[1] «Naadi be tuul hissak ! Ma taskut ! Arfaʼ hissak misil al-buug ! Wa khabbir chaʼabi be isyaanhum aywa, khabbir zurriiyit Yaakhuub be zunuubhum !
[2] Laakin kulli yoom humman yifattuchuuni ana wa yidooru yaʼarfu duruubi misil umma al-titabbig al-adaala wa ma khallat chariiʼat Ilaahha wa misil yidooru minni chariiʼa aadile wa yiriidu yigarrubu leyi.
[3] Wa laakin yuguulu leyi : ‹Maala kan nusuumu, inta ma tichiif siyaamna ? Wa kan nimaskunu nufuusna, inta ma tihtamma beyah ?› Achaan fi yoom siyaamku, intu tifattuchu faayditku wa tidaayugu kulla khaddaamiinku !
[4] Wa daahu al-cheyy al-intu gaaʼidiin tisawwuuh fi siyaamku. Intu tihaaruju wa tisawwu machaakil wa tadurbu amdarduum be zulum. Wa fi yoom hana siyaam misil da, salaatku di, ana ma nasmaʼha.
[5] Wa l-siyaam al-ana narda beyah, hu misil da walla ? Illa yoom waahid bas, al-foogah al-insaan yimaskin nafsah walla ? Wa yarkhi raasah misil ageegaay al-mardaane wa yalbas khalag al-tooba wa yargud fi rumaad walla ? Da bas tinaaduuh siyaam walla ? Wa yoom siyaam misil da, ana Allah narda beyah walla ?
[6] «Wa laakin daahu al-siyaam al-ana narda beyah. Fukku al-masaajiin // al-sajanoohum be zulum wa dallu al-tagala min rigaabhum. Wa khallu al-mazluumiin // yamchu hurriin wa arfaʼo minhum kulla l-tagala.
[7] Wa waajib tigassim aklak maʼa l-jiiʼaan wa tisakkin al-miskiin // al-ma indah beet. Wa l-aryaan, taksiih wa min dammak wa lahamak, // ma tillabbad.»
[8] «Wa be da, nuurak yibiin // misil deyy al-sabaah wa chifaak yabga ajala ! Wa adaaltak tuguudak wa majd Allah yahfadak.
[9] Wa khalaas wakit tinaadi, Allah yurudd leek. Wa wakit tikoorik le l-fazaʼ, hu yuguul leek : ‹Daahuuni.› Wa kan tikhalli minnak al-mudaayaga wa l-warwaraan wa l-kalaam al-fasil,
[10] wa kan tanti aklak le l-jiiʼaan wa tamla batun al-taʼbaan, khalaas nuurak yibiin fi l-dalaam wa l-dalaam yabga leek // misil deyy al-gaayle.
[11] Wa daayman Allah yuguudak wa yachbiʼak fi l-ard al-jafaaf wa yigawwiik. Wa inta tabga misil jineene al-mazgiiye wa misil een almi al-daayman jaariye.
[12] Wa be sababak inta, al-naas yabnu al-muhaddam min zamaan. Wa inta tabni battaan fi l-asaas hana l-zurriiyaat al-faato. Al-naas yinaaduuk Saddaad al-Khuram wa Addaal Chawaariʼ al-Madiina le Yaskunuuha.»
[13] «Kan inta ma takhdim fi yoom al-sabt wa ma tisawwi cheyy le maslahatak fi l-yoom al-mukhassas, wa kan tinaadi al-sabt yoom hana farah wa tajʼal yoom Allah // yoom mukhassas, wa kan tikarrimah wa ma tisawwi // ayyi cheyy hasab niiytak wa ma tifattich maslahatak // wa la tikallim kalaam fasil,
[14] khalaas, maʼaayi ana Allah, talga al-farah wa niwaddiik be l-nasur fi l-bakaanaat al-aaliyiin // hana l-balad. Nantiik maʼaach min ard warasat jiddak Yaakhuub.» Wa da kalaam Allah al-gaalah.