[1] ཡ་ཧུ་དཱའི་རྒྱལ་པོ་ཚིད་ཀི་ཡཱའི་སྲིད་ལོ་དགུ་པའི་ཟླ་དགུ་པར། པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དམག་དཔུང་ཐམས་ཅད་ཁྲིད་དེ་ཡེ་རུ་སཱ་ལེམ་ལ་རྒོལ་བར་འོངས་ནས་གྲོང་ཁྱེར་བསྐོར་བ་རེད།
[2] ཚིད་ཀི་ཡཱའི་སྲིད་ལོ་བཅུ་གཅིག་པའི་ཟླ་བཞི་པའི་ཚེས་དགུ་པར། གྲོང་ཁྱེར་དེ་བླངས་པའོ། །
[3] ཡེ་རུ་སཱ་ལེམ་ལེན་པའི་དུས་སུ། པཱ་པིས་ལུན་གྱི་རྒྱལ་པོའི་འགོ་དཔོན་རྣམས་ཏེ་ནེར་གལ་ཤར་ཨེ་ཟེར་དང་། སམ་གར་ནེ་བོ། བློན་ཆེན་སར་སེ་ཀེམ། དམག་དཔོན་ནེར་གལ་ཤར་ཨེ་ཟེར། དེ་མིན་པཱ་པིས་ལུན་གྱི་རྒྱལ་པོའི་འགོ་དཔོན་གཞན་ཐམས་ཅད་བཅས་པ་རྒྱ་སྒོ་བར་མ་རུ་བསྡད་དོ། །
[4] ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དམག་མི་ཐམས་ཅད་ཀྱིས་དེ་རྣམས་མཐོང་ནས། མཚན་མོའི་དུས་སུ་རྒྱལ་པོའི་སྐྱེད་ཚལ་དང་ཉེ་བའི་མཁར་གཉིས་ཀྱི་བར་སྒོ་ལས་ཕྱི་རུ་བྲོས་ཏེ་ཡཱ་ར་པཱ་རུ་སོང་ངོ་། །
[5] ཡིན་ནའང་ཀལ་དི་པའི་དམག་དཔུང་གིས་དེ་རྣམས་ཀྱི་རྗེས་དེད་ནས། ཡེ་རུ་ཀོ་ཡི་ཐང་དུ་ཚིད་ཀི་ཡཱའི་རྗེས་ཆོད་པ་དང་དེ་བཟུང་ནས་ཧ་མཱད་ཀྱི་གནས་རིབ་ལཱ་ཞེས་པར་པཱ་པིས་ལུན་རྒྱལ་པོ་ནེ་བོ་ཀད་ནེ་ཙར་གྱི་དྲུང་དུ་ཁྲིད་པ་དང་། ནེ་བོ་ཀད་ནེ་ཙར་གྱིས་དེ་ལ་ཉེས་ཆད་བཅད་དོ། །
[6] ཡང་པཱ་པིས་ལུན་གྱི་རྒྱལ་པོ་ཡིས་རིབ་ལཱ་ཡུལ་དུ་ཚིད་ཀི་ཡཱའི་མདུན་ནས་དེའི་བུ་རྣམས་བསད་ཅིང་། པཱ་པིས་ལུན་གྱི་རྒྱལ་པོས་ཡ་ཧུ་དཱའི་སྐུ་དྲག་ཐམས་ཅད་ཀྱང་བསད་པར་མ་ཟད།
[7] ཚིད་ཀི་ཡཱའི་མིག་ཟུང་བཏོན་ནས་ཁོ་པཱ་པིས་ལུན་དུ་འཁྲིད་ཕྱིར་ལི་ཡི་སྒྲོག་བརྒྱབ་པ་རེད།
[8] ཡང་ཀལ་དི་པ་རྣམས་ཀྱིས་རྒྱལ་པོའི་ཕོ་བྲང་དང་མི་སྡེའི་ཁང་པ་རྣམས་མེ་ཡིས་བསྲེགས་ཏེ། ཡེ་རུ་སཱ་ལེམ་གྱི་མཁར་རྣམས་ཀྱང་བཤིག་གོ །
[9] དུས་དེར། སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་གྲོང་ཁྱེར་ནང་དུ་ལུས་པའི་མི་སྡེ་དང་ཁོ་ལ་མགོ་སྒུར་མཁན་དང་། དེ་འཕྲོའི་མི་རྣམས་བཅས་པ་པཱ་པིས་ལུན་དུ་བཙོན་ལ་ཁྲིད་དོ། །
