[1] Wa Allah hajja le Muusa wa gaal :
[2] Hajji le kulla mujtamaʼ Bani Israaʼiil wa guul leehum : «Abgo khaassiin achaan ana Allah Ilaahku khudduus.
[3] «Wa ayyi waahid minku khalli yihtarim ammah wa abuuh wa ahfado yoomi hana l-sabt. Wa ana bas Allah Ilaahku.
[4] «Ma tiwajjuhu ale l-ilaahaat wa tasnaʼo leeku asnaam hana hadiid. Wa ana bas Allah Ilaahku.
[5] «Wa kan tigaddumu le Allah dahiiyat salaama, waajib tigaddumuuha be tariiga al-hu yarda beeha.
[6] Al-dahiiye di taakuluuha fi l-yoom al-gaddamtuuha foogah aw ambaakir. Wa l-yifaddil minha lahaddi l-yoom al-taalit, yiharruguuh fi l-naar.
[7] Wa kan yaakuluuh fi l-yoom al-taalit da, yabga misil fatiis wa Allah ma yakhbalah.
[8] Wa l-yaakulah yilhammal natiijat khataayah achaan hu ma ahtaram al-mukhassas le Allah. Wa l-naadum da, waajib yafsuluuh min chaʼabah.
[9] «Wa wakit tagtaʼo ziraaʼitku fi kulla arduku, faddulu chiyya min taraf ziraaʼitku ma tagtaʼooh wa l-kichcheeb kula ma tilaggutuuh.
[10] Wa fi jineenaatku hana l-inab, ma waajib tagtaʼo al-faddal min al-inab fi l-anaagiid wa la tikachchubu al-daffag fi l-ard. Dool waajib tikhalluuhum le l-miskiin wa l-ajnabi. Wa ana bas Allah Ilaahku.
[11] «Ma tasurgu. Wa ma takdubu le akhuuku wa la tukhuchchuuh.
[12] Wa ma tahalfu be usmi be kidib achaan be l-haliife di, intu ma tihtarumu usmi ana Ilaahku. Wa ana bas Allah.
[13] «Ma tazulmu jiiraanku wa la tasurgu. Wa ma takurbu ujrat al-khaddaam lahaddi ambaakir.
[14] Ma tiʼayyuru al-tarchaan wa ma tukhuttu cheyy giddaam al-amyaan le yitartiʼah. Wa be da, tiwassufu khoofku minni ana Ilaahku. Wa ana bas Allah.
[15] «Wa fi l-chariiʼa, ma timayyulu wa la tansuru al-gaadir wa la l-daʼiif wa laakin ahkumu ambeen akhwaanku be l-adil.
[16] Ma tangulu al-kalaam ambeenaat chaʼabku. Be kidib, ma tathamo jiiraanku be jariime al-tidaffig dammah. Wa ana bas Allah.
[17] «Ma takraho akhwaanku min daakhal guluubku wa laakin luumu rufgaanku achaan ma tichaaruku maʼaahum fi zunuubhum.
[18] Ma tichiilu taar wa ma takurbu fi guluubku le iyaal chaʼabku. Hibb akhuuk misil tihibb nafsak ! Wa ana bas Allah.
[19] «Ahfado gawaaniini. Ma tilimmu bahaayim itneen al-nafarhum chig chig le tiwalluduuhum. Wa ma tazraʼo fi zereʼ waahid nabaataat itneen al-nafarhum chig chig. Wa ma talbaso khalag masnuuʼ min nooʼ tineen chig chig.
[20] «Wa kan raajil ragad maʼa mara wa l-mara di khaadim wa makhtuuba le naadum aakhar wa laakin ma fadooha wa la atagooha, fi l-bakaan da yikaffi al-khasaara. Wa laakin ma yaktuluuhum achaan al-khaadim di ma atagooha.
[21] Wa l-raajil al-sawwa al-cheyy da yijiib le Allah fi madkhal kheemat al-ijtimaaʼ kabich dahiiye le kaffaarat al-khata.
[22] Wa be l-kabich da, raajil al-diin yisawwi leyah kaffaara wa yigaddim dahiiye le kaffaarat al-khata le Allah fi chaan al-zanib al-hu sawwaah. Wa khalaas yalga al-khufraan.
[23] «Wa wakit tadkhulu fi l-balad wa timaggunu ayyi chadara al-talda iyaal, ajʼalo iyaalha muharramiin leeku le muddit talaata sana, ma taakuluuhum.
[24] Wa fi l-sana al-raabʼe, kulla iyaal al-chadara di tikhassusuuhum le Allah fi iid al-chukur.
[25] Wa fi l-sana al-khaamse, taakulu iyaal al-chadar. Wa be da, intaajku yiziid leeku. Wa ana bas Allah Ilaahku.
[26] «Ma taakulu ayyi cheyy maʼa l-damm. Wa ma tichawwufu wa la tihajju be ilim al-kheeb.
[27] Ma tagtaʼo chaʼarku mudawwar wa ma tagtaʼo chawaarib duguunku.
[28] Ma tijarruhu jisimku be sabab naadum maat wa tisawwu rasim al-ma yingachcha fi jisimku. Wa ana bas Allah.
[29] «Ma tiwadduru charaf banaatku be l-charmata wa da achaan al-balad ma tichcharmat wa tinmali be l-fasaala.
[30] Ahfado yoomi hana l-sabt wa ahtarumu beeti al-mukhaddas. Wa ana bas Allah.
[31] «Ma tiwajjuhu ale l-naas al-yikallumu maʼa l-maytiin wa la l-jannaaniyiin, ma tifattuchuuhum wa tinnajjaso beehum. Wa ana bas Allah Ilaahku.
[32] «Gumm le siyaad al-suuf al-abyad wa ahtarim al-chiyyaab. Wa be da, tiwassif khoofak minni ana Ilaahak. Wa ana bas Allah.
[33] «Wa kan naadum ajnabi ja sakan maʼaaku fi baladku, ma tazulmuuh.
[34] Wa alʼaamalo maʼa l-ajnabi al-saakin maʼaaku misil maʼa l-muwaatin min Bani Israaʼiil wa hibbuuh misil tihibbu nufuusku achaan intu kula bigiitu ajaanib fi balad Masir. Wa ana bas Allah Ilaahku.
[35] «Ma timayyulu fi l-chariiʼa wa ma tukhuchchu fi l-magaas wa la l-wazin wa la l-mikyaal.
[36] Khuttu miizaan aadil wa wazin aadil wa kooro aadil wa liitir aadil. Wa ana bas Allah Ilaahku al-maragtuku min balad Masir.
[37] «Wa ahfado kulla churuuti wa kulla gawaaniini wa tabbuguuhum. Wa ana bas Allah.»