[1] གཙོ་བོ་ཡ་ཝཱེས་འདི་སྐད་དུ། མོ་ཨབ་ཀྱིས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅད་པའི་བཀའ་ཕྱིར་མི་ལེན་ཞིང་། དེ་ཅིའི་ཕྱིར་ཞེ་ན། དེ་ཡིས་ཨེ་དོམ་རྒྱལ་པོའི་རུས་པ་བསྲེགས་ནས་ཐལ་དུ་གྱུར་བཅུག་པས།
[2] ངས་མོ་ཨབ་ལ་མེ་འཕངས་ནས། ཀེ་རི་ཡོད་ཀྱི་མཁར་བཙན་པོ་རྣམས་བསྲེག་པར་འགྱུར་ཅིང་ཟང་ཟིང་དང་། ངུ་སྐད་སྒྲོག་པ་དང་། དུང་འབུད་པའི་སྒྲ་ནང་དུ་མོ་ཨབ་རྩ་མེད་དུ་གཏོང་བར་འགྱུར་ལ།
[3] ཡང་ངས་དེའི་དབང་འཛིན་མཁན་རྣམས་ཚར་དུ་གཅོད་ཅིང་། དེ་དང་ལྷན་ཅིག་ཏུ་དེའི་འགོ་འཛིན་ཐམས་ཅད་ཀྱང་བཀུམ་པར་བྱའོ་ཞེས་གཙོ་བོ་ཡ་ཝཱེས་གསུངས་སོ། །
[4] གཙོ་བོ་ཡ་ཝཱེས་འདི་སྐད་དུ། ཡ་ཧུ་དཱ་ཡིས་ཡང་ནས་ཡང་དུ་སྡིག་པ་བསགས་པས། ངས་ཉེས་ཆད་གཅད་པའི་བཀའ་ཕྱིར་མི་ལེན་ཞིང་། དེ་ཅིའི་ཕྱིར་ཞེ་ན། དེ་ཡིས་གཙོ་བོ་ཡ་ཝཱེའི་བཀའ་ཁྲིམས་རྣམས་དོར་བ་དང་། ཁོང་གི་ཁྲིམས་སྲོལ་རྣམས་མ་སྲུང་བར་མ་ཟད། དེ་དག་གི་མེས་པོ་རྣམས་རྗེས་སུ་འབྲངས་པའི་སྐུ་འདྲ་ཡིས་ཁོ་རྣམས་ནོར་ལམ་དུ་ཕྱིན་པས།
[5] ངས་ཡ་ཧུ་དཱ་ལ་མེ་འཕངས་ནས། ཡེ་རུ་སཱ་ལེམ་གྱི་མཁར་བཙན་པོ་རྣམས་བསྲེག་པར་འགྱུར་ཅེས་གཙོ་བོ་ཡ་ཝཱེས་གསུངས་སོ། །
[6] གཙོ་བོ་ཡ་ཝཱེས་འདི་སྐད་དུ། ཡེས་ར་ཨེལ་གྱིས་ཡང་ནས་ཡང་དུ་སྡིག་པ་བསགས་པས། ངས་ཉེས་ཆད་གཅད་པའི་བཀའ་ཕྱིར་མི་ལེན་ཞིང་། དེ་ཅིའི་ཕྱིར་ཞེ་ན། དེ་ཡིས་དངུལ་གྱི་ཆེད་དུ་མི་དྲང་བདེན་བཙོངས་ཤིང་། ལྷམ་ཆ་གཅིག་གི་ཕྱིར་དུ་དབུལ་པོ་བཙོངས།
[7] སའི་རྡུལ་ལ་རྡོག་བརྫིས་རྒྱག་པ་བཞིན། དེ་དག་གིས་དབུལ་པོའི་མགོ་ལ་རྡོག་བརྫིས་བཏང་ཞིང་། དེ་དག་གིས་མི་དཀའ་སྡུག་ཅན་གྱི་དབང་ཆ་ཕྲོགས་ཤིང་། བུ་དང་ཕ་གཉིས་ཀྱིས་བུད་མེད་གཅིག་སྤྱད་ནས། བསམ་བཞིན་དུ་ངའི་མཚན་དམ་པ་བཙོག་པར་བཟོས།
