[1] وَ كُلَّ شَعَبْ مَمْلَكَةْ يَهُوذَا شَالَوْا عُزِّيَّا وَكِتْ عِنْدَهْ 16 سَنَةْ وَ دَرَّجَوْه مَلِكْ فِي بَدَلْ أَبُوهْ أَمَصْيَا.
[2] وَ بَعَدْ أَبُوهْ مَاتْ وَ لِحِقْ أَبَّهَاتَهْ، عُزِّيَّا شَالْ حِلَّةْ إِيلَاتْ وَ قَوَّاهَا وَ قَبَّلْهَا لِمَمْلَكَةْ يَهُوذَا.
[3] وَ عُزِّيَّا عِنْدَهْ 16 سَنَةْ وَكِتْ بِقِي مَلِكْ وَ حَكَمْ 52 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا يَكُلْيَا وَ هِي مِنْ مَدِينَةْ الْقُدُسْ.
[4] وَ عُزِّيَّا سَوَّى الْعَدِيلْ قِدَّامْ اللّٰهْ مِثِلْ أَبُوهْ أَمَصْيَا سَوَّاهْ.
[5] وَ هُو قَاعِدْ يِتَابِعْ الرَّبّ فِي كُلَّ مُدَّةْ حَيَاةْ زَكَرِيَّا الْقَاعِدْ يِعَلِّمَهْ مَخَافَةْ اللّٰهْ. وَ وَكِتْ عُزِّيَّا قَاعِدْ يِتَابِعْ اللّٰهْ، هُو أَنْطَاهْ النَّجَاحْ.
[6] وَ عُزِّيَّا مَشَى حَارَبْ الْفِلِسْطِيِّينْ وَ كَسَّرْ دَرَادِرْ مُدُنْهُمْ قَاتْ وَ يَبْنِي وَ أَشْدُودْ. وَ بَعَدْ دَا، قَوَّى مُدُنْ الْفِي مَنْطَقَةْ أَشْدُودْ وَ فِي بَكَانَاتْ آخَرِينْ هَنَا بَلَدْ الْفِلِسْطِيِّينْ.
[7] وَ الرَّبّ فَزَعَهْ وَكِتْ حَارَبْ الْفِلِسْطِيِّينْ وَ الْعَرَبْ السَّاكْنِينْ فِي حِلَّةْ قُورْ بَعَلْ وَ الْمَعُونِيِّينْ.
[8] وَ الْمَعُونِيِّينْ أَنْطَوْا هَدَايَا لِعُزِّيَّا. وَ أُسْمَهْ بِقِي طَالِعْ وَ سِمْعَوْا بَيَّهْ لَحَدِّي حُدُودْ مَصِرْ أَشَانْ هُو بِقِي شَدِيدْ مَرَّةْ وَاحِدْ.
[9] وَ فِي مَدِينَةْ الْقُدُسْ بِفَوْق لِبَابْ الرُّكُنْ وَ بِفَوْق لِبَابْ الْوَادِي وَ فِي الْبَكَانْ الدُّرْدُرْ يِلِمّ فِي الرُّكُنْ، عُزِّيَّا بَنَى بُيُوتْ الْمُرَاقَبَةْ وَ قَوَّاهُمْ
[10] وَ بَنَى بُيُوتْ الْمُرَاقَبَةْ فِي الصَّحَرَاء وَ نَكَتْ بِيَارْ كَتِيرِينْ أَشَانْ هُو عِنْدَهْ بَهَايِمْ كَتِيرِينْ الْقَاعِدِينْ فِي سَهَلَةْ شَفِيلَةْ وَ فِي سُهُولْ آخَرِينْ. وَ هُو عِنْدَهْ حَرَّاتِينْ الْعِنَبْ فِي رَاسْ جَبَلْ الْكَرْمَلْ أَشَانْ هُو يِحِبّ الْحِرَاتَةْ.
[11] وَ عُزِّيَّا عِنْدَهْ دَيْش شَدِيدْ وَ جَاهِزْ لِلْحَرِبْ. وَ الدَّيْش دَا مُقَسَّمْ عَلَيْ مَجْمُوعَاتْ حَسَبْ الْحِسَابْ السَّوَّاهْ الْكَاتِبْ يَعِيِيلْ وَ الْمُكَلَّفْ مَعَسِيَّا وَ دَا فِي تِحِتْ مُرَاقَبَةْ حَنَنْيَا وَاحِدْ مِنْ مَسَائِيلْ الْمَلِكْ.
[12] وَ كُلَّ شُيُوخْ الْعَايِلَةْ وَ الرُّجَالْ الْفُرَّاسْ عَدَدْهُمْ 2 600.
[13] وَ تِحِتْ أَمُرْهُمْ عِنْدُهُمْ دَيْش هَنَا 307 500 عَسْكَرْ شُدَادْ الْيِحَارُبُوا بِقُدْرَةْ وَ شَجَاعَةْ أَشَانْ يِدَافُعُوا لِلْمَلِكْ مِنْ عُدْوَانَهْ.
