[1] «Wakit insaan hidir fi muchkila aw yaʼarif al-muchkila di wa hallafooh le yachhad, kan hu labbad nafsah wa aba ma yachhad, al-naadum da yukuun muznib wa yilhammal natiijat khataayah.
[2] «Wa kan naadum bala raayah yalmas cheyy nijis misil rimme hana haywaan hana kadaade nijis aw rimme hana bahiime nijse aw rimme hana waahid min al-zawaahif nijis, khalaas al-insaan da yukuun nijis wa yabga khaati.
[3] «Wakit naadum bala raayah yalmas najaasa hana insaan al-tinajjis, kan hu irif khataayah, khalaas hu yabga khaati.
[4] «Wa wakit naadum bala fikir kallam wa halaf fi ayyi haala le yisawwi al-charr aw al-kheer, kan hu irif khataayah, khalaas hu yabga khaati.
[5] «Wa kan naadum khiti fi waahide min al-haalaat dool, waajib yiʼtarif be zanbah al-sawwaah.
[6] Wa fi chaan al-zanib al-hu sawwaah, yigaddim dahiiye le Allah min al-khanam anzaay aw khanamaay dahiiye le kaffaarat al-khata. Wa raajil al-diin yisawwi leyah kaffaara le zanbah.
[7] «Wa kan naadum ma yagdar yalga kharuuf, hu yagdar yigaddim dahiiye le Allah le l-zanib al-hu sawwaah itneen gimri aw itneen hamaam, waahide le dahiiyat kaffaarat al-khata wa l-aakhara le l-dahiiye al-muharraga.
[8] Wa hu yiwaddiihum le raajil al-diin. Wa fi l-awwal, raajil al-diin yigaddim teeraay le l-dahiiye hana kaffaarat al-zanib. Hu yaksir ragabatha wa laakin min duun yagtaʼ raasha.
[9] Wa be damm al-dahiiye, raajil al-diin yuruchch al-durdur hana nawaayit al-madbah. Wa l-faddal min al-damm da, yidaffigah fi gaʼar al-madbah. Wa di dahiiye le kaffaarat al-zanib.
[10] Wa l-teeraay al-aakhara, yigaddimha dahiiye muharraga hasab al-gawaaniin. Wa be misil da, raajil al-diin yisawwi le l-raajil da kaffaara le l-zanib al-hu sawwaah. Wa khalaas, hu yalga al-khufraan.
[11] «Wa kan naadum ma yagdar yalga itneen gimri aw itneen hamaam, khalaas hu yagdar yigaddim hadiiye le l-zanib al-hu sawwaah kooro hana dagiig hadiiye le kaffaarat zanbah. Wa ma yiziid foogha dihin wa la lubaan achaan di hadiiye le kaffaarat al-zanib.
[12] Wa hu yiwaddi hadiiytah di le raajil al-diin. Wa raajil al-diin yichiil malyit iid min hadiiyat al-zikra wa yiharrigha fi l-madbah min foog le l-dahiiye al-muharraga le Allah. Wa di dahiiye le kaffaarat al-zanib.
[13] Wa be misil da, raajil al-diin yisawwi le l-raajil da kaffaara le l-zanib al-hu sawwaah min al-haalaat dool. Wa hu yalga al-khufraan. Wa l-faddal yukuun le raajil al-diin misil hadiiye hana dagiig.»
[14] Wa Allah hajja le Muusa wa gaal :
[15] Wa kan naadum sawwa zanib bala raayah didd mukhaddasaat Allah, waajib hu yigaddim le Allah dahiiye le kaffaarat al-khata. Wa da, waahid kabich al-ma indah ayyi eeb al-yichiilah min al-khanam wa tamanah yisaawi hajar fudda hasab al-wazin al-rasmi hana l-bakaan al-mukhaddas.
[16] Wa yikaffi taman al-zanib al-sawwaah didd al-bakaan al-mukhaddas wa yiziid foogah khumsah wa yantiih le raajil al-diin. Wa raajil al-diin yisawwi leyah kaffaara be l-kabich hana dahiiye le kaffaarat al-khata wa hu yalga al-khufraan.
[17] Wa kan naadum yisawwi zanib bala raayah didd waahide min wasaaya Allah, al-naadum da yabga khaati wa yilhammal natiijat khataayah.
[18] Hu yijiib le raajil al-diin dahiiye le kaffaarat al-khata, waahid kabich al-ma indah ayyi eeb al-yichiilah min al-khanam hasab al-taman al-muhaddad. Wa raajil al-diin yisawwi leyah kaffaara le l-khata al-hu sawwaah bala raayah wa min duun yaʼarfah wa hu yalga al-khufraan.
[19] Wa di dahiiye le kaffaarat al-khata achaan al-naadum da, akiid sawwa zanib giddaam Allah.