[1] གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་འཇོམས་བྱེད་ཀྱི་རླུང་ཞིག་སློང་བར་བྱ་སྟེ། པཱ་པིས་ལུན་དང་ལེ་ཀཱ་མཱེ་རུ་སྡོད་པའི་མི་རྣམས་ལ་རྒོལ་བར་བྱའོ། །
[2] ཡང་ངས་ཕྱི་ཕྱོགས་པ་ནི་པཱ་པིས་ལུན་དུ་མངགས་ནས། ཁོ་ཚོས་དེ་རླུང་ལ་འཕྱར་བ་དང་དེའི་ཡུལ་ཁམས་སྟོང་བར་བྱེད། ཡང་དེ་ལ་ཆག་སྒོ་འབྱུང་བའི་དུས་སུ། ཁོ་རྣམས་ཀྱིས་དེ་ལ་ཕྱོགས་བཞི་ནས་རྒོལ་བར་འགྱུར།
[3] གཞུ་འཐེན་མཁན་ལ་གཞུ་འཐེན་དུ་མ་འཇུག་ཅིག དེ་ལ་ཁྲབ་རྨོག་གྱོན་དུ་མ་འཇུག་ཅིག པཱ་པིས་ལུན་གྱི་དར་མ་དག་ལ་སྙིང་རྗེ་མ་སྒོམས་ཤིག དེའི་དམག་དཔུང་ནི་རྩ་ནས་མེད་པར་བཟོས་ཤིག
[4] དེ་དག་ཀལ་དི་པའི་ཡུལ་དུ་བསད་ནས་འགྱེལ་བར་འགྱུར་ཞིང་། པཱ་པིས་ལུན་གྱི་སྲང་ལམ་དུ་བསྣུན་པར་འགྱུར་ཞེས་གསུངས།
[5] ཡེས་ར་ཨེལ་དང་ཡ་ཧུ་དཱའི་ཡུལ་ཁམས་སུ་ཡེས་ར་ཨེལ་གྱི་དམ་པ་ཉིད་ལ་རྒྱབ་འགལ་བྱས་པའི་སྡིག་པ་ཡིས་བཀང་ན་ཡང་། དེའི་དཀོན་མཆོག་སྟེ་དཔུང་ཚོགས་ཀྱི་ཡ་ཝཱེས་དེ་ནི་མ་དོར་རོ། །
[6] ཁྱོད་རྣམས་པཱ་པིས་ལུན་དང་བྲལ་ནས་ཕྲོས་ཤིག་དང་། རེ་རེས་རང་གི་སྲོག་སྐྱོབས་ཤིག དེའི་སྡིག་པ་ནང་དུ་ལྷུང་ནས་མཉམ་དུ་འཆི་བར་མ་འགྱུར་ཞིག གང་ལ་ཞེ་ན། འདི་ནི་གཙོ་བོ་ཡ་ཝཱེས་འཁོན་ལན་སློག་པའི་དུས་ཏེ། ཁོང་གིས་པཱ་པིས་ལུན་གྱི་ཕྱོགས་སུ་ལན་གཞལ་ངེས་ཡིན།
[7] པཱ་པིས་ལུན་ནི་སྔར་ནས་གཙོ་བོ་ཡ་ཝཱེའི་ཕྱག་གི་གསེར་ཕོར་ཅིག་ཡིན་ཏེ། དེས་ས་གཞི་ཚང་མ་བཟི་བར་བྱས། མི་རྒྱུད་རྣམས་ཀྱིས་དེའི་རྒུན་ཆང་འཐུངས་བས་སྨྱོས་པར་གྱུར་ཏེ།
[8] པཱ་པིས་ལུན་གློ་བུར་འགྱེལ་ནས་བཤིག་པར་གྱུར་ལ། དེའི་དོན་དུ་ངུ་འབོད་བྱོས་ཤིག དེའི་ཟུག་གཟེར་གྱི་ཕྱིར་སྤོས་དཀར་དྲངས་ཤིག་དང་། ཡང་ན་དེ་གསོ་བར་འགྱུར་ཡང་སྲིད།
