[1] གཙོ་བོ་ཡ་ཝཱེས་ཡོ་ཤུ་ཨ་ལ་སྐུལ་སློང་མཛད་ནས་འདི་སྐད་དུ།
[2] ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར། ཁྱོད་ཚོས་བདག་གིས་མོ་ཤེ་བརྒྱུད་ནས་ཁྱོད་རྣམས་ལ་སྐུལ་སློང་བྱས་པ་བཞིན། རང་ཉིད་ལ་བྲོས་བྱོལ་བྱེད་སའི་གྲོང་ཁྱེར་འཛུགས་དགོས་པ་དང་།
[3] མ་ཤེས་བཞིན་མི་གསོད་ནོར་བྱས་པ་རྣམས་དེར་འབྲོ་རུ་འཇུག་དགོས། གྲོང་ཁྱེར་དེ་དག་ཁྱོད་རྣམས་ལ་དགྲ་ཤ་ལེན་མཁན་ལས་བྲོས་བྱོལ་བྱེད་སའི་གནས་སུ་བྱས་ཆོག
[4] མི་གསོད་མཁན་དེ་གྲོང་ཁྱེར་དེ་རྣམས་ཀྱི་གཅིག་ལ་བྲོས་ནས་མཁར་སྒོ་ཁར་ལངས་སྡོད་ཅིང་། ཁོའི་དོན་དག་གྲོང་ཁྱེར་ནང་གི་རྒན་པོ་རྣམས་ལ་བཤད་དགོས་ཤིང་། དེ་རྣམས་ཀྱིས་ཁོ་གྲོང་ཁྱེར་ནང་དུ་བླངས་ནས་ཁོ་རྣམས་ཀྱི་ཁྲོད་དུ་གཞིས་འཛིན་པའི་ཕྱིར་ཁོ་ལ་གནས་ཤིག་སྤྲོད་དགོས།
[5] གལ་ཏེ་དགྲ་ཤ་ལེན་མཁན་ཁོའི་ར་མདར་འོངས་ཚེ། ཁོ་ལ་སྔར་ནས་ཞེ་འཁོན་མེད་ཅིང་མ་ཤེས་བཞིན་མི་བསད་པ་ཡིན་པས། རྒན་པོ་རྣམས་ཀྱིས་ཁོ་རང་དགྲ་ཤ་ལེན་མཁན་གྱི་ལག་ཏུ་སྤྲོད་མི་རུང་།
[6] ཁོ་རང་གྲོང་ཁྱེར་དེའི་ནང་སྡོད་ཅིང་ཚོགས་མིའི་མདུན་དུ་ལངས་བསྡད་ནས་འདྲི་གཅོད་ལ་ཉན་དགོས་པ་དང་། སྐབས་དེའི་མཆོད་དཔོན་ཆེན་མོ་ཚེ་ལས་འདས་རྗེས། མི་གསོད་མཁན་ནི་ད་གཟོད་རང་གི་གྲོང་ཁྱེར་དང་རང་ཁྱིམ་སྟེ་ཁོ་རང་ཕྱི་རུ་བྲོས་འོངས་སའི་གྲོང་ཁྱེར་དུ་ཕྱིར་ལོག་ཆོག་པ་ཡིན་ཞེས་བསྒོ་བར་གྱིས་ཤིག་ཅེས་གསུངས་སོ། །
[7] དེ་ནས་ཡེས་ར་ཨེལ་པས་ནཱབ་ཐ་ལིའི་རི་ཁུལ་ནས་ག་ལིལ་ཡུལ་གྱི་ཀེ་དེ་སི་དང་། ཨེ་ཕཱར་ཡིམ་གྱི་རི་ཁུལ་ནས་སི་ཀེམ། ཡ་ཧུ་དཱའི་རི་ཁུལ་ནས་ཀིར་ཡཱད་ཨར་པཱ་སྟེ་ཧེབ་རོན་བཅས་ལོགས་སུ་བཀར་ཅིང་།
[8] ཡང་ཡོར་དན་གཙང་པོའི་ཕྱི་རུ་ཡེ་རུ་ཀོ་ཡི་ཤར་ཏུ། རུ་བེན་ཚོ་བ་ནས་དབེན་སྟོང་གི་ཐང་དུ་པེ་ཙེར་བཙུགས། གཱ་རྡུའི་ཚོ་བ་ནས་གིལ་ཨད་ཀྱི་རཱ་མོད་བཙུགས། མཱ་ན་ཤེའི་ཚོ་བ་ནས་པཱ་ཤན་གྱི་གོ་ལན་བཙུགས།
[9] དེ་ཐམས་ཅད་ནི་ཡེས་ར་ཨེལ་པ་རྣམས་དང་ཁོ་ཚོའི་ཁྲོད་བྱེས་སུ་སྡོད་མཁན་ཕྱི་མི་རྣམས་ཀྱིས་ལོགས་སུ་བཀར་བའི་ཡུལ་ཕྱོགས་ཡིན་ཏེ། མི་གསོད་ནོར་བྱས་པ་ཐམས་ཅད་དེར་བྲོས་བྱོལ་བྱས་ནས་དགྲ་ཤ་ལེན་མཁན་གྱི་ལག་ནས་མི་འཆི་བར། ཁོ་རང་ཚོགས་མིའི་མདུན་དུ་ལངས་བསྡད་ནས་འདྲི་གཅོད་ལ་ཉན་པའི་ཕྱིར་རོ། །