[1] ཚིད་ཀི་ཡཱ་རྒྱལ་པོ་བྱེད་དུས་ལོ་ཉེར་གཅིག་ལོན་ཡོད་དེ། ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས་པ་དང་། ཁོའི་ཡུམ་གྱི་མིང་ལ་ཧ་མུ་ཏལ་ཟེར་ཞིང་། མོ་ནི་ལིབ་ནཱ་པ་ཡེ་རེམ་ཡཱའི་བུ་མོ་ཡིན་ནོ། །
[2] ཚིད་ཀི་ཡཱ་ཡིས་ཡེ་ཧོ་ཡཱ་ཀིམ་གྱིས་སྤྱད་པ་བཞིན། གཙོ་བོ་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས།
[3] གཙོ་བོ་ཡ་ཝཱེའི་ཐུགས་ཁྲོ་ནི་ཡེ་རུ་སཱ་ལེམ་དང་ཡ་ཧུ་དཱའི་སྟེང་དུ་བབས་ཏེ། ཐ་ན་དེ་རྣམས་ཉིད་ཀྱི་དྲུང་ནས་བསྐྲད་ཅིང་། ཚིད་ཀི་ཡཱ་ཡིས་པཱ་པིས་ལུན་གྱི་རྒྱལ་པོར་རྒྱབ་འགལ་བྱས་སོ། །
[4] ཁོའི་སྲིད་ལོ་དགུ་པའི་ཟླ་བཅུ་པའི་ཚེས་བཅུ་ཉིན་ལ། པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དཔུང་ཚོགས་ཁྲིད་ནས་ཡེ་རུ་སཱ་ལེམ་ལ་རྒོལ་དུ་འོངས་ཏེ། མཁར་གྱི་ཕྱོགས་སུ་དམག་སྒར་བཙུགས་ནས། གྲོང་ཁྱེར་ལེན་དུ་ཕྱོགས་བཞི་རུ་བཙན་རྫོང་བརྩིགས།
[5] རྒྱལ་པོ་ཚིད་ཀི་ཡཱའི་སྲིད་ལོ་བཅུ་གཅིག་པའི་བར་དུ་རྒྱལ་ས་དམག་གིས་བསྐོར་ནས་བསྡད་པ་ལ།
[6] ཟླ་བཞི་པའི་ཚེས་དགུ་པར། གྲོང་ཁྱེར་ནང་གི་མུ་གེ་ནི་ཤིན་ཏུ་ཚབས་ཆེ་ཞིང་། གནས་དེའི་མི་སྡེ་ལ་ཁ་ཟས་ཅི་ཡང་མེད་པ་རེད།
[7] དེ་ནས་གྲོང་ཁྱེར་བླངས་པ་དང་། དམག་མི་རྣམས་མཚན་མོའི་དུས་སུ་རྒྱལ་པོའི་སྐྱེད་ཚལ་དང་ཉེ་བའི་མཁར་གཉིས་ཀྱི་བར་སྒོ་ནས་ཕྱི་རུ་བྲོས་ཤིང་། ཀལ་དི་པས་ཕྱོགས་བཞི་ནས་གྲོང་ཁྱེར་བསྐོར་བས་དེ་རྣམས་ཡཱ་ར་པཱ་རུ་བྲོས་སོ། །
[8] ཀལ་དི་པའི་དམག་དཔུང་གིས་རྒྱལ་པོ་ཚིད་ཀི་ཡཱའི་རྗེས་དེད་དེ། ཡེ་རུ་ཀོའི་ཐང་དུ་ཁོའི་རྗེས་ཆོད་པ་དང་། དེའི་དམག་དཔུང་རྣམས་ཁོ་དང་བྲལ་ནས་ཁ་ཐོར་ཏུ་སོང་།
[9] ཀལ་དི་པས་ཁོ་བཟུང་ནས་ཧ་མཱད་ཀྱི་གནས་རིབ་ལཱ་ཞེས་པར་པཱ་པིས་ལུན་རྒྱལ་པོ་ནེ་བོ་ཀད་ནེ་ཙར་གྱི་མདུན་དུ་ཁྲིད་པ་དང་། ནེ་བོ་ཀད་ནེ་ཙར་གྱིས་དེ་ལ་ཁྲིམས་ཐག་བཅད་དོ། །
