[1] Wa Allah hajja le Muusa wa gaal :
[2] Guul le Bani Israaʼiil : «Ayyi waahid min Bani Israaʼiil aw al-ajnabi al-saakin fi Israaʼiil kan yigaddim waahid min iyaalah le sanam Muulak, waajib yumuut. Wa chaʼab al-balad yarjumuuh.
[3] Wa ana Allah niwajjih ale l-naadum da wa nafsulah min chaʼabah achaan hu gaddam waahid min iyaalah le Muulak wa be da, najjas beeti al-mukhaddas wa ma ahtaram usmi al-mukhaddas.
[4] Wa kan chaʼab al-balad saddo uyuunhum wakit al-raajil da gaddam waahid min iyaalah le Muulak wa ma katalooh,
[5] khalaas ana bas niwajjih ale l-naadum da wa nugumm diddah hu wa ahalah wa nafsulhum min usut chaʼabhum, hu wa kulla l-naas al-taabʼiin leyah wa yichcharmato maʼa Muulak.
[6] «Wa kan naadum yiwajjih ale l-naas al-yikallumu maʼa l-maytiin wa l-jannaaniyiin le yichcharmat maʼaahum, al-naadum da ana nugumm diddah wa nafsulah min chaʼabah.
[7] Khassusu nufuusku wa tabgo khaassiin achaan ana Allah Ilaahku.
[8] «Wa ahfado gawaaniini wa tabbuguuhum achaan ana Allah bas nikhassisku.
[9] Wa l-yalʼan abuuh aw ammah yilʼaakhab be l-moot. Hu laʼan abuuh wa ammah, hu masʼuul min mootah.
[10] «Wa kan raajil zana marit akhuuh aw marit naadum aakhar, al-raajil wa l-mara al-sawwo al-zina dool waajib yumuutu.
[11] «Wa kan raajil yargud maʼa marit abuuh wa yiʼayyib abuuh, al-raajil da wa l-mara waajib yumuutu. Wa humman masʼuuliin min moothum.
[12] «Wa kan naadum yargud maʼa marit wileedah, humman al-itneen waajib yumuutu achaan sawwo cheyy makruuh marra waahid. Wa humman masʼuuliin min moothum.
[13] «Wa kan raajil yargud maʼa raajil misil yargud maʼa mara, humman al-itneen sawwo muharram wa waajib yumuutu. Wa humman masʼuuliin min moothum.
[14] «Wa kan raajil akhad al-bitt wa ammaha, da fiʼil cheen. Wa waajib al-bitt wa ammaha wa l-raajil, yiharruguuhum be naar achaan al-fiʼil al-cheen da ma yukuun fi usutku.
[15] «Wa kan naadum yargud maʼa bahiime, waajib yumuut wa l-bahiime kula waajib yaktuluuha.
[16] Wa kan mara garrabat le haywaan le targud maʼaayah, waajib taktulu al-mara wa l-haywaan. Humman al-itneen yumuutu wa humman masʼuuliin min moothum.
[17] «Wa kan raajil yaakhud akhtah bitt ammah aw bitt abuuh wa kan yargud maʼaaha wa hi targud maʼaayah, da eeb. Wa waajib yafsuluuhum min chaʼabhum giddaam kulla l-chaʼab. Wa be sabab hu ragad maʼa akhtah, yilhammal natiijat khataayah.
[18] «Wa kan naadum yargud maʼa mara indaha heed wa yichiif al-bakaan al-yamrug minnah al-damm al-hi kula kachafatah, khalaas humman al-itneen waajib yafsuluuhum min chaʼabhum.
[19] «Ma targud maʼa akhut ammak wa la akhut abuuk achaan be da inta ragadt maʼa gariibtak. Wa l-yisawwu misil da yilhammalo natiijat khataahum.
[20] «Wa kan naadum yargud maʼa immitah, hu yiʼayyib immah. Wa humman al-itneen yilhammalo natiijat zanibhum wa yumuutu bala iyaal.
[21] «Wa kan naadum akhad marit akhuuh, da najaasa wa hu yiʼayyib akhuuh. Wa humman ma yalgo iyaal.
[22] «Wa ahfado kulla churuuti wa kulla gawaaniini wa tabbuguuhum wa be da, al-balad al-niwaddiiku leeha wa nisakkinku foogha ma tatrudku.
[23] Ma titaabuʼu aadaat al-umam al-natrudhum giddaamku achaan humman sawwo kulla l-aʼmaal dool wa ana abeethum.
[24] «Wa ana gult leeku : ‹Intu bas tawrusu arduhum wa ana nantiiha leeku misil warasa. Wa di l-balad al-malaane be l-laban wa l-asal.› «Wa ana Allah Ilaahku al-azaltuku min kulla l-chuʼuub.
[25] Wa farrugu ambeen al-bahaayim al-taahiriin wa l-nijsiin wa been al-tuyuur al-nijsiin wa l-taahiriin achaan ma tinajjusu nufuusku be l-haywaanaat wa l-tuyuur wa kulla l-zawaahif hana l-ard al-ana khatteethum taraf wa gult leeku humman dool nijsiin.
[26] «Abgo khaassiin leyi achaan ana Allah khudduus. Wa ana azaltuku min al-chuʼuub achaan tabgo hineeyi.
[27] Wa kan raajil aw mara yikallim maʼa l-maytiin aw yihajji maʼa l-jinn, waajib yumuut. Al-naas yarjumuuh wa hu masʼuul min mootah.»