[1] གལ་ཏེ་མི་ཞིག་གིས་ཆུང་མ་དོར་ནས་ཆུང་མ་དེ་ཁོ་དང་བྲལ་ཏེ་མི་གཞན་པའི་ཆུང་མ་བྱས་པ་ཡིན་ན། སྐྱེས་པ་དེ་སླར་མོའི་གམ་དུ་འགྲོ་ནུས་སམ། གནས་དེ་རྩ་བ་ནས་བཙོག་པར་གྱུར་པ་མ་ཡིན་ནམ། ཁྱོད་ནི་དགའ་རོགས་མང་པོ་དང་ལོག་གཡེམ་བྱས་ཤིང་ད་ནི་བདག་གི་གམ་དུ་ལོག་འདོད་དམ་ཅེས་གསུངས་ཏེ། འདི་ནི་གཙོ་བོ་ཡ་ཝཱེས་གསུངས་པའོ། །
[2] གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་མིག་ཡར་བཏེགས་ནས་སྐྱ་ཐེར་ཐེར་གྱི་མཐོ་སྒང་རྣམས་ལ་ལྟོས་ཤིག གང་སར་ཁྱོད་ཀྱི་ལོག་སྤྱོད་མེད་དམ། ཁྱོད་ལམ་ཁར་བསྡད་དེ་དགའ་རོགས་ལ་སྒུག་པའི་ཚུལ་ནི། ཨ་རབ་པ་ཞིག་དབེན་སྟོང་དུ་ཡིབ་པ་དང་འདྲ་སྟེ། ཁྱོད་ཀྱི་ལོག་སྤྱོད་དང་ངན་པ་ཡིས་ས་གཞི་ཐམས་ཅད་བཙོག་པར་བཟོས།
[3] དེ་བས་སྦྲང་ཆར་འབབ་མཚམས་བཞག་ཅིང་དཔྱིད་ཆར་ཡང་མི་འབབ་པར་གྱུར་ཡང་། ཁྱོད་ཀྱི་གདོང་ནི་ད་དུང་སྨད་འཚོང་མའི་གདོང་བཞིན་ངོ་ཚ་དང་བྲལ་ཏོ། །
[4] ཁྱོད་ཀྱིས་ད་ལྟ་བདག་ལ་ཞུས་ནས་ན་རེ། ཀྱེ་ང་ཡི་ཡབ་ལགས། ཁྱེད་ནི་ངའི་ལོ་ན་གཞོན་དུས་ཀྱི་མཛའ་གྲོགས་ཡིན།
[5] གཙོ་བོ་ཡ་ཝཱེ་ཇི་སྲིད་བར་དུ་ཐུགས་ཁྲོས་ནས་ཡུན་རིང་པོར་ཁྲོ་གཏུམ་འབར་ག་ལ་སྲིད་ཅེས་པའོ། །ལྟོས་ཤིག ཁྱོད་ཀྱིས་འདི་ལྟར་སྨྲས་ཀྱང་ད་དུང་ནུས་ཤུགས་ཅི་ཡོད་བཏོན་ནས་སྤྱོད་ངན་སྤྱད་པ་ཡིན་ཞེས་གསུངས་སོ། །
[6] ཡོ་ཤི་ཡཱ་ཡིས་རྒྱལ་སྲིད་སྐྱོང་དུས་སུ་གཙོ་བོ་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ལོག་ལམ་དུ་ཞུགས་པའི་ཡེས་ར་ཨེལ་གྱི་སྤྱོད་པ་མཐོང་ངམ། དེ་ནི་རི་མཐོན་པོ་རེ་རེར་སོང་སྟེ། སྔོ་ལྗང་ལྗང་གི་སྡོང་བོ་རེ་རེའི་འོག་ཏུ་ལོག་གཡེམ་བྱས་པའོ། །
