[1] གཙོ་བོ་ཡ་ཝཱེས་ང་ལ་དོན་ཞིག་བསྟན་ཏེ། ལྟོས་ཤིག རྒྱལ་པོའི་ཕྱིར་དུ་ལོ་ཏོག་བསྡུས་རྗེས། ས་ཞིང་དུ་ཡང་བསྐྱར་སྐྱེ་དུས། གཙོ་བོས་ཆ་ག་འབུ་མང་པོ་མཛད་པ་དང་།
[2] ཆ་ག་འབུ་ཡིས་ས་གཞིའི་ཐོན་རྫས་ཟོས་ཚར་དུས། ངས་འདི་ལྟར་དུ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉེས་ཆད་མི་གཅོད་པར་མཛོད་ཅིག དེ་ཅིའི་ཕྱིར་ཞེ་ན། ཡ་ཀོབ་ནི་ཉམ་ཆུང་ཡིན་པས་ཅི་ལྟར་ལང་སྲིད་དམ་ཅེས་ཞུས་པ་ལས།
[3] གཙོ་བོ་ཡ་ཝཱེས་དོན་དེའི་ཕྱིར་ཐུགས་འགྱོད་པར་གྱུར་ནས། དེ་བཞིན་འབྱུང་བར་མི་འགྱུར་ཅེས་གཙོ་བོ་ཡ་ཝཱེས་གསུངས་སོ། །
[4] ཡང་གཙོ་བོ་ཡ་ཝཱེས་ང་ལ་འདི་ལྟར་བསྟན་ཏེ། ལྟོས་ཤིག གཙོ་བོ་ཡ་ཝཱེས་ཉེས་ཆད་ཀྱི་མེ་བསྡུས་ཏེ། རྒྱ་ཆེ་ཞིང་རབ་ཏུ་ཟབ་པོ་དང་ཡེས་ར་ཨེལ་གྱི་ནོར་སྐལ་དག་མེར་བསྲེགས་པས།
[5] ངས་གཙོ་བོ་ཡ་ཝཱེ་ལ་འདི་ལྟར་དུ། ཁྱེད་ཀྱིས་དེ་ལྟར་མ་མཛད་ཅིག དེ་ཅིའི་ཕྱིར་ཞེ་ན། ཡ་ཀོབ་ནི་ཉམ་ཆུང་ཡིན་པས་ཅི་ལྟར་ལང་སྲིད་དམ་ཅེས་ཞུས་པ་ལས།
[6] གཙོ་བོ་ཡ་ཝཱེས་དོན་དེའི་ཕྱིར་ཐུགས་འགྱོད་པར་གྱུར་ནས། དེ་བཞིན་དུའང་འབྱུང་བར་མི་འགྱུར་ཅེས་གཙོ་བོ་ཡ་ཝཱེས་གསུངས་སོ། །
[7] ཡང་ཁོང་གིས་ང་ལ་འདི་ལྟར་བསྟན་ཏེ། ལྟོས་ཤིག རྩིག་པ་ཞིག་ནི་ཐག་པ་འཕྱང་སྟེ་བཟོས་པ་དང་། གཙོ་བོས་ཕྱག་ཏུ་འཕྱང་ཐག་ཐོགས་ཏེ་རྩིག་པ་དེའི་སྟེང་དུ་བཞེངས་ནས།
[8] གཙོ་བོ་ཡ་ཝཱེས་ང་ལ་འདི་སྐད་དུ། ཨ་མའོ་སི། ཁྱོད་ཀྱིས་ཅི་མཐོང་ངམ་གསུངས་པ་ན། ངས་ལན་དུ་འཕྱང་ཐག་ཅིག་མཐོང་ཞུས་པ་དང་། ཡང་གཙོ་བོས་འདི་སྐད་དུ། ངས་ཐག་པ་ངའི་མི་སྡེ་ཡེས་ར་ཨེལ་གྱི་ནང་དུ་འཕྱང་སྟེ། ངས་ཡང་བསྐྱར་དེ་དག་ལ་གུ་ཡངས་སུ་མི་གཏོང་ཞིང་།
[9] ཨི་སཱག་གི་མཐོ་གླིང་རྣམས་སྟོངས་ཤིང་། ཡེས་ར་ཨེལ་གྱི་གནས་མཆོག་རྣམས་དོར་བར་འགྱུར་ལ། ཡང་ངས་རལ་གྲིས་ཡེ་རོབ་ཨམ་གྱི་ཁྱིམ་རྒྱུད་ལ་རྒོལ་བར་འགྱུར་རོ་ཞེས་གསུངས་སོ། །
