[1] ཡེ་རེམ་ཡཱ་ལ་བྱུང་བའི་གཙོ་བོ་ཡ་ཝཱེའི་བཀའ་ནི་འདི་ལྟ་སྟེ།
[2] ཁྱོད་གཙོ་བོ་ཡ་ཝཱེའི་མཆོད་ཁང་གི་སྒོ་ཁར་འགྲེང་ནས་དེ་རུ་གཏམ་འདི་སྒྲོགས་ཤིག ཀྱེ་སྒོ་འདི་རྣམས་བརྒྱུད་ནས་གཙོ་བོ་ཡ་ཝཱེ་ལ་བསྙེན་བཀུར་བྱེད་དུ་འོངས་པའི་ཡ་ཧུ་དཱ་པ་ཐམས་ཅད་ལགས། གཙོ་བོ་ཡ་ཝཱེའི་བཀའ་ལ་ཉོན་ཅིག་ཅེས་པའོ་ཞེས་གསུངས།
[3] དཔུང་ཚོགས་ཀྱི་གཙོ་བོ་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཀྱིས་རང་གི་བྱ་བ་སྤྱོད་པ་བསྒྱུར་ན། བདག་གིས་ཁྱོད་རྣམས་ཡུལ་འདིར་སྡོད་དུ་འཇུག
[4] ཁྱོད་རྣམས་རྫུན་གཏམ་ལ་བརྟེན་ནས། འདི་ནི་གཙོ་བོ་ཡ་ཝཱེའི་མཆོད་ཁང་ཡིན། གཙོ་བོ་ཡ་ཝཱེའི་མཆོད་ཁང་ཡིན། གཙོ་བོ་ཡ་ཝཱེའི་མཆོད་ཁང་ཡིན་ཞེས་མ་བརྗོད་ཅིག
[5] ཁྱོད་ཚོས་དངོས་ནས་རང་གི་བྱ་བ་སྤྱོད་པ་བསྒྱུར་ཏེ། ཕན་ཚུན་བར་གཟབ་ནན་སྒོས་དྲང་གཞག་སྤྱོད་པ་དང་།
[6] བྱེས་སུ་སྡོད་པའི་མི་དང་དྭ་ཕྲུག ཡུགས་མོ་བཅས་ལ་བརྙས་བཅོས་མི་བྱེད་ཅིང་། ཡུལ་འདིར་མི་ཉེས་མེད་ཀྱི་ཁྲག་བཞུར་དུ་མི་འཇུག་པ་དང་། ལྷ་གཞན་རྣམས་ཀྱི་རྗེས་སུ་འབྲངས་ནས་རང་ལ་གནོད་མ་བསྐྱལ་ན།
[7] བདག་གིས་ཁྱོད་རྣམས་ད་དུང་ངས་གནའ་ནས་ཁྱོད་ཅག་གི་མེས་པོ་རྣམས་ལ་ཇི་སྲིད་བར་དུ་གནང་བའི་ཡུལ་འདིར་གནས་པར་བྱའོ། །
[8] འོན་ཀྱང་ལྟོས་ཤིག ཁྱོད་རྣམས་རྫུན་དང་ཕན་ཐོགས་མེད་པའི་སྨྲ་བརྗོད་ལ་བརྟེན་པ་ཡིན།
[9] ཁྱོད་རྣམས་ཀྱིས་རྐུ་བྱས་ནས་སྲོག་གཅོད་ཅིང་། ལོག་གཡེམ་བྱེད་པ་དང་། མནའ་རྫུན་མ་བསྐྱལ་བ། པཱ་ཨལ་ལ་སྤོས་བདུག་པ་བཅས་བྱེད་པར་མ་ཟད། རྒྱུས་མི་མངའ་བའི་ལྷ་རྣམས་ཀྱི་རྗེས་སུ་འབྲངས་རྗེས།
[10] ཡང་ངའི་མིང་ཐོགས་པའི་མཆོད་ཁང་འདིར་འོངས་ནས་བདག་གི་མདུན་དུ་ཕྱག་བཙལ་ཏེ་ན་རེ། ངེད་རྣམས་བདེའོ་ཞེས་སྨྲ་ག་ལ་རུང་། ཁྱོད་ཅག་གི་བྱ་སྤྱོད་འདི་ལྟ་བུ་ནི་ཞེན་ཁ་ལོག་པའི་དོན་འདི་རྣམས་སྤྱོད་པའི་ཕྱིར་ཡིན་ནམ།
