[1] ཡང་གཙོ་བོ་ཡ་ཝཱེས་ང་ལ་དོན་ཞིག་བསྟན་ཏེ། ངས་སྨིན་པར་གྱུར་བའི་ཤིང་ཏོག་སླེ་པོ་གཅིག་མཐོང་ཞིང་།
[2] ཁོང་གིས་ང་ལ་འདི་སྐད་དུ། ཀྱེ་ཨ་མའོ་སི། ཁྱོད་ཀྱིས་ཅི་མཐོང་ངམ་གསུངས་པ་དང་། ངས་སྨིན་པར་གྱུར་བའི་ཤིང་ཏོག་སླེ་པོ་གཅིག་མཐོང་ཞེས་ལན་ཞུས་པ་དང་། དེ་ནས་གཙོ་བོ་ཡ་ཝཱེས་ང་ལ་འདི་སྐད་དུ། ངའི་མི་སྡེ་ཡེས་ར་ཨེལ་གྱི་མཐའ་མའི་དུས་ཐོན་པས། ད་ཕྱིན་ཆད་ངས་དེ་དག་གུ་ཡངས་སུ་མི་གཏོང་ཞིང་།
[3] ཉིན་དེར་ཕོ་བྲང་ནང་གི་གླུ་དབྱངས་རྣམས་ངུ་འབོད་དུ་འགྱུར་ཏེ། གནས་ཀུན་ཏུ་རོ་མང་པོ་འདོར་ཅིང་། སྐད་རྒྱག་མཁན་སུའང་མེད་དོ་ཞེས་གཙོ་བོ་ཡ་ཝཱེས་གསུངས་སོ། །
[4] དབུལ་པོར་ཐུབ་ཚོད་གཏོང་བ་དང་རྒྱལ་ཁམས་ནང་གི་དཀའ་སྡུག་ཅན་ཉམས་པར་འཇུག་པ་ཁྱོད་ཅག་གིས་བཀའ་འདི་ལ་ཉོན་དང་།
[5] ཁྱོད་རྣམས་ཀྱིས་ན་རེ། ངེད་ཀྱིས་འབྲུ་རིགས་འཚོང་པའི་ཕྱིར་དུ་ཟླ་གསར་པ་ནམ་འདའ་འོང་། ཚོང་རའི་སྒོ་ཕྱེས་ཏེ་ལོ་ཏོག་འཚོང་བའི་ཕྱིར་དུ་ངལ་གསོ་བའི་དུས་ནམ་ཚར་རམ། ངེད་ཅག་གིས་དངོས་པོ་འཚོང་དུས་ཨེ་ཕཱ་ཇེ་ཆུང་དུ་བཏང་སྟེ། དངུལ་བསྡུ་དུས་རྒྱ་ཐུར་ཇེ་ལྗིད་དུ་བཏང་ནས་རྒྱ་སྲང་རྫུན་མས་མི་ལ་མགོ་སྐོར་བཏང་བ་དང་།
[6] ངེད་ཅག་གིས་དངུལ་གྱིས་དབུལ་པོ་ཉོ་བ་དང་། ལྷམ་ཆ་གཅིག་གིས་དཀའ་སྡུག་ཅན་བརྗེ་བའི་ཕྱིར་དུ། གྲོ་རུལ་བ་རྣམས་ཀྱང་མི་ལ་འཚོང་ཞེས་སྨྲས་སོ། །
[7] གཙོ་བོ་ཡ་ཝཱེས་ཡ་ཀོབ་ཀྱི་གཟི་བརྗིད་བསྟན་ཏེ་དབུ་མནའ་བཞེས་ཤིང་འདི་སྐད་དུ། དེ་དག་གི་བྱ་སྤྱོད་ཡོད་ཚད་ངས་ནམ་ཡང་བརྗེད་པར་མི་བྱའོ། །