[9] ངེད་ཀྱིས་པཱ་པིས་ལུན་གསོ་བར་འདོད་ནའང་དེའི་ནད་མ་སངས་བས། དེ་དང་འབྲལ་བར་གྱིས་ཤིག་དང་། བདག་ཅག་རང་རང་གི་ཡུལ་དུ་ལོག་པར་བྱའོ། །ཅི་ལ་ཟེར་ན། དེར་ཐེབས་པའི་ཉེས་ཆད་ནི་བར་སྣང་དུ་སླེབས་ཤིང་། ནམ་མཁའི་བར་དུའང་སླེབས་པའོ། །
[10] གཙོ་བོ་ཡ་ཝཱེས་རང་ཅག་གི་དྲང་བདེན་མངོན་པར་མཛད་པས། ཤོག་དང་། རང་ཅག་གིས་ཛ་ཡན་དུ་རང་རེའི་དཀོན་མཆོག་ཡ་ཝཱེའི་མཛད་རྗེས་འཆད་པར་བྱའོ། །
[11] ཁྱོད་རྣམས་ཀྱིས་མདའ་རྩེ་རྡོར་དང་། ཕུབ་རྣམས་དམ་དུ་ཟུངས་ཤིག པཱ་པིས་ལུན་གྱི་སྐོར་གླེང་ན། གཙོ་བོ་ཡ་ཝཱེས་དེ་ནི་མེད་པར་མཛད་ངེས་པས། མཱ་དཱ་ཨི་པའི་རྒྱལ་པོའི་སེམས་དཀྲུགས་སོ། །ཅི་ལ་ཟེར་ན། འདི་ནི་གཙོ་བོ་ཡ་ཝཱེའི་འཁོན་ལན་སློག་པའི་དུས་ཏེ། ཁོང་གི་མཆོད་ཁང་གི་དོན་དུ་ལན་འཇལ་བ་ཡིན་ནོ། །
[12] ཁྱོད་ཅག་གིས་དར་རྣམས་བསྒྲེངས་ཏེ་པཱ་པིས་ལུན་གྱི་མཁར་རྣམས་ལ་རྒོལ་ཞིག མེལ་ཚེ་བརྟན་པོ་བྱོས་ལ་སོ་པ་རྣམས་ཞོག་ཅིག འཇབ་ས་རྣམས་ཤོམས་ཤིག ཅིའི་ཕྱིར་ཞེ་ན། གཙོ་བོ་ཡ་ཝཱེས་པཱ་པིས་ལུན་གྱི་མི་སྡེའི་ཆེད་དུ་གསུངས་པ་ལྟར། ཁོང་གིས་དེ་བཞིན་དགོངས་པར་མ་ཟད་དེ་བཞིན་མཛད་པར་འགྱུར་རོ། །
[13] ཀྱེ་ཆུ་རྣམས་ཀྱི་སྟེང་དུ་སྡོད་ཅིང་གཏེར་མང་པོ་ཡོད་པ་ཁྱོད་ཀྱི་མཐའ་མར་སླེབས་ཏེ། ཁྱོད་ཀྱི་འདོད་རྔམ་གྱི་བྲེ་དེ་བཀང་ངོ་། །
[14] དཔུང་ཚོགས་ཀྱི་ཡ་ཝཱེས་རང་ཉིད་དཔང་དུ་བཙུགས་ནས་མནའ་བཞེས་ཏེ་འདི་སྐད་དུ། ངས་ཆ་ག་འབུ་ནི་ག་ས་གང་དུ་བཀང་བ་བཞིན་དགྲ་རྣམས་ཁྱོད་ཀྱི་ཡུལ་ཁམས་སུ་ཁྱབ་པར་བྱ་སྟེ། དེ་དག་གིས་ངར་སྐད་སྒྲོག་བཞིན་ཁྱོད་ལ་རྒོལ་བར་འགྱུར་རོ་ཞེས་གསུངས་སོ། །
[15] གཙོ་བོ་ཡ་ཝཱེས་ནུས་མཐུ་ཡིས་ས་གཞི་བཀོད་དེ། ཤེས་རབ་ཀྱིས་འཇིག་རྟེན་མཛད་པ་དང་། མཁྱེན་རབ་ཀྱིས་ནམ་མཁའི་དབྱིངས་རྣམས་བཏིངས།
[16] ཁོང་གིས་གསུང་སྐད་འདོན་དུས་ནམ་མཁའ་རུ་ཆུ་རྣམས་འཕྱུར་ཅིང་། ཁོང་གིས་སྤྲིན་དང་སྨུག་པ་ས་མཐའ་ནས་ཡར་ལྡིང་བར་མཛད་དེ། ཆར་པ་དང་ཆབས་ཅིག་གློག་དམར་འཁྱུག་པར་མཛད་པ་དང་། ཡང་ཉིད་ཀྱི་གཏེར་མཛོད་ལས་རླུང་ལྡང་བར་མཛད་དོ། །