[11] ངའི་མིང་ཐོགས་པའི་མཆོད་ཁང་འདི་ཁྱོད་ཚོའི་མིག་ནང་དུ་ཇག་ཚང་དུ་བརྩིས་པ་ཡིན་ནམ། ལྟོས་ཤིག བདག་གིས་ཐམས་ཅད་མཐོང་ངོ་ཞེས་གཙོ་བོ་ཡ་ཝཱེས་འདི་སྐད་གསུངས།
[12] ཁྱོད་རྣམས་ངས་དེ་སྔར་རང་གི་མིང་གནས་ས་རུ་བྱས་པའི་ཞི་ལོ་ཡུལ་དུ་སོང་ལ། ངས་རང་གི་མི་རྒྱུད་ཡེས་ར་ཨེལ་གྱི་སྡིག་ཉེས་ཀྱི་ཕྱིར་གནས་དེར་ཅི་བྱས་པར་ལྟོས་ཤིག
[13] ད་ལྟ་ཁྱོད་རྣམས་ཀྱིས་ཀྱང་དོན་འདི་ཐམས་ཅད་བྱས་པའི་ཕྱིར། བདག་གིས་ཁྱོད་རྣམས་ལ་ཉེན་བརྡ་ཡང་ཡང་བརྒྱབ་ཀྱང་ཁྱོད་རྣམས་ཀྱིས་མ་ཉན། བདག་གིས་ཁྱོད་རྣམས་བོས་ཀྱང་ཁྱོད་རྣམས་ཀྱིས་ཨ་ལན་མ་བྱིན་ཞེས་གཙོ་བོ་ཡ་ཝཱེས་འདི་སྐད་གསུངས།
[14] དེ་བས་བདག་གིས་ངའི་མིང་ཐོགས་པ་དང་ཁྱོད་རྣམས་བརྟེན་སའི་མཆོད་ཁང་འདི་དང་། བདག་གིས་ཁྱོད་ཅག་དང་ཁྱོད་ཅག་གི་མེས་པོ་རྣམས་ལ་གནང་བའི་ཡུལ་ལ་འདི་ལྟར་སྤྱོད་ངེས་ཏེ། སྔར་བདག་གིས་ཞི་ལོ་ལ་ཅི་ལྟར་སྤྱད་པ་བཞིན་དུ་སྤྱོད་པར་འགྱུར།
[15] ངས་ཅི་ལྟར་ཁྱོད་ཅག་གི་སྤུན་ཟླ་རྣམས་ཏེ་ཨེ་ཕཱར་ཡིམ་གྱི་བུ་རྒྱུད་ཐམས་ཅད་ཕྱི་རོལ་ཏུ་བསྐྲད་པ་བཞིན། བདག་གིས་ཁྱོད་རྣམས་ཀྱང་དེ་ལྟར་ངའི་མདུན་ནས་ཕྱི་རུ་བསྐྲོད་པར་འགྱུར།
[16] དེ་བས། ཁྱོད་ཀྱིས་མི་རྒྱུད་འདིའི་དོན་དུ་སྨོན་ལམ་མ་འདེབས། དེ་དག་གི་ཆེད་དུ་ཞུ་འབོད་མ་བྱེད། བདག་གིས་ཁྱོད་ལ་མི་ཉན་པས་ན་དེ་དག་གི་ཕྱིར་དུ་བདག་ལ་ཞུ་བའང་མ་བྱེད་ཅིག
[17] དེ་རྣམས་ཀྱིས་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དུ་བྱས་པའི་དོན་རྣམས་ཁྱོད་ཀྱིས་མ་མཐོང་ངམ།
[18] བྱིས་པས་བུད་ཤིངབཏུས་ནས་ཕ་ཡིས་མེ་སྦར་བ་དང་། བུད་མེད་ཀྱིས་ཕྱེ་བརྫིས་ནས་བག་ལེབ་བཅོས་ཏེ་རྒྱལ་མོར་ཕུལ་ཞིང་། ཡང་ལྷ་གཞན་རྣམས་ལ་སྐྱེམས་མཆོད་ཕུལ་ནས་ང་ཁྲོ་རུ་བཅུག