[8] དེ་དག་མཆོད་ཁྲི་རེ་རེའི་མདུན་དུ་གཏའ་མར་བཞག་པའི་མི་གཞན་པའི་གོས་རྣམས་ཀྱི་སྟེང་དུ་ཉལ་ཞིང་། རང་གི་དཀོན་མཆོག་གི་ཕོ་བྲང་ནང་དུ་བཤུ་བཞོག་ལས་ཐོབ་པའི་དངུལ་གྱིས་ཉོས་པའི་རྒུན་ཆང་འཐུང་ངོ་། །
[9] ཡིན་ཡང་ངས་དེ་དག་གི་མདུན་དུ་ཨེ་མོར་པ་རྣམས་ཚར་དུ་བཅད་པ་མ་ཡིན་ནམ། ཨེ་མོར་པ་ནི་ཐང་ཤིང་བཞིན་མཐོ་ལ། བེ་ཤིང་བཞིན་བརྟན་ཡང་། ངས་དེའི་སྟེང་གི་ཤིང་ཏོག་རྣམས་རྩ་མེད་དུ་གཏོང་ཞིང་། སྡོང་པོའི་རྩད་པའང་འབྱིན་པར་འགྱུར།
[10] ཨེ་མོར་པའི་ཡུལ་ཁམས་ཁྱོད་རྣམས་ལ་ནོར་སྐལ་དུ་ཐོབ་པའི་ཕྱིར་དུ། ངས་ཁྱོད་རྣམས་ཨེ་ཅིབ་ཡུལ་ནས་ཕྱིར་ཕྱུང་སྟེ། དབེན་སྟོང་དུ་ཁྲིད་ནས་ལོ་ངོ་བཞི་བཅུར་དེར་གནས་པ་མ་ཡིན་ནམ།
[11] ངས་ཁྱོད་ཀྱི་བུ་རྒྱུད་ལས་ལུང་སྟོན་པ་དང་། ན་གཞོན་ལས་རང་གི་ཚེ་སྲོག་གཙོ་བོར་བཅོལ་བའི་མི་རྣམས་འཕེལ་བར་བྱས་ཤིང་། ཀྱེ་ཡེས་ར་ཨེལ་པ་རྣམས་འདི་ནི་དོན་ངོ་མ་མ་ཡིན་ནམ་ཅེས་གཙོ་བོ་ཡ་ཝཱེས་གསུངས་སོ། །
[12] ཡིན་ཡང་ཁྱོད་ཚོས་ཚེ་སྲོག་གཙོ་བོར་བཅོལ་བའི་མི་ལ་བཙན་གྱིས་ཆང་འཐུང་དུ་བཅུག་སྟེ། ལུང་སྟོན་པ་རྣམས་ལ་ལུང་མ་སྟོན་ཞེས་ནན་གྱིས་བསྐུལ་ཏོ། །
[13] ལྟོས་ཤིག ཤོག་གིས་ཁེངས་པའི་ཤིང་རྟ་གཡོ་འགུལ་བྱེད་པ་བཞིན། ངས་ཁྱོད་ཀྱི་རྐང་འོག་གི་ས་གཡོ་བར་འཇུག་ཅིང་།
[14] དེ་འགུལ་སྐྱོད་ཤིན་ཏུ་མགྱོགས་པས་མི་འབྲོ་མི་ཐུབ་ལ། དྲག་པོ་ཡིན་པས་མིས་རང་གི་ནུས་པ་འདོན་མི་ཐུབ། དཔའ་བོས་ཀྱང་རང་ཉིད་སྐྱོབ་མི་ཐུབ།
[15] གཞུ་འཐེན་མཁན་སར་འགྲེང་མི་ནུས་ཤིང་། རྒྱུག་མཁན་ཡང་ཐར་མི་ཐུབ་ལ། སྐྱ་མི་ཡིན་ཡང་རང་ཉིད་སྐྱོབ་མི་ཐུབ།
[16] ཉིན་དེར་སྙིང་སྟོབས་ལྡན་པའི་དམག་ཡིན་ཡང་གཅེར་བུར་འབྲོ་བར་འགྱུར་ཅེས་གཙོ་བོ་ཡ་ཝཱེས་གསུངས་སོ། །