[1] Wa Allah hajja le Muusa fi jabal Siinaaʼ wa gaal :
[2] Hajji le Bani Israaʼiil wa guul leehum : «Wakit tadkhulu fi l-balad al-nantiiha leeku, khallu al-ard tinjamma wa da sabt le Allah.
[3] Wa fi muddit sitte sana, teerubu ziraaʼitku wa akhdumu jineenaat inabku wa agtaʼo intaajku.
[4] Wa laakin fi l-sana al-saabʼe, khallu al-ard tinjamma wa di sana hint sabt le Allah. Wa fi l-sana di, ma titeerubu ziraaʼitku wa ma takhdumu jineenaat inabku.
[5] Wa ma tisawwu nafiir le tagtaʼo intaaj al-bandar wa ma tilaggutu al-inab hana l-jineene al-intu ma addaltuuha. Wa di tukuun sana hana sabt le l-ard.
[6] Wa be da kula fi sabt al-ard di, talgo akil, inta wa abdak wa khaadmak wa l-muʼajjar wa l-deef wa kulla l-gaaʼidiin maʼaak.
[7] Wa kan le bahaaymak wa haywaanaat al-kadaade hana baladak, humman yiʼiichu be kulla cheyy al-tigawwimah al-ard.
[8] «Wa ahsubu 7 usbuuʼ fi l-siniin wa da 7 siniin 7 marraat wa kulla ke yabga 49 sana.
[9] Wa fi l-yoom al-aachir hana l-chahar al-saabiʼ, adurbu al-buug le l-munaada wa fi yoom al-Kaffaara adurbu al-buug fi kulla baladku.
[10] Wa khassusu al-sana al-khamsiin wa aalano al-hurriiye fi l-balad le kulla sukkaanha. Wa di tabga leeku sanit al-Hurriiye wa ayyi waahid minku yigabbil le ard warasatah wa ayyi waahid minku yigabbil le ahalah.
[11] Wa l-sana al-khamsiin tabga leeku sanit al-Hurriiye. Wa fi l-sana di, ma tisawwu nafiir le titeerubu ziraaʼitku wa la tagtaʼo al-yugumm bandar fi l-ziraaʼa wa la tilaggutu al-inab hana l-jineene al-intu ma addaltuuha.
[12] Wa di tabga leeku sanit al-Hurriiye wa l-sana di mukhassasa. Wa taakulu al-yugumm fi l-ziraaʼa.
[13] Wa fi sanit al-Hurriiye, ayyi waahid minku yigabbil le ard warasatah.
[14] «Wa kan tibiiʼ cheyy le akhuuk aw tachri minnah cheyy, khalli ayyi waahid minku ma yazlum akhuuh.
[15] Achri min akhuuk hasab adad al-siniin baʼad sanit al-Hurriiye wa hu yibiiʼ leek hasab adad al-siniin al-yilimmu fooghum al-intaaj.
[16] Wa kan al-siniin zaado, al-taman yiziid wa kan al-siniin nagaso, al-taman yangus achaan hu gaaʼid yibiiʼ leek hasab adad al-intaaj.
[17] Wa khalli ayyi waahid minku ma yazlum akhuuh. Wa be da, tiwassif khoofak minni ana Ilaahak. Achaan ana bas Allah Ilaahku.
[18] «Tabbugu churuuti wa ahfado gawaaniini wa tabbuguuhum le taskunu fi l-balad be amaan.
[19] Wa l-balad tanti intaajha wa intu taakulu wa tachbaʼo wa taskunu be amaan,
[20] Wa kan gultu : ‹Naakulu chunu fi l-sana al-saabʼe achaan aniina ma gaaʼidiin nazraʼo wa la gaaʼidiin nilimmu intaajna ?›
[21] Khalaas ana ninazzil rahmati foogku fi l-sana al-saadse wa hi tantiiku intaaj al-waajib leeku le talaata sana.
[22] Wa fi l-sana al-taamne, intu tazraʼo wa laakin taakulu min intaaj al-sana al-faatat lahaddi l-sana al-taasʼe intaajha yitimm wa intu taakulu intaaj hana l-sana al-faatat.
[23] «Wa ard al-balad di ma tinbaaʼ marra waahid achaan al-balad hinti ana wa intu gaaʼidiin fi bakaani misil ajaanib wa diifaan.
[24] Wa fi kulla l-balad al-tabga ard warasatku, sawwu gawaaniin al-yakhbalo gabbiliin al-ard.
[25] Wa kan akhuuk indah deen wa baaʼ ard warasatah, khalli al-gariib al-indah foogah hagg yigabbil al-ard le akhuuh al-baaʼha.
[26] Wa kan naadum ma indah gariib al-indah foogah hagg al-yigabbil al-ard di, mumkin hu zaatah yifattich tariiga le yigabbil ardah.
[27] Hu yahsib al-siniin al-faato min sanit al-beeʼ wa yigabbil al-faraga le l-muchtari. Wa baʼad da, yigabbil fi ard warasatah.
[28] Wa laakin kan hu ma ligi tariiga yigabbil al-maal le l-muchtari, al-ard al-baaʼooha di tagood fi iid al-muchtari lahaddi sanit al-Hurriiye. Wa fi sanit al-Hurriiye, siid al-ard yigabbil fi ard warasatah.
