[1] ཁྱོད་ཅག་དབུལ་པོར་བརྙས་བཅོས་དང་། དཀའ་སྡུག་ཅན་ལ་བཙན་གནོན་བྱེད་མཁན། ཡང་རང་གི་སྐྱེས་པར་ན་རེ། ངེད་རྣམས་ཀྱིས་བཏུང་བའི་ཕྱིར་དུ་ཆང་འཁྱེར་ཤོག་ཅེས་སྨྲས་པའི་སཱ་མར་ཡའི་རི་ལ་གནས་པའི་པཱ་ཤན་གྱི་བ་མོ་དང་འདྲ་བ་དག་གིས་གཏམ་འདི་ལ་ཉོན་ཅིག
[2] ཡ་ཝཱེ་སྟེ་གཙོ་བོས་ཁོང་གི་དམ་པ་ཉིད་ཀྱིས་དབུ་མནའ་བཞེས་ཏེ་འདི་སྐད་དུ། ལྟོས་ཤིག ཁྱོད་ཅག་ལ་ལན་འཇལ་བའི་ཉིན་བསླེབ་ལ་ཉེ་བ་དང་། མི་ཡིས་ལྕགས་ཀྱུས་ཁྱོད་རྣམས་འཁྱེར་འགྲོ་ཞིང་། ཆེས་མཐའ་མའང་མི་ཡིས་ཉ་ཀྱུས་འཁྱེར་འགྲོའོ། །
[3] ཁྱོད་རྣམས་མཁར་གྱང་གི་བུ་ག་བརྒྱུད་དེ་ཕྱིར་སོང་ཡང་། ཧར་མོན་དུ་དོར་བར་འགྱུར་ཅེས་གཙོ་བོ་ཡ་ཝཱེས་གསུངས་སོ། །
[4] ཁྱོད་རྣམས་པེད་ཨེལ་དུ་སོང་ནས་སྡིག་པ་གསོགས་དང་། གིལ་གལ་དུ་ཉེས་ཆད་ཇེ་མང་དུ་ཐོངས་ཤིག ནངས་རེ་རེར་རང་གི་མཆོད་རྫས་ཕུལ་ལ། ཉིན་གསུམ་གྱི་ནང་དུ་རང་གི་བཅུ་ཆའི་གཅིག་ཕུལ་ཞིག
[5] ཀྱེ་ཡེས་ར་ཨེལ་པ་རྣམས། བཀའ་དྲིན་གྱི་མཆོད་པ་རུ་སྐྱུར་ལྡན་པའི་བག་ལེབ་ཕུལ་ཞིག་དང་། རང་འཐད་ཀྱིས་མཆོད་པ་ཕུལ་བ་ལ་སྐད་མཐོན་པོས་སྒྲོགས་ཤིག དེ་ཅིའི་ཕྱིར་ཞེ་ན། འདི་ལྟར་སྤྱོད་པར་ཁྱོད་དགའོ་ཞེས་གཙོ་བོ་ཡ་ཝཱེས་གསུངས་སོ། །
[6] ཡང་ངས་ཁྱོད་ཅག་གི་གྲོང་ཁྱེར་ཐམས་ཅད་ཀྱི་མི་ལ་བཟའ་བཏུང་དཀོན་ཞིང་། གནས་སོ་སོ་རུ་འབྲུ་རིགས་དཀོན་པར་མཛད་ཀྱང་། ཁྱོད་རྣམས་ངའི་ཕྱོགས་སུ་མ་འཁོར་ཅེས་གཙོ་བོ་ཡ་ཝཱེས་གསུངས་པ་དང་།
[7] ངས་ཁྱོད་རྣམས་ལ་སྟོན་ཐོག་ལེན་པའི་ཟླ་གསུམ་གྱི་སྔོན་ལ་ཆར་ཆུ་མ་གནང་བར། གྲོང་ཁྱེར་གཅིག་ལ་ཆར་གནང་ཡང་། གྲོང་ཁྱེར་གཞན་པར་མ་གནང་སྟེ། ས་ཆ་ཞིག་ལ་ཆར་གནང་ཡང་། ས་ཆ་གཞན་པར་ཆར་མ་གནང་བར་སྐམ་པས།