[17] མི་རེ་རེ་དུད་འགྲོ་དང་འདྲ་ཞིང་ཤེས་བྱ་མེད་པ་དང་། དངུལ་མགར་རྣམས་ནི་རང་རང་གི་སྐུ་འདྲའི་རྐྱེན་གྱིས་ངོ་ཚའོ། །དེས་བླུགས་པའི་སྐུ་འདྲ་ནི་རྫུས་མ་ཡིན་ལ། དེ་དག་གི་ནང་དུ་དབུགས་ཀྱང་མེད་པས་སོ། །
[18] དེ་དག་ནི་སྟོང་བ་ཉིད་དང་མི་ལ་མགོ་སྐོར་གཏོང་བའི་རྫས་ཡིན་ཏེ། ཉེས་ཆད་གཅོད་དུས་སུ་དེ་དག་མེད་པར་འགྱུར་རོ། །
[19] ཡང་ཡ་ཀོབ་ཀྱི་ཐོབ་སྐལ་ནི་དེ་འདྲ་མིན་ཏེ། ཅིའི་ཕྱིར་ཞེ་ན། གཙོ་བོ་ཁོང་ནི་ཐམས་ཅད་མཛད་མཁན་དང་། ཡེས་ར་ཨེལ་ཡང་ཁོང་གི་ནོར་སྐལ་གྱི་ཡན་ལག་ཅིག་ཡིན་པ་སྟེ། ཁོང་གི་མཚན་ནི་དཔུང་ཚོགས་ཀྱི་ཡ་ཝཱེ་ལགས་སོ། །
[20] ཁྱོད་ནི་ངའི་རྒྱག་བྱེད་ཀྱི་སྟ་རེ་དང་འཐབ་མོའི་མཚོན་ཆ་ཡིན་ཏེ། ངས་ཁྱོད་བརྒྱུད་ནས་མི་སྡེ་རྣམས་དུམ་བུར་གཏུབ་ཅིང་། རྒྱལ་ཁམས་རྣམས་མེད་པར་བྱའོ། །
[21] ངས་ཁྱོད་བརྒྱུད་ནས་རྟ་དང་སྐྱ་མི་གཉིས་པོ་དུམ་བུར་གཏུབ་ཅིང་། ཤིང་རྟ་དང་དེའི་ནང་དུ་སྡོད་མཁན་གཉིས་ཀ་དུམ་བུར་གཏུབ་པར་བྱའོ། །
[22] ངས་ཁྱོད་བརྒྱུད་ནས་སྐྱེས་པ་དང་བུད་མེད་གཉིས་ཀ་དུམ་བུར་གཏུབ་ཅིང་། རྒན་པ་དང་ན་གཞོན་གཉིས་ཀ་དུམ་བུར་གཏུབ་པ་དང་། དར་མ་དང་ན་ཆུང་གཉིས་པོའང་གཏུབ་པར་བྱའོ། །
[23] ངས་ཁྱོད་བརྒྱུད་ནས་རྫི་བོ་དང་དེའི་ཕྱུགས་ཁྱུ་དུམ་བུར་གཏུབ་ཅིང་། ཞིང་པ་དང་དེའི་རྨོན་གླང་དུམ་བུར་གཏུབ་པ་དང་། བཀའ་བློན་དང་བློན་པོ་རྣམས་ཀྱང་དུམ་བུར་གཏུབ་པར་བྱའོ། །
[24] པཱ་པིས་ལུན་དང་ཀལ་དི་པའི་མི་རྒྱུད་ཀྱིས་ཛ་ཡན་དུ་སྤྱད་པའི་ངན་སྤྱོད་ཀྱི་ཕྱིར་དུ། ངས་ཁྱོད་ཚོའི་མིག་མདུན་དུ་དེ་དག་ལ་འཁོན་ལན་སློག་པར་བྱའོ་ཞེས་གཙོ་བོ་ཡ་ཝཱེས་གསུངས་སོ། །
