[1] Wa Allah hajja le l-nabi Irmiya kalaam bukhuss al-umam.
[2] Wa fi l-sana al-raabʼe hana hukum Yahuuyakhim wileed Yuuchiiya malik Yahuuza, al-deech da gaaʼid fi Karkamiich fi bahar al-Furaat wa Nabuukhadnasar malik Baabil haarabah wa annasar foogah. Wa da kalaam Allah al-bukhuss Masir wa deech Firʼoon Naku malik Masir. Hu gaal :
[3] «Jahhuzu al-darag kubaar wa dugaag wa yalla le l-harib !
[4] Chiddu al-kheel ! Wa arkabo, ya l-furraas ! Wa dissu tawaagiiku hana l-harib wa jahhuzu huraabku wa albaso duruuʼku.»
[5] Wa daahu kalaam Allah : «Maala ana chiftuhum yarjufu ? Humman gabbalo wara wa furraashum anhazamo. Humman arrado, arrado bala gabbiliin wa l-khoof jaahum min kulla bakaan.»
[6] Al-ajiil ma yinajji nafsah wa l-faaris kula ma yanja. Wa fi l-munchaakh fi khachum bahar al-Furaat, humman yittartaʼo wa yagaʼo.
[7] Wa yaatu al-yatlaʼ misil al-Niil ? Wa yaatu al-yatraʼ misil al-buhuur ?
[8] Di Masir tatlaʼ misil al-Niil wa tatraʼ misil al-buhuur. Hi tuguul : «Ana natlaʼ wa nikhatti al-ard wa nidammir mudun be sukkaanhum.
[9] Gummu wa ajru, ya l-kheel ! Ya siyaad arabaat al-harib, suugu misil majaaniin ! Amurgu, ya furraas al-Habacha wa Liibiya al-chaayliin al-darag wa furraas Luud al-yaʼarfu al-nubbaal.»
[10] Wa laakin al-yoom, da yoom Allah al-Rabb al-Gaadir wa da yoom kaffiin al-taar, yoom yichiil al-taar fi udwaanah. Wa fi l-yoom da, al-seef yaakul wa yachbaʼ laham wa yachrab wa yarwa damm. Achaan da dahiiye le Allah al-Rabb al-Gaadir fi balad al-munchaakh ale bahar al-Furaat.
[11] Ya Masir al-misil bineeye udriiye ! Yalla gummi amchi le turaab Gilʼaad wa fattichi dawa al-tamsahe. Wa kan tichiili dawa misil chunu kula ma fi dawa al-yidaawiiki.
[12] Wa l-umam yasmaʼo be chamaatitki wa siraakhki yamla al-ard. Achaan askarki al-waahid yittartaʼ fi l-aakhar wa yagaʼo humman al-itneen sawa.
[13] Wa wakit Nabuukhadnasar malik Baabil ja yihaarib balad Masir, daahu kalaam Allah al-gaalah le l-nabi Irmiya :
[14] «Khabburu balad Masir wa khalli hillaalha yasmaʼo wa humman Migduul wa Mamfiis wa Tahfaniis. Wa guulu leehum : ‹Gummu wa jahhuzu nufuusku achaan al-seef gaaʼid yaktul hawaaleeku !
[15] Maala ilaahki wagaʼ, ya Masir ? Maala ilaahki hana l-toor // ma gidir yasbit ? Wa da, achaan Allah ramaah.
[16] Wa Allah tartaʼ katiir minhum wa wagaʼo wa l-murtazakha gaalo ambeenaathum : “Yalla nugummu wa nigabbulu le ahalna wa namchu le baladna al-wildoona foogha wa niʼarrudu baʼiid min seef al-adu.”
[17] Wa yinaadu Firʼoon malik Masir be usum jadiid wa l-usum da Haraka Kabiire Saakit wa Khalla al-Fursa Faatat.›»
[18] Wa daahu kalaam al-malik wa hu Allah al-Gaadir : «Ana nahlif be usmi al-Hayy ! Al-adu jaayi. Hu tawiil misil jabal Taabuur // fi ust al-jibaal wa kabiir misil jabal al-Karmal // fi khachum al-bahar.
[19] Ya sukkaan Masir al-misil bineeye, tabbugu khumaamku le yiwadduuku fi l-khurba. Achaan hillit Mamfiis takhrab wa kharaabha yikhawwif wa tabga faadiye min sukkaanha.
[20] Wa Masir hi misil al-ijle al-samhe wa l-adu yajiiha min munchaakh misil dubbaan amboojani.
[21] Wa murtazakhatha gaaʼidiin fi usutha misil al-ajjaal al-sumaan. Wa laakin be sumunhum da kula, yiʼarrudu ma yasbutu. Achaan yoom al-kharaab ja leehum wa wakit ikhaabhum wagaʼ fooghum.
[22] Wa Masir tisaffir misil al-daabi al-muʼarrid achaan al-adu jaayi diddaha be deech kabiir. Wa jaayi foogha be faas misil gattaaʼiin al-chadar.
[23] Wa udwaanha yagtaʼo khaabitha hatta kan hi dalma kula. Achaan humman katiiriin min saar al-leel wa abadan ma yinhasbu. Wa da kalaam Allah.
[24] Masir al-misil bineeye yiʼayyubuuha wa yisallumuuha le chaʼab al-munchaakh.»
[25] Wa Allah al-Gaadir Ilaah Bani Israaʼiil gaal : «Akiid ana niʼaakhib Ammuun ilaah Tiiba. Wa niʼaakhib Masir wa ilaahaatha wa muluukha. Wa niʼaakhib Firʼoon wa l-yitwakkalo aleyah.
[26] Ana nisallimhum le l-yidooru moothum, le Nabuukhadnasar malik Baabil wa askarah. Wa laakin baʼadeen yaji wakit al-foogah Masir yaskunuuha misil zamaan.» Wa da kalaam Allah.
[27] «Wa intu, ya zurriiyit abdi Yaakhuub, ma takhaafo ! Wa ya Bani Israaʼiil, ma tinbahtu ! Akiid ana ninajjiiku // min al-balad al-baʼiide wa nijiib zurriiyitku // min balad al-khurba. Wa zurriiyit Yaakhuub yaju wa yagoodu fi baladhum // be raaha wa amaan wa akiid ma fi naadum yibachtinhum.
[28] Wa intu, ya zurriiyit abdi Yaakhuub, ma takhaafo achaan ana daayman nukuun maʼaaku. Wa ana nidammir marra waahid kulla l-umam al-ana chattattuku fi lubbuhum. Wa laakin intu, ma nidammirku marra waahid. Akiid ma najʼalku bariyiin wa laakin niʼaddibku be miiz.» Wa da kalaam Allah.