[8] དེའི་རྐྱེན་གྱིས་ས་གཞི་འདར་བར་མི་འགྱུར་རམ། དེར་སྡོད་པའི་མི་རེ་རེ་ཡིས་མྱ་ངན་མི་བྱའམ། འོ་ན་དེ་ནི་ཉེ་ལོ་གཙང་པོ་བཞིན་དུ་རྒྱས་ཤིང་འཕྱུར་ལ། ཨེ་ཅིབ་གཙང་པོ་བཞིན་དུ་རྒྱས་ཤིང་འབབ་པར་འགྱུར།
[9] ཡང་ཉིན་མོ་དེར། ངས་ཉིན་གུང་གི་དུས་སུ་ཉི་མ་ནུབ་པར་འཇུག་ཅིང་། ཉི་མ་དཀར་པོ་ལ་ངས་ས་གཞི་མུན་ནག་ཏུ་བསྒྱུར་རོ། །
[10] ངས་ཁྱོད་ཀྱི་དུས་ཆེན་རྣམས་ཡིད་སྐྱོ་བའི་དུས་དང་། ཁྱོད་ཀྱི་གླུ་ཐམས་ཅད་སྐྱོ་གླུ་རུ་བསྒྱུར་ཅིང་། ངས་ཁྱོད་ཚོ་མི་རེ་རེའི་རྐེད་པར་སོ་ཐག་དཀྲི་བར་འགྱུར་ཅིང་། སྐྲ་རྣམས་བཞར་ཏེ། བུ་གཅིག་པོ་ཤོར་བ་བཞིན་དུ་ངས་ཁྱོད་རྣམས་ཡིད་སྐྱོ་བར་བསྒྱུར་ཅིང་། ནམ་ཡིན་ཡང་སྡུག་བསྔལ་བྱ་བར་འགྱུར་ཅེས་གཙོ་བོ་ཡ་ཝཱེས་གསུངས་སོ། །
[11] གཙོ་བོ་ཡ་ཝཱེས་འདི་སྐད་དུ། ལྟོས་ཤིག དུས་ཐོན་ལ་ཉེ་ཞིང་། ངས་ཡུལ་དུ་མུ་གེ་འབྱུང་བར་བྱ་སྟེ། མུ་གེ་འདི་ནི་བཟའ་ཆས་དཀོན་པའི་རྐྱེན་གྱིས་མ་ཡིན་པ་དང་། སྐོམ་པ་འདི་ཡང་ཆུ་མེད་པའི་རྐྱེན་གྱིས་མ་ཡིན་པར་ཡ་ཝཱེའི་བཀའ་ལ་མ་ཉན་པའི་ཕྱིར་དུ་ཡིན་ནོ། །
[12] དེ་ནས་ཡ་ཝཱེའི་བཀའ་འཚོལ་ཕྱིར་མི་རྣམས་ཡུལ་སོ་སོར་འཁྱམ་པར་འགྱུར་ཅིང་། རྒྱ་མཚོ་ནས་རྒྱ་མཚོ་དང་། བྱང་ཕྱོགས་ནས་ཤར་ཕྱོགས་བཅས་སུ་ཕར་རྒྱུག་ཚུར་རྒྱུག་བྱས་ཀྱང་རྙེད་པར་མི་འགྱུར་རོ། །
[13] དུས་དེར་བྱད་གཟུགས་མཛེས་པའི་ན་ཆུང་མ་དང་ན་གཞོན་རྣམས་ཁ་སྐོམ་པས་བརྒྱལ་བར་འགྱུར་ཅིང་།
[14] སཱ་མར་ཡའི་སྡིག་པ་དཔང་དུ་བཙུགས་ཏེ་མནའ་སྐྱེལ་བ་དང་། དཱན་གྱི་ལྷ་རྣམས་དཔང་དུ་བཙུགས་ཏེ་མནའ་སྐྱེལ་བ། ཡང་ན་པེར་ཤ་བཱའི་ལྷ་རྣམས་དཔང་དུ་བཙུགས་ཏེ་མནའ་སྐྱེལ་མཁན་རྣམས་འགྱེལ་བར་འགྱུར་ཅིང་ནམ་ཡང་སླར་ལང་བར་མི་འགྱུར་རོ་ཞེས་གསུངས་སོ། །