[7] ངས་དེ་ཡིས་སྤྱོད་པ་འདི་དག་སྤྱད་རྗེས་སླར་ཡང་བདག་གི་ཕྱོགས་སུ་འཁོར་ཡོང་སྙམ་ནའང་དེ་ཕྱིར་མ་འོང་སྟེ། དེའི་སྲིང་མོ་གཡོ་སྒྱུ་ཅན་ཡ་ཧུ་དཱས་ཀྱང་མཐོང་བ་ཡིན།
[8] ལོག་ལམ་དུ་ཞུགས་པའི་ཡེས་ར་ཨེལ་གྱིས་ལོག་གཡེམ་བྱས་པས་བདག་གིས་དེ་དོར་བ་ཡིན་མོད། འོན་ཀྱང་དེའི་སྲིང་མོ་གཡོ་སྒྱུ་ཅན་ཡ་ཧུ་དཱ་ནི་ད་དུང་མི་སྐྲག་པར་དེས་ཀྱང་ལོག་གཡེམ་བྱས།
[9] ཡེས་ར་ཨེལ་གྱིས་ལོག་གཡེམ་སྤྱོད་པ་སྣང་མེད་དུ་བཏང་ཞིང་རྡོ་དང་ཤིང་ལ་ལོག་གཡེམ་བྱས་ནས། ས་འདི་ཡོངས་སུ་བཙོག་པར་བྱས།
[10] དོན་འདི་ཐམས་ཅད་ཡོད་ཀྱང་། དེའི་སྲིང་མོ་གཡོ་སྒྱུ་ཅན་ཡ་ཧུ་དཱ་ནི་ང་ཡི་ཕྱོགས་སུ་ལོག་ཁུལ་བྱས་པ་ལས་སེམས་གཅིག་ལུས་གཅིག་མ་ཡིན་ནོ་ཞེས་གསུངས་ཏེ། འདི་ནི་གཙོ་བོ་ཡ་ཝཱེས་གསུངས་པའོ། །
[11] གཙོ་བོ་ཡ་ཝཱེས་ང་ལ་འདི་སྐད་དུ། གཡོ་སྒྱུ་ཅན་གྱི་ཡ་ཧུ་དཱ་ལས་ལོག་ལམ་དུ་ཞུགས་པའི་ཡེས་ར་ཨེལ་ནི་དྲང་པོར་མངོན་ཞིང་།
[12] ཁྱོད་ནི་བྱང་ཕྱོགས་སུ་སོང་ནས་འདི་ལྟར་དུ། ཀྱེ་ལོག་ལམ་དུ་ཞུགས་པའི་ཡེས་ར་ཨེལ་ལགས། ཕྱིར་ལོག་དང་ཞེས་སྨྲོས་ཤིག་ཅེས་གསུངས་ཏེ། འདི་ནི་གཙོ་བོ་ཡ་ཝཱེས་གསུངས་པའོ། །བདག་ནི་བྱམས་སྙིང་རྗེ་ཅན་ཡིན་པས་ངས་ཁྱོད་ཚོར་སྡང་མིག་གིས་མི་བལྟ་ཞེས་གཙོ་བོ་ཡ་ཝཱེས་འདི་སྐད་གསུངས་པའོ། །བདག་ནི་ཇི་སྲིད་བར་དུ་ཁྲོ་བར་མི་བྱ་སྟེ།
[13] ཁྱོད་ཀྱིས་རང་གི་དཀོན་མཆོག་ཡ་ཝཱེ་དང་འགལ་ཏེ། སྔོ་ལྗང་ལྗང་གི་སྡོང་བོ་རེ་རེའི་འོག་ཏུ་ཕྱི་ཕྱོགས་པའི་ལྷ་རྣམས་རྗེས་སུ་འབྲངས་ནས་བདག་གི་བཀའ་ལ་མ་ཉན་པའི་སྡིག་པ་ཁས་ལོངས་ཤིག་ཅེས་གཙོ་བོ་ཡ་ཝཱེས་འདི་སྐད་གསུངས་པའོ། །
