[1] Wa Allah gaal : «Zanib Bani Yahuuza manguuch be mungaach hana hadiid al-khachmah gawi misil al-maass. Wa maktuub fi guluubhum misil fi looh wa fi guruun madaabihhum.
[2] Wa misil yizzakkaro iyaalhum, humman yizzakkaro madaabih ilaahaathum wa l-iidaan al-khazzoohum // le ibaadat Achiira. Wa dool tihit ayyi chadara khadra wa fi raas ayyi jabal aali.
[3] Wa intu al-gaaʼidiin taʼabudu al-ilaahaat fi l-jibaal fi l-kadaade, khunaaku wa maalku, ana nisallimhum le l-nahib wa di natiijat zunuubku fi kulla arduku.
[4] Wa intu be nufuusku tikhallu ard warasatku al-ana anteetha leeku. Wa nisawwiiku abiid le udwaanku fi balad al-awwal ma taʼarfuuha achaan intu gabbadtu naar khadabi wa taakulku daayman.»
[5] Daahu Allah gaal : «Malʼuun al-naadum al-yitwakkal ale l-insaan wa yintakil ale gudrat al-jisim al-yumuut wa galbah yibaʼʼidah min Allah.
[6] Wa l-naadum da, hu misil chideere // al-gaayme fi l-nagaʼa wa hu abadan ma yichiif al-kheer. Hu yagood fi ard jafaaf sahara, fi ard al-ma tigawwim nabaat wa ma indaha sukkaan.
[7] Mubaarak al-insaan al-yitwakkal ale Allah wa yiʼaamin beyah fi kulla cheyy.
[8] Wa hu misil chadara al-gaayme // fi khachum al-bahar wa uruugha rawyaaniin almi. Hi ma takhaaf fi wakt al-seef wa warchaalha daayman akhdar. Wa kan taji sana kaamile hana jafaaf kula, hi ma lammaaha wa talda iyaalha.
[9] Galib al-insaan khachchaach // min kulla cheyy wa ma indah ilaaj. Naadum ma yagdar yaʼarfah.
[10] Illa ana Allah nijarrib galib al-insaan wa nakchif daakhilah. Wa nikaffiih natiijat amalah hasab derbah al-yichiilah.
[11] Wa l-insaan al-yifattich al-maal be najaada, hu misil teeraay al-tasrig beed al-aakhariin wa tifaggiʼah. Wa wakit hu lissaaʼ be gudurtah bas, maalah da yikammil wa fi aakhir ayyaamah, yabga matmuus be sahiih.»
[12] Fi arch aziim gaaʼid foog min zamaan wa da bakaan beetna al-mukhaddas.
[13] Ya Allah ! Inta acham Israaʼiil wa kulla l-yaabook, al-eeb yikhattiihum. Wa l-yibaʼʼudu minnak kamaan yilʼaakhabo achaan humman abo een almi al-haya wa da inta Allah.
[14] Achfiini, ya Allah, wa ana nalga al-chifa. Wa najjiini wa nalga al-naja achaan inta bas nahmudak.
[15] Wa gaalo leyi : «Ween kalaam Allah al-gaalah ? Khalli yilhaggag !»
[16] Ana ma talabt tinazzil fooghum al-fasaala wa la atmanneet yoom al-diige yanzil fooghum. Al-yamrug min khachmi daayman inta tasmaʼah wa taʼarfah, ya Allah !
[17] Wa khalli ma nakhaaf minnak achaan inta maljaʼi fi yoom al-fasaala.
[18] Wa l-yitaaruduuni, khalli al-eeb yakrubhum wa laakin ma yakrubni ana. Wa khalli humman yibarjulu wa laakin ana ma nibarjil. Wa jiib fooghum yoom al-fasaala wa dammirhum marra waahid.
[19] Wa daahu Allah gaal leyi : «Amchi agiif fi l-baab al-kabiir hana Madiinat al-Khudus al-beyah yadkhulu wa yamurgu muluuk mamlakat Yahuuza. Wa baʼad da, amchi agiif fi kulla biibaanha al-aakhariin.
[20] Wa hajji le muluuk Yahuuza wa naas Yahuuza wa sukkaan Madiinat al-Khudus al-yufuutu be l-biibaan dool. Wa guul leehum : ‹Asmaʼo kalaam Allah.
[21] Daahu Allah gaal : “Fakkuru fi nufuusku. Fi yoom al-sabt ma tichiilu tagala wa ma tufuutu beeha be biibaan Madiinat al-Khudus.
[22] Fi yoom al-sabt, ma tichiilu tagala wa tamurguuha min buyuutku wa ma tisawwu ayyi khidme. Wa laakin ajʼalo yoom al-sabt da yoom mukhaddas misil ana amart beyah juduudku.
[23] Wa laakin juduudku ma khatto adaanhum wa la simʼooni. Gawwo ruuseehum wa ma dawwaro yasmaʼooni ana wa la dawwaro yasmaʼo wasiiyti.
[24] «‹“Wa laakin intu, asmaʼooni adiil ! Fi yoom al-sabt, ma tichiilu tagala wa ma tufuutu beeha be biibaan al-madiina di. Wa ajʼalo yoom al-sabt da yoom mukhaddas wa ma tisawwu foogah ayyi khidme. Wa da kalaam Allah.
[25] Wa be da, khalaas yadkhulu be biibaan al-madiina di muluukku al-yagoodu fi kursi al-muluk hana Dawuud al-raakbiin fi arabaat harib wa kheel. Wa yadkhulu kubaaraathum wa naas balad Yahuuza wa sukkaan Madiinat al-Khudus kula. Wa l-hille di tukuun maskuuna ila l-abad.
[26] Wa khalaas, yaju naas min hillaal balad Yahuuza wa min hawaale Madiinat al-Khudus wa min ard gabiilat Banyaamiin wa min sahalat Chafiila wa min al-jibaal wa min saharat Nagab. Wa l-naas dool yaju le yigaddumu dahaaya muharragiin wa dahaaya aakhariin wa hadaaya hana dagiig wa lubaan. Wa da kulla yijiibuuh le beet Allah le yachkuruuh.
[27] «‹“Wa laakin kan ma tasmaʼo kalaami wa ma tajʼalo yoom al-sabt yoom mukhaddas wa kan tichiilu al-tagala wa tufuutu beeha be biibaan Madiinat al-Khudus fi yoom al-sabt da, khalaas ana nigabbid naar fi biibaan Madiinat al-Khudus al-taakul kulla buyuutha al-samhiin wa ma tumuut abadan.”›»