[1] Daahu ! Iid Allah ma gisayre le tinajjiiku wa adaanah ma tagiile le tasmaʼku !
[2] Wa laakin da khataaku bas al-faragaaku min Ilaahku. Wa be sabab zunuubku bas, hu ma wajjah aleeku wa khalaas, hu ma yasmaʼku.
[3] Achaan iideeku mulattakhiin be l-damm wa asaabiʼku be l-khata. Khuchuumku yikallumu be l-kidib wa lisneeku yikhaalu be l-khachch.
[4] Ma fi naadum yachki be adaala wa ma fi naadum al-yahkim be l-hagg. Laakin yitwakkalo ale l-faadi wa yihajju be kidib wa yahmalo be l-fasaala wa yaldo al-charr.
[5] Yifagguʼu beed abundarag wa yitirru hubaal abunchabach. Al-naadum al-yaakul min beedhum yumuut wa l-beedaay al-tinkasir, tawwaali tamrug minha amchideegaat.
[6] Hubaal abunchabach dool // ma yagdaro yilabbusuuhum wa khidmithum di ma tikhattiihum. Wa khidmithum di, khidmit charr wa amal al-unuf fi kafaafeehum.
[7] Rijleehum yajru le l-charr wa yissaʼjalo le daffigiin // damm al-bari. Fikirhum fikir hana fasaala wa l-damaar wa l-kharaab fi deribhum.
[8] Wa ma yaʼarfu derib al-salaam wa amalhum ma adiil. Duruubhum al-sawwoohum uwuj wa ayyi naadum al-yamchi fooghum ma yaʼarif al-salaam.
[9] Naas Madiinat al-Khudus gaalo : «Fi chaan da, al-hagg bigi baʼiid minnina wa l-adaala ma lihgatna. Khatteena achamna fi l-nuur wa daahu ligiina al-dalaam wa gaaʼidiin narjo al-nahaar wa laakin rukhna fi l-dalaam.
[10] Niddaggacho misil amyaaniin fi l-daraadir aywa, niddaggacho misil al-ma induhum uyuun. Wa gaayle bas, nittartaʼo misil fi l-leel wa fi lubb al-naas al-taybiin, // bigiina misil al-maytiin.
[11] Wa kullina nikirru misil diidaan wa nabku min al-hizin misil gimri. Khatteena achamna fi l-adaala laakin ma fi cheyy wa khatteena achamna fi l-naja laakin baʼiid minnina.
[12] Ya Rabb, isyaanna bigi katiir giddaamak wa zunuubna chahado foogna. Nifakkuru daayman fi isyaanna wa khataana kula naʼarfuuh.
[13] Kadabna wa isiina Allah wa abeena ma taabaʼna Ilaahna. Hajjeena illa be zulum wa muʼaamara didd al-aakhariin wa guluubna malaaniin be kalaam kidib.
[14] Be da, al-hagg kaskas wara wa l-adaala wagafat baʼiid. Al-sahiih yittartaʼ fi l-chawaariʼ wa l-amaan ma yagdar yaji.
[15] Al-hagg bigi ma fiih wa l-yibaʼʼid min al-fasaala // yabga khaniime !» Allah chaaf al-adaala waddarat wa hu khidib.
[16] Hu chaaf kadar ma fi naadum wa aasif ma fi naadum addakhkhal. Wa khalaas, hu zaatah gamma rafaʼ duraaʼah wa jaab al-naja wa adaaltah antatah gudra.
[17] Hu libis al-adaala misil direʼ wa khatta taagiiyit al-naja fi raasah. Hu libis khalag al-taar misil ibaaya wa ankasa be l-khiira // misil jallaabiiye.
[18] Khalaas, Allah yikaafi ayyi naadum hasab amalah wa yakhdab le khusmaanah wa yijaazi udwaanah wa yikaafi sukkaan al-jazaayir hasab amalhum.
[19] Min bakaan taluuʼ al-harraay, yakhaafo min usum Allah wa min bakaan waguuʼha, yakhaafo min majdah. Achaan hu yaji be chidde misil seel al-tilizzah nafkhat Allah.
[20] «Khalaas, al-yafdaahum yaji le Sahyuun, le zurriiyit Yaakhuub // al-yigabbulu min isyaanhum.» Wa da kalaam Allah.
[21] Wa Allah gaal : «Kan leyi ana, di muʼaahadati maʼaahum. Ruuhi gaaʼid foogak wa khatteet kalaami fi khachmak. Wa abadan ma nichiilhum min khachmak wa la min khuchuum zurriiytak wa la min khuchuum zurriiyit zurriiytak, min hassaʼ wa ila l-abad.»