[10] དེ་ནས་པེད་ཨེལ་གྱི་བླ་མ་ཨ་མཱ་ཙི་ཡས་མི་མངགས་ཏེ་ཡེས་ར་ཨེལ་གྱི་རྒྱལ་པོ་ཡེ་རོབ་ཨམ་ལ་འཕྲིན་སྐུར་ཏེ་ན་རེ། ཨ་མའོ་སི་ཡིས་ཡེས་ར་ཨེལ་གྱི་ཁྱིམ་རྒྱུད་ཁྲོད་དུ་ཁྱེད་ལ་ངོ་ལོག་བྱ་བར་ལྐོག་ཇུས་བྱེད་ཅིང་། དེའི་ཚིག་ཐམས་ཅད་རྒྱལ་ཁབ་འདི་ཡིས་ཐེག་ཁུར་མི་ཐུབ་ལ།
[11] དེ་ཅིའི་ཕྱིར་ཞེ་ན། ཨ་མའོ་སི་ཡིས་ན་རེ། ཡེ་རོབ་ཨམ་ནི་རལ་གྲིས་དགུམ་པར་འགྱུར་ཅིང་། ཡེས་ར་ཨེལ་གྱི་མི་རྒྱུད་དག་རང་ཡུལ་ལས་བྲལ་ཏེ་བཙོན་ལ་འཁྲིད་པར་འགྱུར་ཅེས་སྨྲས་པའི་ཕྱིར་སྦྲན་ཏོ། །
[12] ཡང་ཨ་མཱ་ཙི་ཡས་ཨ་མའོ་སི་ལ་འདི་ལྟར་དུ། ཀྱེ་སྔོན་ཤེས་པ་ཁྱོད་ཡ་ཧུ་དཱ་རུ་བྲོས་ཤིག གནས་དེར་རང་ཁ་གསོས་དང་། གནས་དེར་ལུང་སྟོན་པ་ལས།
[13] པེད་ཨེལ་དུ་ལུང་མ་སྟོན་ཞིག དེ་ཅིའི་ཕྱིར་ཞེ་ན། གནས་འདི་ནས་རྒྱལ་པོའི་གནས་མཆོག་ཡོད་པ་དང་། རྒྱལ་པོའི་ཕོ་བྲང་ཡོད་པའི་ཕྱིར་རོ་ཞེས་སྨྲས་པའོ། །
[14] དེ་ནས་ཨ་མའོ་སི་ཡིས་ཨ་མཱ་ཙི་ཡ་ལ་ལན་དུ། ང་ནི་ལུང་སྟོན་པའང་མིན། ལུང་སྟོན་པའི་བུའང་མིན། ང་ནི་ལུག་རྫི་ཞིག་ཡིན་ཞིང་། འོ་སེ་ཤིང་ལ་བདག་གཉེར་བྱེད་མཁན་ཞིག་ཡིན།
[15] ཡིན་ཡང་གཙོ་བོ་ཡ་ཝཱེས་ང་བདམས་ཏེ། ང་ནི་ལུག་ཁྱུའི་རྗེས་སུ་འབྲངས་པར་མ་མཛད་དེ། ཁོང་གིས་ང་ལ་འདི་སྐད་དུ། ཁྱོད་སོང་སྟེ་ངའི་མི་སྡེ་ཡེས་ར་ཨེལ་ལ་ལུང་སྟོན་ཅིག་ཅེས་གསུངས་པས།
[16] ཀྱེ་ཨ་མཱ་ཙི་ཡ་ལགས་ད་ལྟ་ཁྱོད་ཀྱིས་གཙོ་བོ་ཡ་ཝཱེའི་བཀའ་ལ་ཉོན་ཅིག དེ་ཅིའི་ཕྱིར་ཞེ་ན། ཡེས་ར་ཨེལ་ལ་རྒོལ་བའི་ལུང་མ་སྟོན་ཅིག ཨི་སཱག་གི་ཁྱིམ་རྒྱུད་ལ་རྒོལ་བའི་གཏམ་མ་བརྗོད་ཅིག་ཅེས་ཁྱོད་ཀྱིས་སྨྲས་པའི་ཕྱིར།
[17] གཙོ་བོ་ཡ་ཝཱེས་འདི་སྐད་དུ། ཁྱོད་ཀྱི་ཆུང་མས་གྲོང་ཁྱེར་ནས་གཡེམ་མ་བྱ་ཞིང་། ཁྱོད་ཀྱི་བུ་དང་བུ་མོ་རྣམས་རལ་གྲི་འོག་ནས་འགྱེལ་ཞིང་། ཁྱོད་ཀྱི་ས་ཞིང་རྣམས་མི་ཡིས་ཐག་པས་ཚད་དེ་བགོ་བར་འགྱུར་ལ། ཡང་ཁྱོད་རང་ཉིད་ནི་གནས་མི་གཙང་བ་ཞིག་ནས་འཆི་བར་འགྱུར་བ་དང་། ཡང་ཡེས་ར་ཨེལ་གྱི་མི་རྒྱུད་དག་རང་ཡུལ་ལས་བྲལ་ཏེ་བཙོན་ལ་འཁྲིད་པར་འགྱུར་ཅེས་གསུངས་སོ། །