[8] ཆུ་འཐུང་དུ་གྲོང་ཁྱེར་གཉིས་སམ་གསུམ་གྱི་མི་གྲོང་ཁྱེར་གཅིག་ཏུ་འོངས་ཀྱང་མ་ངོམས། དེ་འདྲ་ཡིན་ཡང་ཁྱོད་རྣམས་ངའི་ཕྱོགས་སུ་མ་འཁོར་ཅེས་གཙོ་བོ་ཡ་ཝཱེས་གསུངས།
[9] ངས་ཐེངས་མང་པོར་ཐན་པ་འབྱུང་དུ་འཇུག་པའི་རླུང་དང་བམ་པས་ཁྱོད་ཀྱི་ལྡུམ་ར་དང་རྒུན་ཚལ་ལ་བརྡུངས་ཏེ། ཆ་ག་པ་ལ་ཁྱོད་ཅག་གི་སེ་ཡབ་ཤིང་དང་། སྐྱུ་རུ་ཤིང་ཟོས་ཚར་བཅུག་ཀྱང་ཁྱོད་རྣམས་ངའི་ཕྱོགས་སུ་མ་འཁོར་ཅེས་གཙོ་བོ་ཡ་ཝཱེས་གསུངས་སོ། །
[10] ཨེ་ཅིབ་ཡུལ་ལ་བྱུང་བ་དང་འདྲ་བའི་རིམས་ནད་ངས་ཁྱོད་ཀྱི་ཁྲོད་དུ་སླེབས་བཅུག་སྟེ། ངས་ཁྱོད་ཀྱི་གཞོན་ནུ་རྣམས་རལ་གྲིས་བཀུམ་ཅིང་། ཁྱོད་ལས་ཕྲོགས་པའི་རྟ་རྣམས་ཀྱང་བསད་དེ། རོ་ཡི་དྲི་ངན་ངས་ཁྱོད་ཀྱི་དམག་སྒར་ནང་དུ་ཐིབས་པར་བཅུག་ཀྱང་ཁྱོད་རྣམས་ངའི་ཕྱོགས་སུ་མ་འཁོར་ཅེས་གཙོ་བོ་ཡ་ཝཱེས་གསུངས་སོ། །
[11] སཱ་དོམ་དང་གཱ་མོ་ར་ལོག་པར་མཛད་པ་བཞིན་དུ་ངས་ཁྱོད་རྣམས་ཀྱང་ལོག་པར་འཇུག་སྟེ། ཁྱོད་ཅག་ནི་མེ་ལས་ཕྱུང་བའི་འབར་ཞུན་གཅིག་དང་འདྲ་ཡང་ཁྱོད་རྣམས་ངའི་ཕྱོགས་སུ་མ་འཁོར་ཅེས་གཙོ་བོ་ཡ་ཝཱེས་གསུངས།
[12] དེ་བས་ཀྱེ་ཡེས་ར་ཨེལ། ངས་ཁྱོད་ལ་འདི་ལྟར་བྱ་སྟེ། ཀྱེ་ཡེས་ར་ཨེལ་ངས་ཁྱོད་ལ་དེ་ལྟར་བྱ་བས། ཁྱོད་རང་གི་དཀོན་མཆོག་དང་མཇལ་བར་གྲ་སྒྲིག་བྱོས་ཤིག
[13] དེ་ཅིའི་ཕྱིར་ཞེ་ན། ལྟོས་ཤིག ཁོང་ནི་རི་བོ་རྣམས་མཛད་མཁན་དང་། རླུང་མཛད་མཁན། ཉིད་ཀྱི་ཐུགས་དགོངས་མི་ལ་མངོན་པར་མཛད་མཁན་ཡིན་ཞིང་། ཁོང་ནི་ཞོགས་པ་མུན་པར་མཛད་མཁན་དང་། ཁོང་ནི་ས་གཞིིའི་མཐོ་སར་ཞབས་འཆག་མཁན་ལགས་པས། ཁོང་ཉིད་ཀྱི་མཚན་ནི་དཔུང་ཚོགས་ཀྱི་དཀོན་མཆོག་ཡ་ཝཱེ་ལགས་སོ། །