དན་གཙང་པོ་བརྒལ་བའི་བར་དུ་ཡེས་ར་ཨེལ་པ་ཐམས་ཅད་སྐམ་ས་ནས་ཕ་རོལ་ཏུ་ཕྱིན་ཏོ། །