[1] ཀྱེ་ཡེས་ར་ཨེལ་གྱི་ཁྱིམ་རྒྱུད། ངས་ཁྱོད་ཀྱི་དོན་དུ་བརྩམས་པའི་སྐྱོ་གླུ་ལ་ཉོན་ཅིག
[2] བུ་མོ་གཙང་མ་དང་འདྲ་བའི་ཡེས་ར་ཨེལ་སར་འགྱེལ་ཏེ། སླར་ལང་བར་མི་འགྱུར་ཅིང་། མོ་རང་གི་ས་ནས་དོར་ཡང་། ཡར་སློང་མཁན་སུའང་མེད།
[3] དེ་ཅིའི་ཕྱིར་ཞེ་ན། གཙོ་བོ་ཡ་ཝཱེས་ཡེས་ར་ཨེལ་ཁྱིམ་རྒྱུད་ཀྱི་སྐོར་ལ་འདི་སྐད་དུ། ཡེས་ར་ཨེལ་མི་རྒྱུད་ཀྱི་གྲོང་ཁྱེར་ལས་དམག་ཆིག་སྟོང་མངགས་ཀྱང་བརྒྱ་མ་གཏོགས་མ་ལུས་ཤིང་། བརྒྱ་མངགས་པ་ལས་བཅུ་མ་གཏོགས་མ་ལུས་ཞེས་གསུངས་སོ། །
[4] ཡང་གཙོ་བོ་ཡ་ཝཱེས་ཡེས་ར་ཨེལ་གྱི་ཁྱིམ་རྒྱུད་ལ་འདི་སྐད་དུ་གསུངས་ཏེ། ང་ཚོལ་ཞིག་དང་ཁྱོད་གསོན་པར་འགྱུར་ཏེ།
[5] འོན་ཀྱང་པེད་ཨེལ་དུ་ང་མ་ཚོལ། གིལ་གལ་དུའང་མ་འགྲོ་སྟེ། པེར་ཤ་བཱ་རུ་ཕར་མ་འགྲོ་ཞིག ཅི་ལ་ཟེར་ན། གིལ་གལ་ལ་འཕྲོག་བཅོམ་ཐེབས་ཤིང་། པེད་ཨེལ་ནི་མེད་པར་འགྱུར་རོ། །
[6] ཀྱེ་ཡོ་སེབ་ཀྱི་ཁྱིམ་རྒྱུད་ལགས། གཙོ་བོ་ཡ་ཝཱེ་ཁོང་ནི་མེ་ལྟར་ཨེ་ཕཱར་ཡིམ་ནས་ཁྱབ་དྲག་སྟེ། དེ་དག་ཡོངས་རྫོགས་རྩ་མེད་དུ་བཏང་ནས་མི་སུས་ཀྱང་པེད་ཨེལ་གྱི་མེ་གསོད་ཐུབ་པ་མི་འབྱུང་བའི་ཕྱིར་དུ། གཙོ་བོ་ཡ་ཝཱེ་ཚོལ་དང་གསོན་པར་འགྱུར།
[7] དྲང་པོ་འཁན་པར་བསྒྱུར་ཞིང་། དྲང་བ་ཉིད་ས་ལ་འདོར་མཁན་ཁྱོད་རྣམས།
[8] དོམ་རྒན་སྐར་མ་དང་རྔོན་པའི་སྐར་མ་མཛད་མཁན་དང་། མུན་གྲིབ་ཐོ་རངས་སུ་སྒྱུར་མཁན་དང་། ཉིན་མོ་མཚན་དུ་མཛད་མཁན་དང་། ཡང་རྒྱ་མཚོར་བཀའ་བབས་ཏེ། རྒྱ་མཚོ་ས་ངོས་སུ་གཏོང་མཁན་ཁོང་གི་མཚན་ནི་ཡ་ཝཱེ་ལགས་སོ། །
[9] ཁོང་གིས་སྟོབས་ལྡན་རྣམས་གློ་བུར་ཉིད་ལ་མེད་པར་མཛད་པས། རྫོང་བཙན་པོ་ལ་རྐྱེན་ངན་ཐེབས་པར་གྱུར།
[10] མཁར་སྒོ་རུ་དྲང་བདེན་འཛིན་པའི་མི་ལ་ཁྱོད་རྣམས་སྡང་ཞིང་། བདེན་ཚིག་སྨྲ་མཁན་ལ་ཞེན་པ་ལོག