[10] པཱ་པིས་ལུན་གྱི་རྒྱལ་པོ་ཡིས་ཚིད་ཀི་ཡཱའི་མདུན་དུ་ཁོའི་བུ་རྣམས་བསད་པ་དང་། ཡང་རིབ་ལཱ་རུ་ཡ་ཧུ་དཱའི་སྐུ་དྲག་ཐམས་ཅད་ཀྱང་བསད་དོ། །
[11] དེར་མ་ཟད་ཚིད་ཀི་ཡཱའི་མིག་གཉིས་པོའང་བཏོན་ནས། ལི་ཡི་སྒྲོག་བརྒྱབ་སྟེ་པཱ་པིས་ལུན་དུ་ཁྲིད་པ་དང་མ་འཆི་བར་དུ་བཙོན་ལ་བཅུག་གོ །
[12] པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་གྱི་སྲིད་ལོ་བཅུ་དགུ་པའི་ཟླ་ལྔ་པའི་ཚེས་བཅུ་ཉིན་ལ། པཱ་པིས་ལུན་གྱི་རྒྱལ་པོའི་དྲུང་དུ་སྐུ་སྲུང་བྱེད་པའི་ནེ་བོ་ཟར་ཨ་དན་བྱ་བ་ཡེ་རུ་སཱ་ལེམ་དུ་སོང་ནས།
[13] ཁོས་གཙོ་བོ་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་མེས་བསྲེགས་པ་དང་། ཡེ་རུ་སཱ་ལེམ་གྱི་ཁང་པ་རྣམས་ཏེ་སྐུ་དྲག་རྣམས་ཀྱི་ཁང་པའང་མེས་བསྲེགས་སོ། །
[14] ཡང་སྐུ་སྲུང་དམག་དཔོན་གྱི་རྗེས་འབྲང་པ་སྟེ་ཀལ་དི་པའི་དཔུང་ཚོགས་རྣམས་ཀྱིས་ཡེ་རུ་སཱ་ལེམ་གྱི་ཕྱོགས་བཞིའི་མཁར་རྣམས་བཤིགས་པ་དང་།
[15] དུས་དེར་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་མི་སྡེའི་དབུལ་པོ་དང་གྲོང་ཁྱེར་ནང་གི་ཤུལ་ལུས་རྣམས་དང་། པཱ་པིས་ལུན་གྱི་ཕྱོགས་སུ་མགོ་བསྒུར་བའི་མི་རྣམས། དེ་མིན་ད་དུང་ལག་ཤེས་པ་ལྷག་མ་རྣམས་བཅས་བཟུང་ནས་ཁྲིད་དོ། །
[16] ཡིན་ན་ཡང་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཡུལ་དེའི་དབུལ་པོ་དབུལ་རྐྱང་རྣམས་བསྐྱུར་ནས། དེ་རྣམས་ལ་རྒུན་འབྲུམ་ར་བ་ལེགས་བཅོས་བྱེད་པ་དང་། ཞིང་རྨོ་འདེབས་བྱེད་དུ་བཅུག
[17] གཙོ་བོ་ཡ་ཝཱེའི་མཆོད་ཁང་ནང་གི་ལི་ཡི་ཀ་བ་རྣམས་དང་སྟེགས་བུ་རྣམས་དང་། ལི་ཡི་རྒྱ་མཚོ་བཅས་ཀལ་དི་པས་བཅག་ནས། ལི་དེ་དག་པཱ་པིས་ལུན་དུ་བསྐྱལ།