[14] ལོག་ལམ་དུ་ཞུགས་པའི་བུ་དང་བུ་མོ་རྣམས་ཕྱིར་ལོག་ཅིག་ཅེས་གཙོ་བོ་ཡ་ཝཱེས་འདི་སྐད་གསུངས། གང་ལ་ཞེ་ན། བདག་ནི་ཁྱོད་རྣམས་ཀྱི་སྐྱེས་པ་ཡིན་ལ། ངས་ཁྱོད་རྣམས་གྲོང་ཁྱེར་གཅིག་ནས་མི་གཅིག་རེ་དང་། རིགས་རྒྱུད་གཅིག་ནས་མི་གཉིས་རེ་བླངས་ཏེ་ཛ་ཡན་དུ་ཁྲིད་རྒྱུ་ཡིན།
[15] ངས་རང་གི་བློ་ལ་འབབ་པའི་བདག་སྐྱོང་པ་ཁྱོད་རྣམས་ལ་གནང་སྟེ། དེ་དག་གིས་ཤེས་བྱ་དང་ཤེས་རབ་ཀྱིས་ཁྱོད་རྣམས་སྐྱོང་བར་འགྱུར།
[16] ཁྱོད་རྣམས་ནི་ཡུལ་དེ་རུ་དར་ཞིང་རྒྱས་པའི་ཉིན་དེ་དག་ལ། མི་ཡིས་སླར་ཡང་གཙོ་བོ་ཡ་ཝཱེའི་ཞལ་ཆད་ཀྱི་ཤུར་སྒམ་ཞེས་གླེང་བར་མི་འགྱུར་ལ། དེར་དོ་སྣང་མི་བྱེད། དེ་ཡིད་ལ་མི་དྲན། དེ་མེད་པའི་ཚོར་སྣང་ཡང་མི་འབྱུང་། དེ་སླར་བཟོ་བར་ཡང་མི་བྱ་ཞེས་གཙོ་བོ་ཡ་ཝཱེས་འདི་སྐད་གསུངས་པའོ། །
[17] དུས་དེར། མི་ཡིས་ཡེ་རུ་སཱ་ལེམ་ལ་ཡ་ཝཱེའི་བཞུགས་ཁྲི་ཞེས་འབོད་ཅིང་། མི་སྡེ་ཐམས་ཅད་དེ་རུ་འདུས་པ་དང་། ཡ་ཝཱེའི་མཚན་གྱི་ཕྱིར་ཡེ་རུ་སཱ་ལེམ་དུ་འོང་ཞིང་། ཁོ་རྣམས་ཡང་བསྐྱར་རང་གི་སེམས་ངན་གཤིས་གྱོང་གི་རྗེས་སུ་མི་འབྲང་ངོ་། །
[18] དུས་དེར། ཡ་ཧུ་དཱའི་ཁྱིམ་རྒྱུད་དང་ཡེས་ར་ཨེལ་གྱི་ཁྱིམ་རྒྱུད་གཉིས་ལྷན་ཅིག་ཏུ་འགྲུལ་ཞིང་། བྱང་ཕྱོགས་ནས་མཉམ་དུ་བདག་གིས་ཁྱོད་ཚོའི་མེས་པོ་རྣམས་ལ་ནོར་སྐལ་དུ་གནང་བའི་ཡུལ་དུ་འོང་བར་འགྱུར།
[19] བདག་གིས་ཁྱོད་ནི་རང་གི་བུ་དང་བུ་མོར་བརྩིས་ཤིང་ཁྱོད་ལ་ཡིད་དུ་འོང་བའི་ཡུལ་གནང་བ་སྟེ། ཡུལ་དེ་ནི་མི་རིགས་རྣམས་ལས་ཆེས་ལེགས་པའི་ནོར་སྐལ་ཡིན་ལ། ཁྱོད་ཀྱིས་བདག་ལ་ངའི་ཡབ་ཅེས་བོས་ནས་སླར་ཡང་བདག་དང་མི་འབྲལ་བར་ང་ཡི་རྗེས་སུ་འབྲང་བར་འགྱུར་སྙམ་པ་ཡིན་ཞེས་ང་རང་གིས་སྨྲས་པའོ། །