[14] وَ وَكِتْ يَمُرْقُوا لِلدُّوَاسْ، عُزِّيَّا يِجَهِّزْ لَيْهُمْ دَرَقْ وَ حُرَابْ وَ طَوَاقِي مِنْ نَحَاسْ وَ دِرِعْ وَ نَشَاشِيبْ وَ حُجَارْ لِلْمِقْلَاعْ.
[15] وَ فِي مَدِينَةْ الْقُدُسْ، عُزِّيَّا سَوَّى مَكَنَاتْ هَنَا حَرِبْ وَ دَا بِفِكِرْ هَنَا صِنَاعِي مَعْرُوفْ. وَ يُخُطُّوا الْمَكَنَاتْ دَوْل فِي بُيُوتْ الْمُرَاقَبَةْ وَ فِي أَرْكَانْ الدُّرْدُرْ أَشَانْ بِالْمَكَنَاتْ دَوْل يِزَرُّقُوا نَشَاشِيبْ وَ حُجَارْ كُبَارْ. وَ أُسُمْ عُزِّيَّا بِقِي طَالِعْ أَشَانْ لِقِي مُسَاعَدَةْ عَجِيبَةْ لَحَدِّي بِقِي شَدِيدْ فِي حُكْمَهْ.
[16] وَ لَاكِنْ وَكِتْ عُزِّيَّا بِقِي شَدِيدْ، هُو بَدَا يِسْتَكْبَرْ لَحَدِّي عِصِي اللّٰهْ إِلٰـهَهْ وَ جَابْ الدَّمَارْ لِنَفْسَهْ. هُو دَخَلْ فِي بَيْت اللّٰهْ وَ حَرَّقْ بَخُورْ فِي مُخْبَرْ الْبَخُورْ.
[17] وَ عَزَرْيَا كَبِيرْ رُجَالْ الدِّينْ دَخَلْ وَرَايَهْ مَعَ 80 رُجَالْ دِينْ هَنَا اللّٰهْ فَحَلِينْ.
[18] وَ هُمَّنْ قَمَّوْا ضِدّ الْمَلِكْ عُزِّيَّا وَ قَالَوْا لَيَّهْ: «يَا عُزِّيَّا، مَا عِنْدَكْ حَقّ تَحْرِقْ الْبَخُورْ فِي بَيْت اللّٰهْ. دِي خِدْمَةْ رُجَالْ الدِّينْ مِنْ ذُرِّيَّةْ هَارُونْ الْخَصَّصَوْهُمْ لِيِحَرُّقُوا الْبَخُورْ. يَلَّا أَمْرُقْ مِنْ الْبَيْت الْمُقَدَّسْ دَا أَشَانْ إِنْتَ عِصِيتْ اللّٰهْ! وَ خِدِمْتَكْ دِي مَا تِجِيبْ لَيْك شَرَفْ قِدَّامْ اللّٰهْ الرَّبّ.»
[19] وَ عُزِّيَّا عِنْدَهْ فِي إِيدَهْ الْمُخْبَرْ الْيِحَرُّقُوا فَوْقَهْ الْبَخُورْ. وَ هُو زِعِلْ مِنْ رُجَالْ الدِّينْ. وَ طَوَّالِي وَكِتْ هُو قَاعِدْ قِدَّامْ رُجَالْ الدِّينْ فِي بَيْت اللّٰهْ جَنْب مُخْبَرْ الْبَخُورْ، الْجِدَامْ مَرَقْ فِي جَبْهِتَهْ.
[20] وَكِتْ عَزَرْيَا كَبِيرْ رُجَالْ الدِّينْ وَ كُلَّ رُجَالْ الدِّينْ الْآخَرِينْ أَنْلَفَتَوْا عَلَيَّهْ وَ شَافَوْا الْجِدَامْ فِي جَبْهِتَهْ، طَوَّالِي مَرَقَوْه مِنْ الْبَكَانْ دَا. هُو ذَاتَهْ أَسَّعْجَلْ لِيَمْرُقْ أَشَانْ اللّٰهْ نَزَّلْ فَوْقَهْ الْمَرَضْ دَا.
[21] وَ عُزِّيَّا قَعَدْ مُجَدِّمْ لَحَدِّي مَوْتَهْ. وَ هُو سَكَنْ فِي بَيْت وِحَيْدَهْ طَرَفْ وَ مَا وَاجِبْ لَيَّهْ يَدْخُلْ فِي بَيْت اللّٰهْ. وَ يُوتَامْ وِلَيْدَهْ بِقِي مَسْؤُولْ فِي الْقَصِرْ وَ حَكَمْ فِي شَعَبْ الْبَلَدْ.
[22] وَ الْبَاقِي مِنْ عَمَلْ عُزِّيَّا مِنْ الْبِدَايَةْ لِلنِّهَايَةْ كَتَبَهْ النَّبِي إِشَعْيَا وِلَيْد أَمُّوصْ.
[23] وَ عُزِّيَّا مَاتْ وَ لِحِقْ أَبَّهَاتَهْ وَ دَفَنَوْه جَنْب قَبُرْ جُدُودَهْ فِي أَرْض هَنَا قَبُرْ الْمُلُوكْ أَشَانْ هُو مُجَدِّمْ. وَ وِلَيْدَهْ يُوتَامْ حَكَمْ فِي بَدَلَهْ.