[18] དེ་དག་གིས་སླ་ང་དང་མེ་ཁྱེམ། སྡོང་རས་གཅོད་བྱེད་སྐམ་ཆུང་། མཆོད་སྡེར། ཁེམ་བུ། དེ་མིན་མཆོད་ཁང་ནང་དུ་བཀོལ་བའི་ལི་ཡི་སྣོད་ཐམས་ཅད་དང་།
[19] ཡང་བུམ་པ་དང་མེ་ཕོར། ཕོར་བ། གཞོང་པ། སྒྲོན་སྟེགས། ཁེམ་བུ། སྐྱེམས་མཆོད་འབུལ་བྱེད་ཨུ་ཀུ་བཅས་གསེར་དངུལ་གང་ཡིན་གྱི་སྣོད་ཐམས་ཅད་སྐུ་སྲུང་དམག་དཔོན་གྱིས་ཁྱེར་སོང་ངོ་། །
[20] རྒྱལ་པོ་སོ་ལོ་མོན་གྱིས་གཙོ་བོ་ཡ་ཝཱེའི་མཆོད་ཁང་ནང་དུ་བཟོས་པའི་ཀ་བ་གཉིས་པོ་དང་། ལི་ཡི་རྒྱ་མཚོ་གཅིག་དང་། དེའི་ཞབས་རའི་འོག་ཏུ་ཡོད་པའི་ལི་ཡི་གླང་བཅུ་གཉིས་དང་བཅས་པ་ཐམས་ཅད་ཀྱི་ལི་ནི་གཞལ་དུ་མེད་པ་ཡིན་ཏེ།
[21] ཀ་བ་རེ་རེའི་མཐོ་ཚད་ལ་ཁྲུ་བཅོ་བརྒྱད་དང་། མཐུག་ཚད་ལ་སོར་བཞི་དང་། མུ་ཁྱུད་ལ་ཁྲུ་བཅུ་གཉིས་ཡིན་ལ། དཀྱིལ་ནི་སྟོང་པ་ཡིན་ནོ། །
[22] ཀ་བའི་སྟེང་དུ་ལི་ཡི་ཀ་གཞུ་ཡོད་ལ། ཀ་གཞུ་རེ་རེའི་མཐོ་ཚད་ནི་ཁྲུ་ལྔ་ཡིན་པ་དང་། ཀ་གཞུའི་མཐའ་རུ་ལི་ཡིས་གྲུབ་པའི་དྲ་བ་དང་སེ་འབྲུས་བརྒྱན་ཡོད་དེ། ཀ་བ་ཅིག་ཤོས་དེ་ཡང་དེ་དང་དེ་བཞིན་དུ་སེ་འབྲུས་བརྒྱན་ཡོད་དོ། །
[23] ཡང་ཀ་བའི་ཕྱོགས་བཞི་རུ་སེ་འབྲུ་དགུ་བཅུ་གོ་དྲུག་གིས་བརྒྱན་ཡོད་ལ། དེའི་ནི་དྲ་བའི་མཐའ་རུ་ཡོད་དེ། བསྡོམས་པས་སེ་འབྲུ་བརྒྱ་ཡོད་དོ། །
[24] སྐུ་སྲུང་དམག་དཔོན་གྱིས་མཆོད་དཔོན་ཆེན་པོ་སེ་ར་ཡཱ་དང་། མཆོད་དཔོན་གཉིས་པ་ཟེ་ཕན་ཡཱ་དང་། སྒོ་སྲུང་པ་མི་གསུམ་བཅས་བཙོན་དུ་ཁྲིད་པ་དང་།
[25] ཡང་གྲོང་ཁྱེར་ནས་དམག་མིའི་དཔོན་པོ་ཞིག་དང་། གྲོང་ཁྱེར་དུ་རྒྱལ་པོའི་དྲུང་གི་ཞབས་ཕྱི་པ་མི་བདུན་དང་། ཡུལ་མིའི་དམག་དཔོན་གྱི་དྲུང་ཡིག་བཅས་རྣམས་དང་། དེ་མིན་གྲོང་ཁྱེར་ནང་རྙེད་པའི་མི་སྡེ་ལས་སྐྱེས་པ་དྲུག་ཅུ་དང་བཅས་པའང་ཁྲིད།