[19] དེ་དག་གིས་ང་ཁྲོ་རུ་བཅུག་པ་ག་ལ་ཡིན། རང་གིས་རང་ལ་ཆག་སྒོ་བསླངས་ཏེ་རང་ཉིད་ངོ་ཚར་སྦྱར་བ་མ་ཡིན་ནམ་ཞེས་གཙོ་བོ་ཡ་ཝཱེས་འདི་སྐད་གསུངས།
[20] དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་ཤིག བདག་གིས་རང་གི་ཁོང་ཁྲོ་དང་ཞེ་སྡང་ནི་ཡུལ་འདིའི་མི་ཕྱུགས་གཉིས་ཀ་དང་། རི་ཐང་གི་ཤིང་སྡོང་དང་ས་ལས་ཐོན་པ་ཐམས་ཅད་ཀྱི་སྟེང་དུ་བླུག་པར་བྱ་སྟེ། མེ་ལྟར་འབར་ཞིང་སུས་ཀྱང་གསོད་མི་ནུས་ཞེས་གསུངས།
[21] དཔུང་ཚོགས་ཀྱི་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཀྱིས་སྦྱིན་སྲེག་གི་མཆོད་པའི་སྟེང་དུ་ཞི་བདེའི་མཆོད་པའང་སྣོན་ལ་ཤ་ཟོ་ཞིག
[22] གང་ལ་ཞེ་ན། བདག་གིས་ཁྱོད་ཅག་གི་མེས་པོ་རྣམས་ཨེ་ཅིབ་ཡུལ་ནས་ཁྲིད་འོང་བའི་ཉིན་མོར། སྦྱིན་སྲེག་གི་མཆོད་པ་དང་ཞི་བདེའི་མཆོད་པ་གཉིས་ཀྱི་དོན་ནི་བདག་གིས་མ་གླེང་ལ། དེ་རྣམས་ལ་བཀའ་ཡང་མ་བསྒོས།
[23] བདག་གིས་དེ་རྣམས་ལ་དོན་འདི་གཅིག་པུ་བསྒོས་ནས་འདི་ལྟར། ཁྱོད་རྣམས་ཀྱིས་ངའི་བཀའ་ལ་ཉན་ན། བདག་ནི་ཁྱོད་རྣམས་ཀྱི་དཀོན་མཆོག་ཏུ་འགྱུར་གྱིས། ཁྱོད་རྣམས་ཀྱང་ངའི་མི་སྡེ་རུ་འགྱུར་ངེས་ཡིན། ཁྱོད་རྣམས་བདག་གིས་བསྒོས་པའི་བཀའ་ཡི་ནང་དུ་འགྲུལ་ན་བྱིན་རླབས་འཐོབ་པར་འགྱུར་ཞེས་སྨྲས་སོ། །
[24] ཡིན་ནའང་དེ་རྣམས་ཀྱིས་མ་ཉན་ཏེ་རྣ་བ་གཏད་ནས་མི་ཉན་པར། རང་གི་ཐབས་ཇུས་དང་སེམས་ངན་གཤིས་གྱོང་གི་རྗེས་སུ་འབྲངས་ནས་ཕྱི་བསྣུར་བྱས་པ་ལས་མདུན་དུ་མ་སྐྱོད་དོ། །
[25] ཁྱོད་ཅག་གི་མེས་པོ་རྣམས་ཨེ་ཅིབ་ཡུལ་ནས་ཕྱི་རུ་ཐོན་པའི་ཉིན་ནས་དེ་རིང་བར་དུ། བདག་གིས་ཉིན་རེ་རེའི་ཞོགས་པར་རང་གི་ཞབས་ཏོག་པ་སྟེ་ལུང་སྟོན་པ་རྣམས་ཁྱོད་ཚོའི་མདུན་དུ་མངགས་ཀྱང་།
[26] ཁྱོད་ཚོས་བདག་ལ་མ་ཉན་ཏེ་རྣ་བ་གཏད་ནས་མི་ཉན་པར་སེམས་རྒྱུད་རེངས་པོ་བྱས་ནས་ལས་ངན་ལ་སྤྱད་པ་ནི་ཁྱོད་ཚོའི་མེས་པོ་རྣམས་ལས་ཀྱང་སྡུག་གོ །