[20] ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ཁྱོད་ཚོས་བདག་གི་ཕྱོགས་སུ་གཡོ་སྒྱུ་ཚད་པ་དེ་ནི། ཆུང་མ་ཞིག་གིས་གཡོ་སྒྱུ་ཚད་ནས་རང་གི་སྐྱེས་པ་དང་བྲལ་བར་མཚུངས་པ་ཡིན་ཞེས་གཙོ་བོ་ཡ་ཝཱེས་འདི་སྐད་གསུངས་པའོ། །
[21] སྐྱ་ཐེར་ཐེར་གྱི་མཐོ་སྒང་ནས་སྐད་སྒྲ་ཞིག་བྱུང་སྟེ། དེ་ནི་ཡེས་ར་ཨེལ་པ་རྣམས་ངུས་ནས་ནན་ཞུ་བྱེད་པའི་སྐད་སྒྲ་ཡིན་ལ། གང་ལ་ཞེ་ན། དེ་རྣམས་ལོག་ལམ་རྒྱུ་བ་སྟེ་རང་གི་དཀོན་མཆོག་ཡ་ཝཱེ་བརྗེད་པས་ཡིན་ནོ། །
[22] ལོག་ལམ་དུ་ཞུགས་པའི་མི་རྣམས་ཕྱིར་ཤོག་དང་། བདག་གིས་ཁྱོད་ཚོ་ལོག་ལམ་དུ་ཞུགས་པའི་ནད་གསོ་བར་བྱ། གཟིགས་དང་། །ངེད་རྣམས་ཁྱེད་ཀྱི་དྲུང་དུ་འོང་སྟེ། གང་ལ་ཞེ་ན། ཁྱེད་ནི་ངེད་རྣམས་ཀྱི་དཀོན་མཆོག་ཡ་ཝཱེ་ཡིན་པས་སོ། །
[23] རི་སྒང་དང་རི་བོ་རྣམས་ལས་ཡོང་བ་ནི་སྟོང་བ་ཡིན་ལ། ཡེས་ར་ཨེལ་གྱི་ཐར་པ་ནི་དངོས་ནས་ངེད་རྣམས་ཀྱི་དཀོན་མཆོག་ཡ་ཝཱེ་ལ་ཐུག་ཡོད་དོ། །
[24] ངེད་རྣམས་ལོ་ན་གཞོན་པའི་དུས་ནས་ད་ལྟའི་བར་དུ། རང་ཅག་གི་མེས་པོས་ངལ་རྩོལ་བྱས་ནས་ཐོབ་པ་དང་། ཁོང་རྣམས་ཀྱི་བ་ཁྱུ་དང་ལུག་ཁྱུ། བུ་དང་བུ་མོ་བཅས་ཐམས་ཅད་ལྷ་ཁྲེལ་མེད་དག་གིས་མེད་པར་བཟོས།
[25] རང་ཅག་དང་རང་ཅག་གི་མེས་པོ་རྣམས་ཀྱིས་ང་ཚོའི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཤིང་། རང་ཅག་གིས་ལོ་ན་གཞོན་པའི་དུས་ནས་ད་ལྟའི་བར་དུ་ང་ཚོའི་དཀོན་མཆོག་ཡ་ཝཱེའི་བཀའ་ལ་མ་ཉན་པས་ན། རང་ཅག་ངོ་ཚའི་ནང་དུ་ཉལ་ནས་ནོངས་པས་བདག་ཅག་འགེབས་པར་གྱུར་ཅིག