[11] ཁྱོད་ཅག་གིས་དབུལ་པོར་བརྙས་བཅོས་བྱས་ཤིང་། དེ་ལས་འབྲུ་རིགས་བཙན་གྱིས་བསྡུས་པས། ཁྱོད་ཅག་གིས་བརྡར་བའི་རྡོ་ཡིས་ཁང་པ་བསྐྲུན་ཡང་། དེའི་ནང་དུ་གནས་པར་མི་འགྱུར། ཁྱོད་ཅག་གིས་སྙིང་ལ་སྡུག་པའི་རྒུན་ཚལ་རྣམས་བཙུགས་ཀྱང་། དེ་ལས་ཐོན་པའི་རྒུན་ཆང་འཐུང་བར་མི་འགྱུར།
[12] དེ་ཅིའི་ཕྱིར་ཞེ་ན། ཁྱོད་ཀྱི་མི་ཚངས་པ་མང་ཞིང་། སྡིག་པ་ཤིན་ཏུ་ཆེ་བ་ངས་རྟོགས་ཏེ། ཁྱོད་ཅག་གིས་མི་དྲང་བདེན་ཅན་སྡུག་ལ་སྦྱར་ཅིང་། གསུག་བླངས་ཏེ་མཁར་སྒོ་རུ་དབུལ་ཕོངས་དག་ལ་མ་ཉེས་ཁ་གཡོགས་བྱས་པས།
[13] ཤེས་པའི་མི་ནི་ཁ་རོག་ཏུ་སྡོད་དེ། དེ་ཅིའི་ཕྱིར་ཞེ་ན། དུས་སྐབས་ངན་པའི་ཕྱིར་རོ། །
[14] ཁྱོད་རྣམས་ཀྱིས་བཟང་པོ་ཚོལ་དང་ངན་པ་མ་ཚོལ་ཞིག དེ་ལྟར་ཁྱོད་རྣམས་གསོན་པར་འགྱུར་ཅིང་། ཡང་ཁྱོད་ཅག་གིས་སྨྲས་པ་བཞིན་དུ་དཔུང་ཚོགས་ཀྱི་དཀོན་མཆོག་སྟེ་ཡ་ཝཱེ་ཁྱོད་ཅག་དང་མཉམ་དུ་བཞུགས་པར་བྱའོ། །
[15] ཁྱོད་རྣམས་བཟང་པོར་དགའ་ཞིང་། ངན་པར་སྡང་སྟེ་མཁར་སྒོ་རུ་དྲང་བདེན་སྤེལ་ཞིག དེ་ལྟར་བྱས་ན་དཔུང་ཚོགས་ཀྱི་དཀོན་མཆོག་ཡ་ཝཱེས་ཡོ་སེབ་ཀྱི་ལྷག་ལུས་རྣམས་ལ་བྱིན་རླབས་གནང་ཡང་སྲིད།
[16] དེ་བས་དཔུང་ཚོགས་ཀྱི་དཀོན་མཆོག་སྟེ་གཙོ་བོ་ཡ་ཝཱེས་འདི་སྐད་དུ། ཐང་ཆེན་ཀུན་ཏུ་ངུ་འབོད་བྱེད་པའི་སྒྲ་ཐོས་ཤིང་། སྲང་ལམ་རྣམས་སུ་སྐྱོ་བ་ལ་སྐྱོ་བ་ལ་ཞེས་བརྗོད་པར་འགྱུར་ཅིང་། ཡང་མི་ཡིས་འོ་དོད་བྱེད་དུ་ཞིང་པ་འབོད་ཅིང་། མྱ་ངན་བྱེད་དུ་སྐྱོ་གླུ་ལེན་མཁན་འབོད་པར་འགྱུར།
[17] རྒུན་ཚལ་ཀུན་ཏུ་ཡིད་གདུང་ངུ་འབོད་ཀྱི་སྐད་ཐོས་ཤིང་། དེ་ཅིའི་ཕྱིར་ཞེ་ན། ང་རང་ཁྱོད་ཚོའི་དཀྱིལ་ནས་རྒྱུ་བར་བྱའོ་ཞེས་གཙོ་བོ་ཡ་ཝཱེས་གསུངས་སོ། །