[27] ཁྱོད་ཀྱིས་གཏམ་འདི་ཐམས་ཅད་ཁོ་ཚོར་སྨྲས་ཀྱང་དེ་རྣམས་ཀྱིས་ཁྱོད་ལ་མི་ཉན་ཏེ། ཁོ་ཚོ་བོས་ཀྱང་དེ་དག་གིས་ཨ་ལན་མི་སྤྲོད།
[28] དེའི་ཕྱིར་ཁྱོད་ཀྱིས་ཁོ་རྣམས་ལ་འདི་ལྟར་སྨྲ་དགོས་ཏེ། འདི་ནི་ཁོ་ཚོའི་དཀོན་མཆོག་ཡ་ཝཱེའི་བཀའ་ལ་མི་ཉན་པ་དང་བཀའ་སློབ་དང་ལེན་མི་བྱེད་པའི་མི་རྒྱུད་ཡིན་ལ། དེ་ཚོའི་སྨྲ་སྒོར་དྲང་བདེན་མེད་པར་གྱུར་ཏོ་ཞེས་པའོ། །
[29] ཀྱེ་ཡེ་རུ་སཱ་ལེམ། རང་གི་སྐྲ་བཞར་ནས་ཕོངས་ཤིག སྐྱ་ཐེར་ཐེར་གྱི་མཐོ་སྒང་དུ་མྱ་ངན་བྱོས་ཤིག གང་ལ་ཞེ་ན། གཙོ་བོ་ཡ་ཝཱེས་ཁོང་ཉིད་ཐུགས་ཁྲོ་རུ་འཇུག་པའི་དུས་རབས་དེ་སྤངས་ནས་བསྐྱུར་བས་སོ། །
[30] ཡ་ཧུ་དཱ་པ་རྣམས་ཀྱིས་ངའི་ངན་པར་འདོད་པ་གང་ཡིན་སྤྱད་ནས། ང་ཡི་མིང་གིས་འབོད་པའི་མཆོད་ཁང་ནང་དུ་ཞེན་ཁ་ལོག་པའི་རྫས་རྣམས་བསླངས་ཏེ་མཆོད་ཁང་འདི་མི་གཙང་བར་བཟོས་ཞེས་གཙོ་བོ་ཡ་ཝཱེས་འདི་སྐད་གསུངས།
[31] དེ་རྣམས་ཀྱིས་རང་གི་བུ་བུ་མོ་རྣམས་མེའི་ནང་དུ་བསྲེག་ཕྱིར་པེན་ཧིན་ནོམ་ལུང་པའི་ཐོ་ཕེད་དུ་མཐོ་གླིང་བརྩིགས་པ་དང་། འདི་ནི་བདག་གིས་བསྒོས་པའི་བཀའ་མིན་ལ། ངའི་སེམས་སུ་དྲན་ཡང་མ་མྱོང་ངོ་། །
[32] དེ་བས། ལྟོས་ཤིག དུས་དེ་བསླེབ་ལ་ཉེ། གནས་འདི་ནི་ཐོ་ཕེད་དང་པེན་ཧིན་ནོམ་ལུང་པ་རུ་མི་འབོད་པར་གསོད་གཅོད་ཀྱི་ལུང་པ་ཞེས་འབོད་པར་འགྱུར། དེ་རྣམས་ཀྱིས་ཐོ་ཕེད་དུ་བམ་རོ་སྦས་པ་དང་། ཐ་ན་སྦས་ས་ཡང་མེད་ཅེས་གཙོ་བོ་ཡ་ཝཱེས་འདི་སྐད་གསུངས།
[33] མི་རྒྱུད་འདིའི་བམ་རོ་རྣམས་ནི་ནམ་མཁའི་བྱ་དང་ས་གཞིའི་གཅན་གཟན་རྣམས་ཀྱི་ཁ་ཟས་སུ་འགྱུར་ཏེ། སུས་ཀྱང་དེ་དག་དཀྲོག་པར་མི་འགྱུར།
[34] དུས་དེར་བདག་གིས་ཡ་ཧུ་དཱ་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དུ་དགའ་སྤྲོ་དང་སྐྱིད་པོའི་སྐད་སྒྲ་དང་། བག་མ་དང་མག་པའི་སྐད་སྒྲ་མཚམས་ཆད་པར་བྱའོ། །གང་ལ་ཞེ་ན། ཡུལ་འདི་སྟོངས་པར་འགྱུར་བས་སོ། །