[26] སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་མི་འདི་དག་རིབ་ལཱ་རུ་པཱ་པིས་ལུན་གྱི་རྒྱལ་པོའི་དྲུང་དུ་ཁྲིད་པ་ན།
[27] པཱ་པིས་ལུན་གྱི་རྒྱལ་པོས་ཧ་མཱད་ཡུལ་གྱི་རིབ་ལཱ་རུ་དེ་དག་བསད་དོ། །དེ་ལྟར་ཡ་ཧུ་དཱ་པ་རྣམས་རང་གི་ཡུལ་ཁམས་ནས་བཙོན་དུ་ཁྲིད་དོ། །
[28] ནེ་བོ་ཀད་ནེ་ཙར་གྱིས་བཙོན་དུ་ཁྲིད་པའི་མི་གྲངས་ནི་འདི་ལྟ་སྟེ། ཁོང་གིས་རྒྱལ་སྲིད་སྐྱོང་བའི་ལོ་བདུན་པར་ཡ་ཧུ་དཱ་པ་མི་སུམ་སྟོང་བརྒྱ་མེད་ཉེར་གསུམ་བཙོན་དུ་ཁྲིད།
[29] ནེ་བོ་ཀད་ནེ་ཙར་གྱི་སྲིད་ལོ་བཅོ་བརྒྱད་པར་ཡེ་རུ་སཱ་ལེམ་ནས་མི་བརྒྱད་བརྒྱ་དང་སུམ་ཅུ་སོ་གཉིས་བཙོན་དུ་ཁྲིད།
[30] ནེ་བོ་ཀད་ནེ་ཙར་གྱི་སྲིད་ལོ་ཉེར་གསུམ་པར་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཡ་ཧུ་དཱ་པ་རྣམས་ལས་མི་བདུན་བརྒྱ་དང་བཞི་བཅུ་ཞེ་ལྔ་བཙོན་དུ་ཁྲིད་དེ། བསྡོམས་པས་མི་བཞི་སྟོང་དྲུག་བརྒྱ་ཡོད་དོ། །
[31] ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་བཙོན་དུ་བཟུང་བའི་ལོ་སུམ་ཅུ་སོ་བདུན་པ་སྟེ། པཱ་པིས་ལུན་གྱི་རྒྱལ་པོ་ཨེ་ཝིལ་མེ་རོ་དག་བྱ་བ་རྒྱལ་པོར་བསྐོས་པའི་ལོ་དང་པོ་ཡི་ཟླ་བཅུ་གཉིས་པའི་ཚེས་ཉེར་ལྔའི་ཉིན། ཁོས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་གྱི་དབུ་འཕང་མཐོ་བར་བྱས་ཏེ་བཙོན་གྲོལ་བཏང་ནས།
[32] ཡང་ཁོ་ལ་བརྩེ་བའི་གཏམ་སྨྲས་ཤིང་། ཁོའི་གོ་ས་ནི་ཁོང་དང་མཉམ་དུ་པཱ་པིས་ལུན་དུ་བཙོན་ལ་ཁྲིད་པའི་རྒྱལ་པོ་རྣམས་ལས་མཐོ་བར་བྱས།
[33] ཡང་ཁོ་ལ་བཙོན་གོས་ཕུད་དུ་བཅུག་པ་དང་མི་ཚེ་གང་བོར་པཱ་པིས་ལུན་གྱི་རྒྱལ་པོའི་དྲུང་དུ་ཁ་ཟས་རོལ་བར་བཅུག
[34] པཱ་པིས་ལུན་གྱི་རྒྱལ་པོས་དེ་ལ་རྒྱུན་མཁོའི་ཁ་ཟས་གནང་སྟེ། ཉིན་རེ་བཞིན་ཚེ་གང་བོར་ཁོང་མ་འཆི་བར་དུ་དེ་ལྟར་བྱས་སོ། །