[1] Wa yoom waahid, kubaaraat waahidiin simʼo al-kalaam al-gaaʼid yuguulah Irmiya le kulla l-chaʼab wa humman Chafatya wileed Mattaan wa Gadaalya wileed Fachhuur wa Yahuukal wileed Chalamya wa Fachhuur wileed Malkiiya. Irmiya gaal le l-chaʼab :
[2] «Daahu Allah gaal : ‹Al-naadum al-yagood fi l-madiina di yumuut be l-harib wa be l-juuʼ wa be l-waba. Wa laakin al-yamrug minha wa yisallim nafsah le askar Baabil, hu da yiʼiich wa yabga farhaan achaan hu ligi al-haya.›
[3] Wa daahu Allah gaal battaan : ‹Akiid al-madiina di tagaʼ fi iid askar malik Baabil wa humman yichiiluuha.›»
[4] Wa l-kubaaraat dool gaalo le l-malik : «Al-naadum da, waajib yumuut ! Achaan hu bas gaaʼid yikhawwif al-askar al-faddalo fi l-madiina wa kulla l-chaʼab be kalaamah da. Hu ma yidoor al-kheer le l-chaʼab da wa laakin yidoor leehum al-fasaala.»
[5] Wa l-malik Sidkhiiya radda wa gaal : «Daahu fi iidku wa sawwu foogah al-tidooruuh. Ana al-malik kula ma nagdar nadharku min cheyy.»
[6] Wa khalaas, humman chaalo Irmiya wa zagalooh fi nugra al-yakhzunu foogha almi. Wa l-nugra di hint Malkiiya min zurriiyit al-mamlaka wa gaaʼide fi fadaayit al-hurraas. Wa humman nazzalooh le Irmiya fi lubbaha be hubaal. Wa l-nugra di ma indaha almi illa l-tiine bas wa Irmiya dakhal fi lubb al-tiine di.
[7] Wa fiyah raajil waahid Habachi usmah Abdalmalik wa hu masʼuul kabiir fi gasir al-malik. Wa simiʼ kadar Irmiya zagalooh fi l-nugra. Wa fi l-wakit daak, al-malik gaaʼid fi baab al-madiina al-usmah Banyaamiin.
[8] Wa Abdalmalik marag min al-gasir wa gaal le l-malik :
[9] «Ya siidi al-malik ! Al-naas dool sawwo al-fasil le l-nabi Irmiya wakit zagalooh fi l-nugra. Wa fi l-nugra di akuun hu yumuut be l-juuʼ achaan hassaʼ fi l-madiina di kula, ma fi khubza.»
[10] Wa l-malik anta amur le Abdalmalik al-Habachi wa gaal : «Chiil min hini 30 raajil wa amchi amrug al-nabi Irmiya min al-nugra di, gubbaal ma yumuut.»
[11] Wa Abdalmalik chaal al-rujaal dool wa macha le gasir al-malik fi khurfa tihit al-makhazan wa marag khulgaan gadiimiin wa mucharratiin. Wa nazzalaahum le Irmiya fi l-nugra be hubaal.
[12] Wa Abdalmalik gaal le Irmiya : «Min fadlak, chiil al-khulgaan al-gadiimiin dool wa khuttuhum fi ubutteek ambeenak wa been al-hubaal.» Wa Irmiya sawwa misil Abdalmalik gaalah leyah.
[13] Wa humman jabado Irmiya be l-hubaal wa maragooh min al-nugra. Wa be da, Irmiya gaʼad fi fadaayit al-hurraas.
[14] Wa baʼad da, al-malik Sidkhiiya rassal jaabah le l-nabi Irmiya wa khattaah jambah fi l-madkhal al-taalit fi beet Allah. Wa l-malik gaal le Irmiya : «Ana nasʼalak cheyy waahid wa ma tilabbid leyi cheyy !»
[15] Wa Irmiya gaal leyah : «Kan gult leek al-sahiih, inta taktulni wa kan anteetak wasiiye kula, ma tichiilha !»
[16] Wa laakin al-malik Sidkhiiya halaf be achiir le Irmiya wa gaal : «Ana nahlif be usum Allah al-Hayy al-khalagaana, ma naktulak wa la nisallimak le l-yidooru mootak.»
[17] Wa khalaas, Irmiya gaal le l-malik Sidkhiiya : «Daahu Allah al-Ilaah al-Gaadir Ilaah Bani Israaʼiil gaal : ‹Kan inta maragt le khuyyaad malik Baabil wa sallamt nafsak leehum, tinajji hayaatak wa l-madiina di kula ma yiharruguuha. Wa inta wa aayiltak tiʼiichu be salaam.
[18] Wa laakin kan inta ma maragt le khuyyaad malik Baabil wa sallamt nafsak leehum, khalaas al-madiina di, al-Baabiliyiin yichiiluuha wa yiharruguuha wa inta kula ma tanja minhum.›»
[19] Wa malik Sidkhiiya gaal le Irmiya : «Ana khaayif min al-Yahuud al-andammo maʼa l-Baabiliyiin. Nakhaaf yisallumuuni leehum wa humman yiʼazzubuuni.»
[20] Wa Irmiya radda leyah wa gaal : «Al-Baabiliyiin ma yisallumuuk leehum. Ya l-malik ! Asmaʼ kulla kalaam Allah al-gaaʼid nuguulah leek ! Wa be da, inta tukuun be kheer wa hayaatak kula tanja.
[21] Wa laakin kan abeet ma tisallim nafsak le l-Baabiliyiin, daahu al-cheyy al-Allah wassafaani leyah.
[22] «Kulla l-awiin al-faddalan fi gasir malik Yahuuza yiwadduuhin le khuyyaad malik Baabil. Wa hinna yikhannan foogak wa yuguulan : ‹Mustachaariinak al-aamantuhum khaanook lahaddi hazamook wa wakit rijileenak dakhalo fi l-tiine, khallook.›
[23] «Wa kulla awiinak wa iyaalak yakurbuuhum wa yiwadduuhum le l-Baabiliyiin. Wa inta zaatak ma tanja min malik Baabil. Hu yakurbak wa yiharrig al-madiina di.»
[24] Wa Sidkhiiya gaal le Irmiya : «Kan inta ma tidoor tumuut da, khalli naadum ma yasmaʼ al-kalaam al-gulna maʼaak.
[25] Wa kan masaaʼiili simʼo kadar ana naadeetak, akuun yaju wa yuguulu leek : ‹Kallimna be l-kalaam al-gultah le l-malik wa l-kalaam al-malik gaalah leek. Ma tilabbid leena cheyy wa be da, aniina ma naktuluuk.›
[26] Khalaas, inta guul leehum : ‹Ana chahadt al-malik bas achaan ma yigabbilni battaan le beet Yuunataan achaan ana nakhaaf numuut hinaak.›»
[27] Wa baʼad da, kulla masaaʼiil Sidkhiiya jo le Irmiya wa saʼalooh wa hu radda leehum sawa sawa misil al-malik amarah beyah. Wa khalaas, humman sakato wa gabbalo achaan al-achiir da ma ligooh.
[28] Wa Irmiya gaʼad fi fadaayit al-hurraas lahaddi yoom chaalo Madiinat al-Khudus. Wa baʼad da, Madiinat al-Khudus wagaʼat.