[25] ཀྱེ་ཚར་གཅོད་བྱེད་པའི་རི་བོ། ས་གཞི་ཐམས་ཅད་རྩ་མེད་གཏོང་བའི་རི་བོ། ལྟོས་ཤིག ངས་ཁྱོད་ནི་དགྲ་རུ་བཟུང་སྟེ། ངས་ཁྱོད་ཀྱི་སྟེང་དུ་རང་གི་ལག་པ་བརྐྱངས་ཏེ་རྒོལ་བར་འགྱུར་ལ། བྲག་རྣམས་ལས་ཁྱོད་བསྒྲིལ་བར་བཅུག་ནས། ཁྱོད་ནི་མེས་བསྲེགས་པའི་རི་བོར་བྱའོ། །
[26] དེ་ནས་མི་ཡིས་ཁང་པའི་གྲུ་རྡོ་བྱེད་དུ་ཁྱོད་ལས་མི་ལེན་པ་དང་། རྨང་རྡོ་ཡང་ཁྱོད་ལས་མི་ལེན་ནོ། །གང་ལ་ཞེ་ན། ཁྱོད་ནི་དུས་རྟག་ཏུ་སྟོངས་ནས་ལུས་པར་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་གསུངས་སོ། །
[27] ཁྱོད་ཅག་གིས་ཡུལ་ཁམས་ནང་དུ་དར་རྣམས་བསྒྲེངས་ཏེ། མི་རྒྱུད་ནང་དུ་རྒྱ་དུང་བུས་ཤིག མི་རྒྱུད་རྣམས་ཀྱིས་པཱ་པིས་ལུན་ལ་འཐབ་པར་གྲ་སྒྲིག་བྱོས་ཤིག ཡང་ཨ་ར་རད་དང་མིན་ནི་དང་། ཨ་ཤ་ཀེ་ནཱ་ཡི་རྒྱལ་སྲིད་རྣམས་བསྡུས་ཏེ་དམག་དཔོན་མངགས་ནས་དེར་རྒོལ་དུ་ཆུགས་དང་། ཡང་ཆ་ག་འབུ་བཞིན་དུ་རྟ་རྣམས་དྲངས་ནས།
[28] མི་སྡེ་རྣམས་དང་མཱ་དཱ་ཨི་པའི་རྒྱལ་པོ་དང་། བཀའ་བློན་དང་བློན་པོ་རྣམས་དང་། དེ་དག་གིས་བཟུང་བའི་ཡུལ་ཁམས་ཐམས་ཅད་ཀྱིས་དེ་ལ་རྒོལ་བར་རྩོམ་དགོས།
[29] དེ་ནས་ས་གཞི་འདར་ཞིང་ནུར་བའོ། །ཅིའི་ཕྱིར་ཞེ་ན། པཱ་པིས་ལུན་ནང་དུ་མི་གཅིག་ཀྱང་མི་གནས་པ་དང་སྟོངས་པར་མཛད་དུ་གཙོ་བོ་ཡ་ཝཱེའི་དགོངས་པ་རྣམས་གཏན་ལ་ཕབ་པས་སོ། །
[30] པཱ་པིས་ལུན་གྱི་དཔའ་བོ་རྣམས་ཀྱིས་དམག་འཁྲུག་མཚམས་བཞག་སྟེ་བཙན་རྫོང་ནང་དུ་སྦས་པ་དང་། དེ་དག་གི་སྟོབས་ཤུགས་ཉམས་ཏེ་བུད་མེད་ལྟ་བུར་གྱུར་ཏོ། །ཡང་པཱ་པིས་ལུན་གྱི་སྡོད་གནས་དག་མེས་བསྲེགས་ཤིང་སྒོ་གཏན་རྣམས་བཅགས་སོ། །
[31] པཱ་པིས་ལུན་གྱི་རྒྱལ་པོ་ལ། ཁྱེད་ཀྱི་གྲོང་ཁྱེར་གྱི་ཕྱོགས་བཞི་བོ་བླངས་ཤིང་། རབ་ཁ་རྣམས་བཙན་བཟུང་བྱས་ཏེ་འདམ་གཞུང་རྣམས་མེས་བསྲེགས་པ་དང་། དམག་རྣམས་ཀྱང་འཇིགས་པར་གྱུར་ཏོ་ཞེས་ཞུ་བའི་བརྡ་གཏོང་མཁན་རྣམས་ཕན་ཚུན་གདོང་ཐུག་རྒྱག་པ་དང་། འཕྲིན་འཁྱེར་མཁན་རྣམས་ཀྱང་ཕན་ཚུན་འཕྲད་དོ། །
