[1] ኣገልጋሊ እግዚኣብሔርን ሓዋርያ ኢየሱስ ክርስቶስን ናይቶም ኅሩያት ኣምላኽ ንእምነት ክሃንጽ ነቲ ናብ ቅድስና ዘብጽሕ ፍልጠት ሓቂ ኽሰብኽ ካብ ዝተጸውዐ ጳውሎስ።
[2] እዝ እምነት እዙይን እዝ ፍልጠት እዙይን እቲ ዘይሕሱ እግዚኣብሔር ቅድሚ ዘመናት ዘተስፈዎ ናይ ዘለዓለም ሕይወት እዩ።
[3] ጊዜኡ ምስ በጽሐ ብትእዛዝ እቲ መድኃኒና ዝኾነ እግዚኣብሔር ንኣይ ክእውጅ ብዝሃበኒ ስብከት ገይሩ ንቓሉ ገለጾ።
[4] በታ ናይ ኲላትና ዝኾነት እምነት ናይ ሓቂ ወደይ ዝኾንካ ቲቶ ካብ እግዚኣብሔር ኣብን ካብ መድኃኒና ኢየሱስ ክርስቶስን ጸጋን ሰላምን ምሳኻ ይኹን።
[5] ኣብ ቀርጤስ ዝሓደግኩኻ ከምቲ ዝኣዘዝኩኻ ጌርካ ነቲ እንተይተወድአ ዝተረፈ ኽተመዓራርን በብዓዱ መራሕቲ ቤተ ክርስቲያን ክትሸይምን ኢለ እየ።
[6] መራሕ ቤተ ክርስቲያን ነቐፋ ዘይብሉ ሰብኣይ ሓንቲ ሰበይቲ ስዲ ብምዃንን ብዘይ ምእዛዝን ዘይሕመዩ ኣመንቲ ውሉድ ዘለውዎ ይኹን።
[7] መራሕ ቤተ ክርስቲያን ሥራሕ እግዚኣብሔር ክመርሕ ሕድሪ ዝተቐበለ ስለ ዝኾነ ነቐፋ ዘይብሉ ክኸውን ይግባእ፤ ከምኡውን ዘይዕበ ዘይዂሪ ዘይሰክር ዘይበኣስ ንገንዘብ ዘይጐዪ ክኸውን ኣለዎ።
[8] እኳ ደኣ ተቐባል ጋሻ ሠናይ ዝኾነ ዝፈቱ ንርእሱ ዝመልኽ ቅኑዕ ቅዱስን ብመጠን ዝነብርን ይኹን።
[9] ንሱ በቲ ቕኑዕ ትምህርቲ ምእንቲ ኽምዕድ ነቶም ዝቃወሙውን መልሲ ምሃብ ምእንቲ ክኽእል በቲ ዝተምሃሮ እሙን ዝኾነ ቓል ይጽናዕ።
[10] ብዙኃት ሰባት ብኅልፊ ኻብቶም ዝኣመኑ ኣሕዛብ ይገረዙ ዝብሉ ኣይሁድ ዘይእዙዛት ለፍለፍትን መታለልትን ኣለዉሞ።
[11] ንሳቶም ረብሓ ምእንቲ ኽረኽቡ ኢሎም ቅኑዕ ብዘይኮነ መንገዲ ኽምህርዎ ዘይግብኦም እናመሃሩ ንስድራ ዘናውጹ ኣፎም ክተትኅዞም ግቡእ እዩ።
[12] ሓደ ኻብቶም ናታቶም ነቢያት እኳ ሰብ ቀርጤስ ኲልሻዕ ሓሰውቲ ክፉኣት ኣራዊት ሃካያት ከብዳማት እዮም ይብል።
[13] -
[14] እዝ ምስክርነት እዙይ ሓቂ እዩ። ስለዙይ ትኽክለኛ እምነት ምእንቲ ኽህልዎም ናብ ተረት ኣይሁድን ናብ ትእዛዛት እቶም ንሓቂ ዝነጸጉ ሰባትን ከየዘንብሉ ኣጸቢቕካ ገሥጾም።
[15] ነቶም ንጹሃት ኲሉ ነገር ንጹህ እዩ፤ ነቶም ርኹሳትን ዘይኣምኑን ግና ኣእምሮኦምን ሕሊናኦምን ርኹስ ስለ ዝኾነ ንጹህ ዝኾነ ነገር የለን።
[16] ንእግዚኣብሔር ንፈልጦ ኢና ይብሉ፤ ብተግባሮም ግና ይኽሕድዎ፤ ዘጸይፉን ዘይእዙዛትን ሠናይ ንምሥራሕ ዘይበቕዑ ን እዮም።