[10] ཡིན་ནའང་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་མི་སྡེ་ལས་ཅི་ཡང་མེད་པའི་དབུལ་པོ་དག་ནི་ཡ་ཧུ་དཱའི་ཡུལ་དུ་བསྐྱུར་ནས། མཚུངས་སུ་ཁོ་རྣམས་ལ་རྒུན་འབྲུམ་ར་བ་དང་ཞིང་ས་རྣམས་གནང་བ་རེད།
[11] པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡེ་རེམ་ཡཱའི་དོན་དུ། སྐུ་སྲུང་དམག་དཔོན་ནེ་བོ་ཟར་ཨ་དན་ལ་བཀའ་གནང་སྟེ་འདི་ལྟར།
[12] ཁྱོད་ཀྱིས་ཁོ་ཁྲིད་ནས་སོང་དང་། དེ་ལ་བདག་སྐྱོང་ལེགས་པོ་བྱས་ནས་གནོད་པ་བསྐྱལ་མི་རུང་། ཁོས་ཁྱོད་ལ་ཅི་ལྟར་ཞུས་ན་དེ་ལྟར་བྱོས་ཤིག་ཅེས་བསྒོས་པ་ན།
[13] སྐུ་སྲུང་དམག་དཔོན་ནེ་བོ་ཟར་ཨ་དན་དང་བློན་ཆེན་ནེ་བུ་ཤཱ་སི་བན། དམག་དཔོན་ནེར་གལ་ཤར་ཨེ་ཟེར། དེ་མིན་པཱ་པིས་ལུན་གྱི་རྒྱལ་པོའི་འགོ་དཔོན་ཀུན་གྱིས།
[14] མི་མངགས་ཏེ་སྐུ་སྲུང་གི་ཁྱམས་ར་ལས་ཡེ་རེམ་ཡཱ་ཁྲིད་འོངས་པ་དང་། ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱ་ལ་གཏད་ནས་དེའི་ཁྱིམ་ལ་འཁྲིད་དུ་བཅུག་པ་དང་། ཡེ་རེམ་ཡཱ་ཡང་མི་སྡེའི་ནང་དུ་བཞུགས་སོ། །
[15] ཡེ་རེམ་ཡཱ་ད་དུང་སྐུ་སྲུང་གི་ཁྱམས་རར་བཙན་བཟུང་བྱས་ཡོད་པའི་དུས་སུ། གཙོ་བོ་ཡ་ཝཱེའི་བཀའ་ནི་ཁོང་ལ་བྱུང་སྟེ་འདི་སྐད་དུ།
[16] ཁྱོད་སོང་ནས་གུ་ཤ་པ་ཨེ་བེད་མེ་ལེག་ལ་འདི་ལྟར་སྨྲོས་ཤིག དཔུང་ཚོགས་ཀྱི་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་ཆག་སྒོ་འབྱུང་བ་ལས་བྱིན་རླབས་མི་གནང་ཞེས་སྨྲས་པའི་གཏམ་ནི་གྲོང་ཁྱེར་འདི་ལ་འབྱུང་བར་འགྱུར་ཏེ། དུས་དེར་འདི་ཐམས་ཅད་ཁྱོད་ཀྱི་མདུན་དུ་དངོས་སུ་འབྱུང་བར་འགྱུར།
[17] ཡིན་ནའང་ཉིན་དེར་བསླེབ་དུས་ངས་ཁྱོད་རང་བསྐྱབ་པར་འགྱུར་ལ། ཁྱོད་ནི་རང་ཉིད་འཇིགས་པའི་ལག་ཏུ་མི་གཏོད།
[18] ངས་ཁྱོད་རང་བསྐྱབ་པར་འགྱུར་བས། ཁྱོད་ནི་རལ་གྲི་འོག་ཏུ་མི་འགྱེལ་བར་རང་སྲོག་ཐར་བར་འགྱུར་རོ། །གང་ལ་ཞེ་ན། ཁྱོད་རང་ང་ལ་བརྟེན་པས་ཡིན་ཞེས་པའོ་ཞེས་གཙོ་བོ་ཡ་ཝཱེས་གསུངས་པའོ། །