[1] «Daahu abdi al-ana gaaʼid nisaaʼidah wa hu bas al-ana ikhtirtah // wa firiht beyah. Ana khatteet ruuhi foogah wa hu yibayyin al-adaala le l-umam.
[2] Wa la yasrakh wa la yarfaʼ hissah wa la kalaamah yinsamiʼ fi l-chawaariʼ.
[3] Hu ma yaksir ageegaay mafjuukha wa la yaktul deyy al-faanuus // al-gariib yumuut. Wa be l-hagg, hu yibayyin adaalit Allah.
[4] Hu ma yadʼaf wa la yafchul, hu yisabbit al-adaala fi l-ard. Wa chuʼuub al-jazaayir yarjo wasiiyaatah.»
[5] Daahu kalaam Allah al-Rabb, hu al-khalag al-samaawaat wa mattaahum wa falla al-ard wa kulla cheyy al-gaaʼid foogha. Wa anta al-haya le l-chuʼuub al-aaychiin fiiha wa anta al-nafas le l-yamchu foogha. Hu gaal :
[6] «Ana Allah naadeetak le l-adaala wa karabt iidak. Ana hafadtak wa sabbattak le nisawwiik tabga muʼaahada le l-chaʼab wa nuur le l-umam.
[7] Inta taftah uyuun al-amyaaniin wa tamrug al-masaajiin min al-sijin wa tatlig al-saakniin fi dalaam al-suluulu.
[8] Ana Allah. Wa da usmi ! Wa majdi, ma nantiih le l-aakhar wa hamdi, ma nantiih le l-asnaam !
[9] Al-achya al-awwal faato khalaas. Daahu nikhabbirku be khabar jadiid, gubbaal ma yaji, ana nisammiʼku beyah.»
[10] Khannu le Allah khine jadiid. Khannu be hamdah min taraf al-ard le tarafha. Khannu, intu al-tuchuggu al-bahar wa intu al-makhluugiin // al-saakniin foogah wa kulla jazaayir al-bahar // wa sukkaanhum !
[11] Wa khalli naas al-kadaade wa mudunha yarfaʼo hissuhum wa l-hillaal al-saakniin fooghum gabiilat Khidaar kula. Wa khalli sukkaan madiinat Saalaʼ yizakhrutu wa min ruuse al-jibaal, // yiʼiitu be farah.
[12] Wa khalli yimajjudu Allah wa yikhabburu be hamdah fi jazaayir al-bahar.
[13] Allah yamrug misil faaris wa misil raajil al-muhaarib, // hu yakhdab. Wa yiʼiit wa yikoorik wa yinnasir fi udwaanah.
[14] «Min wakit tawiil, ana gaaʼid // bala haraka, ana sakkat nafsi wa sabbattaha. Laakin hassaʼ, nagnit misil mara al-gaaʼide titaalig wa nanfukh wa ninaahij.
[15] Ana nakhrib al-jibaal wa l-hujaar wa niyabbis kulla l-gechch al-fooghum. Nisawwi al-buhuur jazaayir wa niyabbis al-ruhuud.
[16] Wa niwaddi al-amyaaniin fi derib al-humman ma yaʼarfuuh. Ana nuguudhum fi turug al-ma yaʼarfuuhum. Fi giddaamhum, ana nikhayyir al-dalaam be l-nuur wa l-bakaan al-dagdaag, nisawwiih amlas. Al-kalaam da, ana nihaggigah wa abadan al-naas dool ma nikhalliihum.
[17] Laakin al-yitwakkalo ale l-asnaam wa l-yuguulu le l-suwar hana l-hadiid : ‹Intu bas ilaahaatna›, humman dool yigabbulu wara wa yalgo al-eeb.»
[18] «Intu al-turuch, asmaʼo ! Wa intu al-amyaaniin, // chiifu wa anzuru !
[19] Yaatu amyaan bala abdi ? Wa yaatu tarchaan // misil rasuuli al-nirassilah ! Yaatu amyaan // misil al-ana azaltah wa amyaan misil abdi ana Allah ?
[20] Inta chift katiir wa laakin ma hafadt cheyy wa udneek maftuuhiin wa laakin ma tasmaʼ.»
[21] Wa be sabab adaaltah, Allah firih wa yicharrif churuutah hana l-Tawraat.
[22] Daahu al-chaʼab dool nahaboohum wa kasaboohum ! Wa fi l-charak, ramoohum wa fi l-nugaar dassoohum wa fi l-sujuun, dakhkhaloohum. Misil kasiibe, karaboohum wa ma fi naadum al-yinajjiihum. Wa nahaboohum wa ma fi naadum al-yuguul : «Gabbuluuhum !»
[23] Yaatu minku al-yaftah adaanah le l-kalaam da ? Wa yaatu yukhutt baalah wa yasmaʼah fi l-mustakhbal ?
[24] Yaatu al-sallam zurriiyit Yaakhuub le l-nahhaabiin wa Bani Israaʼiil le l-kasaboohum ? Da ma Allah, al-aniina aznabna diddah ? Wa abeena ma taabaʼna derbah wa ma simiʼna churuutah hana l-Tawraat.
[25] Khalaas fi Bani Israaʼiil, hu nazzal khadabah wa naar zaʼalah al-chadiid hana l-harba. Wa l-naar di akalat kulla hawaaleehum wa humman ma irfooh wa haragathum wa ma ligo ilim.