[1] وَ يُوتَامْ عِنْدَهْ 25 سَنَةْ وَكِتْ بِقِي مَلِكْ وَ حَكَمْ 16 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا يَرُوشَةْ بِنَيَّةْ صَدُوقْ.
[2] يُوتَامْ سَوَّى الْعَدِيلْ قِدَّامْ اللّٰهْ مِثِلْ أَبُوهْ عُزِّيَّا سَوَّاهْ لَاكِنْ يُوتَامْ مَا خِطِي بِدَخِلِينْ فِي بَيْت اللّٰهْ. وَ لَاكِنْ بِعَدَالْتَهْ دِي كُلَ، الشَّعَبْ قَاعِدِينْ يِتَلُّفُوا.
[3] وَ هُو عَدَّلْ الْبَابْ الْفَوْقَانِي هَنَا مَدَخَلْ بَيْت اللّٰهْ وَ بَنَى الدُّرْدُرْ هَنَا حَارَةْ عُفَلْ.
[4] وَ بَنَى حِلَّالْ فِي جِبَالْ يَهُوذَا وَ مُدُنْ قَوِيِّينْ وَ بُيُوتْ طُوَالْ هَنَا الْمُرَاقَبَةْ فِي الْغَابَةْ.
[5] يُوتَامْ حَارَبْ بَنِي عَمُّونْ وَ أَنَّصَرْ فَوْقهُمْ. وَ فِي السَّنَةْ دِي، بَنِي عَمُّونْ أَنْطَوْه زِيَادَةْ مِنْ 3 400 كِيلَوْ هَنَا فُضَّةْ وَ 25 000 شُوَالْ هَنَا قَمَحْ أَحْمَرْ وَ 25 000 شُوَالْ هَنَا قَمَحْ أَبْيَضْ. وَ أَنْطَوْه نَفْس الْهَدَايَا فِي السَّنَةْ التَّانِيَةْ وَ التَّالْتَةْ كُلَ.
[6] وَ يُوتَامْ بِقِي شَدِيدْ مِثِلْ كَيْ أَشَانْ ثَبَّتْ دَرْبَهْ قِدَّامْ اللّٰهْ إِلٰـهَهْ.
[7] وَ الْبَاقِي مِنْ عَمَلْ يُوتَامْ وَ كُلَّ الْحُرُوبْ السَّوَّاهُمْ وَ خِدِمْتَهْ مَكْتُوبِينْ فِي كِتَابْ مُلُوكْ بَنِي إِسْرَائِيلْ وَ بَنِي يَهُوذَا.
[8] يُوتَامْ عِنْدَهْ 25 سَنَةْ وَكِتْ بِقِي مَلِكْ وَ حَكَمْ 16 سَنَةْ فِي مَدِينَةْ الْقُدُسْ.
[9] وَ يُوتَامْ مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ دَاوُدْ. وَ وِلَيْدَهْ أَحَازْ حَكَمْ فِي بَدَلَهْ.