[29] «Wa kan naadum baaʼ beet al-gaaʼid fi madiina gawiiye, hagg al-gabbiliin da yagood lahaddi kumaalit sanit al-beeʼ. Wa hagg al-gabbiliin da ma yagood ziyaada min sana.
[30] Wa laakin kan al-beet da ma gabbalooh lahaddi mudda hana sana kaamile, al-beet al-gaaʼid fi l-madiina al-gawiiye da yagood le l-muchtari wa le zurriiytah. Wa fi sanit al-Hurriiye kula, ma yamrug min iideenah.
[31] Wa l-buyuut al-gaaʼidiin fi l-mudun al-gawiyiin, yajʼaloohum misil ziraaʼa hana l-balad wa yagdaro yigabbuluuhum aw yamurgu minhum fi sanit al-Hurriiye.
[32] «Wa l-Laawiyiin induhum daayman hagg al-gabbiliin fi mudun al-Laawiyiin wa fi buyuut hana mudun warasathum.
[33] Wa kan waahid min al-Laawiyiin baaʼ beetah, fi sanit al-Hurriiye beetah yigabbil leyah achaan al-buyuut dool warasathum fi mudun al-Laawiyiin fi usut Bani Israaʼiil.
[34] Wa kan le l-ziraaʼa al-fi hawaale mudunhum, ma mumkin tinbaaʼ achaan di ard warasathum al-daayme leehum.
[35] «Wa kan akhuuk fagri wa ma indah cheyy, saaʼidah achaan yagdar yiʼiich jambak hatta kan hu ajnabi aw deef kula.
[36] Ma tichiil faayde wa la riba min akhuuk. Wa be da, tiwassif khoofak minni ana Ilaahak wa tikhalli akhuuk yiʼiich jambak.
[37] Wa kan dayyant akhuuk gurus, ma tidayyinah be riba. Wa kan anteetah maʼaach, ma tichiilah minnah be faayde.
[38] Wa ana Allah Ilaahku bas al-maragtuku min balad Masir le nantuuku balad Kanʼaan achaan nabga Ilaahku.
[39] «Wa kan akhuuk indah deen wa baaʼ nafsah leek, ma tikhaddimah misil abid.
[40] Wa aamilah misil muʼajjar aw deef wa hu yabga leek khaddaam lahaddi sanit al-Hurriiye.
[41] Wa khalaas fi l-sana di, hu yamrug minnak be iyaalah wa yamchi le gabiiltah fi ard warasa hana juduudah.
[42] Achaan al-naas al-ana maragtuhum min balad Masir, humman abiidi. Ma waajib yibiiʼuuhum misil abiid.
[43] Wa ma waajib tamluk foogah be unuf. Wa be da, tiwassif khoofak minni ana Ilaahak.
[44] «Wa kan tidooru abiid wa khadiim al-yakhdumu leeku, intu achruuhum min al-umam al-muhawwigiinku.
[45] Wa battaan tagdaro tachru abiid min iyaal al-diifaan al-jo fi baladku aw min iyaal al-ajaanib al-wildoohum fi baladku. Humman dool yabgo abiidku halaalku.
[46] Wa tikhalluuhum warasa le zurriiyitku min baʼadku achaan humman yabgo hagguhum halaalhum wa yiʼabbuduuhum ila l-abad. Wa laakin kan le akhwaanku Bani Israaʼiil kamaan, ma fi ayyi waahid minhum yamluk fi l-aakhar be l-unuf.
[47] «Akuun ajnabi aw deef gaaʼid maʼaak wa indah gurus. Wa kan waahid min akhwaanak dayyan minnah wa yidoor yibiiʼ nafsah leyah aw le waahid min zurriiyit al-ajnabi da,
[48] khalaas akhuuk da indah hagg le yafdooh hatta baʼad al-beeʼ kula. Wa waahid min akhwaanah yagdar yafdaah.
[49] Aw immah aw wileed immah aw waahid min gariibiinah min gabiiltah kula yagdar yafdaah. Aw hu zaatah yagdar yifattich tariiga al-beeha yafda nafsah.
[50] Wa fi l-haala di, hu yistafig maʼa l-naadum al-charaah wa yahsib adad al-siniin ambeen al-sana al-baaʼ foogah nafsah wa sanit al-Hurriiye. Wa be da, taman al-beeʼ yukuun hasab adad al-siniin wa hasab taman al-ujra al-yoomiiye.
[51] Wa kan al-siniin al-faddalo katiiriin, hu yikaffi al-katiir min al-taman al-baaʼ beyah nafsah le yafdaaha wa yabga hurr.
[52] Wa kan al-siniin al-faddalo chiyya le yalhago sanit al-Hurriiye, hu yihaasibhum wa yigabbil al-taman hana l-fadayaanah hasab al-siniin.
[53] Wa min sana le sana hu yagood misil muʼajjar le siidah al-charaah. Wa laakin al-naadum al-charaah da ma yistaʼmalah be unuf.
[54] Wa kan fi kulla l-haalaat dool ma fadooh, hu yagood lahaddi sanit al-Hurriiye. Wa khalaas hu wa iyaalah yalgo al-hurriiye.
[55] «Achaan Bani Israaʼiil humman abiidi. Humman abiidi al-ana maragtuhum min balad Masir. Wa ana bas Allah Ilaahku.»