[18] གཙོ་བོ་ཡ་ཝཱེའི་ཉིན་མོ་བསླེབ་པར་རེ་སྒུག་བྱེད་པ་ཁྱོད་རྣམས་བཀྲ་མི་ཤིས་ཏེ། ཁྱོད་ཀྱིས་ཅིའི་ཕྱིར་གཙོ་བོ་ཡ་ཝཱེ་ཉིན་མོར་རེ་སྒུག་བྱེད་པ་ཡིན་ནམ། ཉིན་མོ་དེ་ནི་འོད་མེད་པའི་མུན་པ་ཡིན་ནོ། །
[19] ཉིན་མོ་དེ་ནི་སེང་གེ་ལས་བྲོས་ནས་དོམ་དང་འཕྲད་དེ། ཁྱིམ་དུ་སླེབས་ནས་རྩིག་པར་ལག་པ་སྔས་ཏེ་སྦྲུལ་གྱིས་སོ་བཏབ་པའི་མི་དང་འདྲའོ། །
[20] གཙོ་བོ་ཡ་ཝཱེའི་ཉིན་མོ་ནི་འོད་མེད་པའི་མུན་པ་དང་། མུན་གྲིབ་ལྡན་ཞིང་འོད་ཅིའང་མེད་པ་མ་ཡིན་ནམ།
[21] ཁྱོད་ཀྱི་དུས་ཆེན་རྣམས་ལ་ང་སྡང་ཞིང་ཞེན་ལོག་སྟེ། ཁྱོད་ཀྱི་དུས་བཟང་རྣམས་ལའང་ང་མི་དགའོ། །
[22] ཁྱོད་ཅག་གིས་ང་ལ་སྦྱིན་སྲེག་གི་མཆོད་པ་དང་དཀར་མཆོད་ཕུལ་ཡང་། ངས་མི་ལེན་ཏེ། ཁྱོད་ཅག་གིས་ཞི་བདེའི་མཆོད་པ་རུ་ཤ་ཤེད་རྒྱས་པའི་ཕྱུགས་ཟོག་ཕུལ་ཡང་ངས་མི་ལེན་ནོ། །
[23] ཁྱོད་ཅག་གི་མགུར་གླུའི་འུར་སྒྲ་ང་དང་བྲལ་བར་གྱིས་ཤིག ངས་ཁྱོད་ཅག་གིས་སྒྲ་སྙན་གཏོང་བ་ལའང་མི་ཉན་ནོ། །
[24] དེ་ལས་དྲང་བ་ཉིད་ནི་རྦ་རླབས་འཕྱུར་བ་བཞིན་དང་། དྲང་བདེན་ཆུ་བོ་བཞིན་དུ་བཞུར་བར་སྨོན།
[25] ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཅག་དབེན་སྟོང་དུ་ལོ་ངོ་བཞི་བཅུར་བསྡད་ཀྱང་། སྦྱིན་སྲེག་གི་མཆོད་པ་དང་དཀར་མཆོད་ང་ལ་ཕུལ་བ་ཡིན་ནམ།
[26] ཁྱོད་ཅག་གིས་རང་གི་ཕྱིར་དུ་བཟོས་པའི་ལྷ་སྟེ། རང་གི་རྒྱལ་པོ་སིག་ཀུད་དང་། ཁྱོད་ཅག་གི་སྐར་ལྷ་ཁེ་ཝན་ཁུར་བས།
[27] ངས་ཁྱོད་རྣམས་བཙོན་དུ་འཁྲིད་པར་འགྱུར་ཅིང་། དཱ་མེ་སེག་ཕྱི་རོལ་དུ་ཡུལ་འཁྱམ་ལ་སྐྱེལ་བར་བྱའོ་ཞེས་དཔུང་ཚོགས་ཀྱི་དཀོན་མཆོག་གི་མཚན་མངའ་བའི་གཙོ་བོ་ཡ་ཝཱེས་གསུངས་སོ། །