[33] དཔུང་ཚོགས་ཀྱི་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། པཱ་པིས་ལུན་གྲོང་ཁྱེར་ནི་ཚར་མ་རྡུང་སའི་གཡུལ་ཁ་དང་མཚུངས་ཏེ། ཅང་མི་འགོར་བར་དེ་བསྡུ་བའི་སྐབས་ལ་བསླེབ་པར་འགྱུར་རོ་ཞེས་གསུངས།
[34] ཡེས་ར་ཨེལ་པ་རྣམས་ཀྱིས་འདི་ལྟར། པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ང་རང་ཁྱུར་མིད་དུ་བཏང་ནས་ང་རང་མགོ་རྙོག་ཏུ་བཅུག་པ་དང་། ང་རང་སྣོད་སྟོང་དུ་འགྱུར་བར་བྱས། ཁོ་ནི་ཉ་ཆེན་ཞིག་དང་འདྲ་བར་ང་ཁྱུར་མིད་བཏང་ཞིང་། ང་ནི་ཟས་མཆོག་བཞིན་ཁོང་གི་ཁོག་པར་བཀང་བར་བཅུག་སྟེ། ཡང་ང་རང་བསྐྲད་པ་ཡིན་ནོ་ཞེས་སྨྲའོ། །
[35] ཡང་ཛ་ཡན་གྱི་མི་སྡེ་ཡིས་འདི་ལྟར། ང་དང་ངའི་ཤ་ཁྲག་གིས་མྱངས་པའི་གདུག་རྩུབ་དེ་ཕྱིར་པཱ་པིས་ལུན་གྱི་སྟེང་དུ་འབབ་པར་ཤོག་ཅེས་སྨྲ་བར་འགྱུར་ཞིང་། ཡེ་རུ་སཱ་ལེམ་གྱི་མི་རྣམས་ཀྱིས་འདི་ལྟར། ངེད་རྣམས་ལས་བཞུར་བའི་ཁྲག་ནི་ཕྱིར་ཀལ་དི་པའི་སྟེང་དུ་ལོག་གྱུར་ཅིག་ཅེས་སྨྲ་བར་འགྱུར་རོ། །
[36] དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ཀྱི་དོན་དུ་དཀར་འདོན་པ་དང་། ཁྱོད་ཀྱི་དོན་དུ་འཁོན་ལན་སློག་པར་བྱ་སྟེ། ངས་པཱ་པིས་ལུན་གྱི་རྒྱ་མཚོ་སྐམ་པར་བྱེད་ཅིང་། དེའི་ཆུ་མགོ་ཡང་སྐམ་པར་བྱའོ། །
[37] པཱ་པིས་ལུན་ནི་གྱང་རོ་དང་ཁྱི་སྤྱང་གི་ཚང་དུ་གྱུར་ནས། འཇིགས་སུ་རུང་བ་དང་འཕྱ་དགོད་བྱེད་ཡུལ་དུ་འགྱུར་ཞིང་སྡོད་མཁན་གཅིག་ཀྱང་མེད་དོ། །
[38] དེ་དག་གིས་སེང་གེ་དར་མ་བཞིན་ངར་སྐད་སྒྲོག་ཅིང་། སེང་ཕྲུག་ལྟར་ང་རོ་འདོན་པ་ཡིན།
[39] དེ་དག་ལ་ཟ་འདོད་ཆེ་བའི་དུས་སུ། ངས་དེ་དག་ལ་གསོལ་སྟོན་བཤམས་ནས་ཁོ་ཚོ་བཟི་རུ་བཅུག་སྟེ་དགའ་བར་བྱེད་པ་དང་། དེ་དག་ལ་དུས་གཏན་དུ་གཉིད་འཐིབས་ནས་མི་སད་དོ་ཞེས་གཙོ་བོ་ཡ་ཝཱེས་འདི་སྐད་གསུངས།
[40] ངས་དེ་དག་ནི་ལུ་གུ་བཞིན་དང་། ལུག་ཐུག་དང་ར་ཐུག་ལྟར་བཤས་རར་ཤན་པའི་དྲུང་དུ་འཁྲིད་པར་བྱའོ། །
