[1] Fi chaan maslahat Sahyuun, ana ma naskut. Aywa, fi chaan maslahat Madiinat al-Khudus, ma nagood saakit lahaddi adaalitha tiraari // misil nuur al-sabaah wa najaatha misil deyy al-muchhaab.
[2] Khalaas, ya Madiinat al-Khudus, al-umam yichiifu adaalitki wa kulla l-muluuk yichiifu azamatki. Wa l-naas yinaaduuki be usum jadiid al-yisammiiki beyah Allah.
[3] Inti tabge misil taaj al-azama // fi iid Allah aywa, misil kadmuul al-muluk // fi iid Ilaahki.
[4] Battaan ma yinaaduuki al-Khallooha wa ardiki ma yisammuuha al-Kharbaane. Laakin yinaaduuki al-Allah Ridi Beeki wa ardiki yisammuuha al-Mutazawwije. Achaan Allah yafrah beeki wa yabga le ardiki misil zoojha.
[5] Misil sabi yaakhud bineeye udriiye, awlaadki yakurbuuki. Wa misil al-aruus tabga farah le raajilha, inti kula tabge farah le Ilaahki.
[6] Wa fi daraadirki, ya Madiinat al-Khudus, ana khatteet hurraas // be l-leel wa l-nahaar wa abadan ma yaskutu. Intu al-tizzakkaro Allah, khalli ma tinjammo.
[7] Wa ma tikhallu leyah jumma lahaddi yisabbit Madiinat al-Khudus wa hi tabga chukur fi l-ard.
[8] Wa be iidah al-zeene // wa be duraaʼah al-gawi, Allah sawwa al-haliife di : «Battaan ma nanti gamehki le udwaanki yaakuluuh. Wa iyaal al-ajaanib ma yacharbo battaan khamarki al-jadiid al-tiʼibti foogah.
[9] Wa laakin al-yilimmu al-gameh yaakuluuh wa yachkuru Allah. Wa l-yilimmu al-inab yacharbo asiirah fi fadaayit beeti al-mukhaddas.»
[10] Fuutu ! Fuutu be l-biibaan wa jahhuzu derib le chaʼabi. Addulu ! Addulu al-derib wa amurgu al-hujaar wa arfaʼo raaye le l-chaʼab.
[11] Wa daahu Allah khabbar lahaddi aakhir al-ard wa gaal : «Guulu le sukkaan Sahyuun al-misil bineeye : ‹Daahu munajjiiku jaayi wa maahiiytah maʼaayah wa giddaamah mukaafaatah.›»
[12] Yisammuuhum al-Chaʼab al-Mukhassas wa l-Fadaahum Allah. Wa inti, ya Madiinat al-Khudus, ma yinaaduuki // al-Madiina al-Khallooha wa laakin al-Madiina al-Mahbuuba.