[41] ཤེ་ཤག་ནི་ཅི་ལྟར་རྒོལ་ནས་བླངས་པ་ཡིན་ནམ། ས་གཞི་ཡོངས་ཀྱིས་བསྟོད་པ་དེ་ཅི་ལྟར་བཙན་བཟུང་བྱས་པ་ཡིན་ནམ། མི་རིགས་རྣམས་ཀྱི་ཁྲོད་དུ་པཱ་པིས་ལུན་ནི་ཅི་ལྟར་ས་སྟོང་དུ་གྱུར་པ་ཡིན་ནམ།
[42] རྒྱ་མཚོ་འཕྱུར་ནས་པཱ་པིས་ལུན་བསྣུབས་ཏེ། འཕྱུར་བའི་རྦ་རླབས་ཀྱིས་དེ་འགེབ་པར་འགྱུར།
[43] དེའི་གྲོང་ཁྱེར་ནི་ས་སྟོང་དང་སྐམ་ས། བྱེ་ཐང་བཅས་སུ་གྱུར་ཏེ། སྡོད་མཁན་གཅིག་ཀྱང་མེད་ལ་དེ་བརྒྱུད་ནས་འགྲོ་མཁན་ཡང་མེད་པའི་གནས་སུ་འགྱུར་རོ། །
[44] ངས་པཱ་པིས་ལུན་གྱི་པེལ་ལ་ཆད་པ་གཅོད་ཅིང་། དེས་ཁྱུར་མིད་བཏང་བ་རྣམས་ཁ་ནས་སྐྱུག་པར་བྱ་སྟེ། ཕྱིན་ཆད་མི་སྡེ་རྣམས་དེའི་མདུན་དུ་ཕྱོགས་པར་མི་བྱ་ལ། པཱ་པིས་ལུན་གྱི་མཁར་རྣམས་ཀྱང་ལོག་པར་འགྱུར་རོ། །
[45] ཀྱེ་ངའི་མི་སྡེ་ལགས། ཁྱོད་རྣམས་པཱ་པིས་ལུན་དང་འབྲལ་བར་གྱིས་ཤིག མི་རེ་རེ་སྲོག་ཐར་བར་བྲོས་ནས་གཙོ་བོ་ཡ་ཝཱེའི་ཐུགས་ཁྲོ་དྲག་པོ་ལ་གཡོལ་བར་གྱིས་ཤིག
[46] ཡུལ་ཁམས་སུ་ཐོས་པའི་སྐད་ཆའི་ཕྱིར་དུ་ཁྱོད་ཅག་མ་ཞུམ་མ་འཇིགས་ཤིག གང་ལ་ཞེ་ན། ལོ་འདིའི་ནང་དུ་སྐད་ཆ་ཞིག་དང་། ལོ་རྗེས་མ་ཡང་སྐད་ཆ་གཞན་ཞིག་ཐོས་འོང་སྟེ། ཡུལ་ཁམས་སུ་དྲག་ཤུགས་འབྱུང་བ་དང་འགོ་དཔོན་གྱིས་འགོ་དཔོན་ལ་རྒོལ་བར་འགྱུར།
[47] དེ་བས་ན་ལྟོས་ཤིག དུས་དེ་བསླེབ་ལ་ཉེ། ངས་པཱ་པིས་ལུན་གྱི་བརྐོས་སྐུ་ལ་ཉེས་ཆད་གཅོད་པར་འགྱུར་ཏེ། དེའི་ཡུལ་ཁམས་ཡོངས་ངོ་ཚ་བར་འགྱུར་ལ། དེའི་བསད་པའི་མི་རྣམས་ནི་དེའི་དབུས་སུ་འགྱེལ་བར་འགྱུར།
[48] དུས་དེར། ནམ་མཁའ་དང་ས་གཞི་དང་དེའི་ནང་ཡོད་པ་ཀུན་གྱིས་པཱ་པིས་ལུན་གྱི་རྐྱེན་གྱིས་དགའ་འབོད་བྱེད་འོང་སྟེ། གང་ལ་ཞེ་ན། གཏོར་བརླག་བྱེད་མཁན་ནི་བྱང་ཕྱོགས་ཡུལ་ནས་དེར་འོང་བར་འགྱུར་ཞེས་གཙོ་བོ་ཡ་ཝཱེས་འདི་སྐད་གསུངས།
[49] སྔར་པཱ་པིས་ལུན་གྱིས་ཇི་ལྟར་ཡེས་ར་ཨེལ་གྱི་བསད་པའི་མི་རྣམས་འགྱེལ་བར་བྱས་ན། དེའི་ཡུལ་ཁམས་ཡོངས་ཀྱི་བསད་པའི་མི་ཐམས་ཅད་ཀྱང་དེ་དང་དེ་བཞིན་པཱ་པིས་ལུན་དུ་འགྱེལ་བར་འགྱུར་རོ། །
[50] རལ་གྲི་ལས་གཡོལ་བ་ཁྱོད་རྣམས་མྱུར་དུ་སོང་ཞིག་དང་། ལངས་ནས་མ་སྡོད་ཅིག རྒྱང་རིང་ཡུལ་ནས་གཙོ་བོ་ཡ་ཝཱེ་དྲན་པར་གྱིས། སེམས་སུ་ཡེ་རུ་སཱ་ལེམ་དྲན་གསོ་བྱོས་ཤིག
[51] ངེད་ཅག་གིས་ངན་སྨྲས་ཐོས་པས་ངོ་ཚ་བ་དང་། གདོང་དུ་ངོ་ཚ་ཡིས་བཀང་བ་སྟེ། གང་ལ་ཞེ་ན། ཕྱི་ཕྱོགས་པ་རྣམས་གཙོ་བོ་ཡ་ཝཱེའི་མཆོད་ཁང་གི་གནས་དམ་པར་ཕྱིན་པས་སོ། །
[52] དེ་བས་ན་ལྟོས་ཤིག དུས་དེ་བསླེབ་ལ་ཉེ། ངས་པཱ་པིས་ལུན་གྱི་བརྐོས་སྐུ་ལ་ཉེས་ཆད་གཅོད་པར་འགྱུར་ཏེ། ཡུལ་ཁམས་ཡོངས་སུ་སྣད་པར་གྱུར་བའི་མི་ཡིས་འཁུན་སྒྲ་འདོན་པར་འགྱུར་ཞེས་གཙོ་བོ་ཡ་ཝཱེས་འདི་སྐད་གསུངས།
[53] པཱ་པིས་ལུན་ནི་ནམ་མཁའ་རུ་འཛེགས་པ་དང་། དེས་རང་གི་མཐོ་ས་རྣམས་བརྟན་པོར་བྱས་ན་ཡང་། ངས་འཇིག་བྱེད་རྣམས་མངགས་ནས་དེར་འགྲོ་བར་བྱའོ་ཞེས་གཙོ་བོ་ཡ་ཝཱེས་གསུངས་སོ། །
[54] པཱ་པིས་ལུན་ནས་ངུ་སྐད་ཅིག་ཐོན་ཏེ། ཀལ་དི་པའི་ཡུལ་ནས་འཇིག་པ་ཆེན་པོ་ཞིག་ཐོན།
[55] གཙོ་བོ་ཡ་ཝཱེས་པཱ་པིས་ལུན་ནི་དབེན་སྟོང་དུ་མཛད་ཅིང་། དེའི་ནང་གི་ཅ་ཅོའི་སྒྲ་རྣམས་མེད་པར་མཛད་པས། དགྲ་ཟླས་ཆུ་རྣམས་བཞིན་དུ་རྦ་རླབས་འཕྱུར་ཏེ་ཅ་ཅོ་བསྒྲག་འོང་།
[56] འདི་ནི་འཇོམས་མཁན་རྣམས་པཱ་པིས་ལུན་གྱི་སྟེང་དུ་བབས་ཏེ། པཱ་པིས་ལུན་གྱི་དཔའ་པོ་རྣམས་བཟུང་ནས་དེ་དག་གི་གཞུ་རྣམས་དུམ་བུར་བཅག་གོ །ཅི་ལ་ཟེར་ན། གཙོ་བོ་ཡ་ཝཱེ་ནི་འཁོན་ལན་སློག་པའི་དཀོན་མཆོག་ལགས་པས། ཁོང་གིས་ངེས་པར་དུ་འཁོན་ལན་སློག་པའོ། །
[57] ཡང་ངས་པཱ་པིས་ལུན་གྱི་འགོ་དཔོན་དང་མཁས་པ། བཀའ་བློན། བློན་པོ། དཔའ་བོ་བཅས་ཐམས་ཅད་བཟི་རུ་བཅུག་སྟེ། ཁོ་རྣམས་ལ་དུས་གཏན་དུ་གཉིད་འཐིབས་ནས་སད་པར་མི་འགྱུར་ཞེས་དཔུང་ཚོགས་ཀྱི་ཡ་ཝཱེའི་མཚན་མངའ་བའི་རྒྱལ་པོས་གསུངས་སོ། །
[58] དཔུང་ཚོགས་ཀྱི་ཡ་ཝཱེས་འདི་སྐད་དུ། པཱ་པིས་ལུན་གྱི་ཡངས་ཤིང་རྒྱ་ཆེ་བའི་མཁར་རྣམས་ནི་རྩ་ནས་ལོག་ཅིང་། དེའི་མཁར་སྒོ་མཐོན་པོ་རྣམས་མེས་བསྲེག་པར་འགྱུར། མི་སྡེས་དཀའ་ལས་ཆེན་པོ་མྱངས་པ་དོན་མེད་དུ་འགྱུར་ཞིང་། མི་སྡེ་རྣམས་ཀྱིས་དཀའ་ལས་བྱེད་པ་རྣམས་མེས་བསྲེག་པར་འགྱུར་བས། དེ་དག་ཉམ་ཐག་པའོ། །
[59] ཡ་ཧུ་དཱའི་རྒྱལ་པོ་ཚིད་ཀི་ཡཱས་སྲིད་སྐྱོང་བའི་ལོ་བཞི་པར། མ་སེ་ཡཱའི་ཚ་བོའམ་ནེར་ཡཱའི་བུ་སེ་ར་ཡཱ་ནི་རྒྱལ་པོ་དང་མཉམ་དུ་པཱ་པིས་ལུན་དུ་སོང་བ་སྟེ། སེ་ར་ཡཱ་ནི་རྒྱལ་པོའི་ཕོ་བྲང་གི་བློན་ཆེན་ཡིན་ནོ། །ལུང་སྟོན་པ་ཡེ་རེམ་ཡཱ་ཡིས་དེ་ལ་བཀའ་བསྒོས་པ་སྟེ།
[60] དེའང་ཡེ་རེམ་ཡཱ་ཡིས་པཱ་པིས་ལུན་གྱི་སྟེང་དུ་འབྱུང་བར་འགྱུར་བའི་ཆག་སྒོ་ཐམས་ཅད་དེ། པཱ་པིས་ལུན་གྱི་སྐོར་དུ་བྲིས་པའི་གསུང་འདི་དག་གླེགས་བམ་ནང་དུ་བཀོད་པ་རེད།
[61] ཡེ་རེམ་ཡཱ་ཡིས་སེ་ར་ཡཱ་ལ་འདི་ལྟར། ཁྱེད་རང་པཱ་པིས་ལུན་དུ་སླེབས་དུས་གླེགས་བམ་འདི་སྟེང་གི་བཀའ་རྣམས་བཀླག་པར་མཛོད་ཅིག
[62] ཡང་ཁྱེད་ཀྱིས་འདི་ལྟར། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་གནས་འདིའི་སྐོར་ལ་འདི་རུ་མི་དང་དུད་འགྲོ་གང་ཡང་མི་གནས་པར་དུས་རྒྱུན་དུ་སྟོང་བར་ལུས་པའི་ཕྱིར་གནས་འདི་མེད་པར་བྱའོ་ཞེས་གསུངས་པ་ཡིན་སྨྲོས་ཤིག
[63] ཁྱེད་ཀྱིས་མདོ་འདི་བཀླགས་ཚར་རྗེས་དེ་ལ་རྡོ་ཞིག་བཏགས་ནས་ཡུ་ཕ་རཱད་གཙང་པོའི་ནང་དུ་དབྱུགས་ནས་འདི་ལྟར།
[64] པཱ་པིས་ལུན་ནི་གཙོ་བོ་ཡ་ཝཱེས་དེ་སྟེང་དུ་དབབ་བར་འགྱུར་བའི་ཆག་སྒོ་ཡི་རྐྱེན་གྱིས་འདི་ལྟར་ནུབ་ནས་སླར་ལང་བར་མི་འགྱུར་ཏེ། མི་རྣམས་ཀྱང་ཉམ་ཐག་པར་འགྱུར་རོ་ཞེས་སྨྲོས་ཤིག་ཅེས་གསུངས་པ་དང་། ཡེ་རེམ་ཡཱ་ཡི་གསུང་རྣམས་འདི་ནས་རྫོགས་སོ། །