[1] وَ رُوحْ اللّٰهْ نَزَلْ فِي عَزَرْيَا وِلَيْد عُدَيْد.
[2] وَ مَشَى بَكَانْ آسَا وَ قَالْ لَيَّهْ: «أَسْمَعَوْنِي، يَا آسَا وَ نَاسْ قَبَايِلْ يَهُوذَا وَ بَنْيَامِينْ. اللّٰهْ مَعَاكُو كَنْ إِنْتُو مَعَايَهْ. وَ كَنْ إِنْتُو تِفَتُّشُوهْ، هُو يِخَلِّيكُو تَلْقَوْه. وَ لَاكِنْ كَنْ إِنْتُو تَابَوْه، هُو كُلَ يَابَاكُو.
[3] وَ فِي مُدَّةْ طَوِيلَةْ، بَنِي إِسْرَائِيلْ عَاشَوْا بَلَا الْإِلٰـهْ الصَّحِيحْ وَ بَلَا رُجَالْ دِينْ الْيِعَلُّمُوهُمْ وَ بَلَا وَصَايَا اللّٰهْ.
[4] وَ لَاكِنْ فِي ضِيقِتْهُمْ، هُمَّنْ قَبَّلَوْا لِلّٰهْ إِلٰـهْ بَنِي إِسْرَائِيلْ. هُمَّنْ فَتَّشَوْه وَ هُو خَلَّاهُمْ يَلْقَوْه.
[5] وَ فِي الْوَكِتْ دَا، مَا فِي أَمِنْ لِلنَّاسْ الْمَاشِينْ وَ الْجَايِينْ أَشَانْ فِي الْوَكِتْ دَا، فِي بَرْجَالْ كَبِيرْ أَمْبَيْن سُكَّانْ كُلَّ الْبُلْدَانْ دَوْل.
[6] وَ فِي أَيِّ بَكَانْ، قَاعِدِينْ يِدَّمَّرَوْا أَمْبَيْنَاتْهُمْ. أُمَّةْ تُقُمّ ضِدّ أُمَّةْ آخَرَةْ وَ حِلَّةْ تُقُمّ ضِدّ حِلَّةْ آخَرَةْ أَشَانْ الرَّبّ نَزَّلْ فَوْقهُمْ كُلَّ نَفَرْ هَنَا تَعَبْ.
[7] وَ لَاكِنْ إِنْتُو، أَبْقَوْا شُدَادْ وَ مَا تَكْسَلَوْا أَشَانْ عَمَلْكُو دَا، عِنْدَهْ أَجُرْ.»
[8] وَ وَكِتْ آسَا سِمِعْ كَلَامْ التَّنَبُّؤ هَنَا النَّبِي عُدَيْد، هُو قَمَّ بِشِدَّةْ وَ دَمَّرْ الْمُحَرَّمَاتْ مِنْ كُلَّ بَلَدْ يَهُوذَا وَ بَنْيَامِينْ وَ كُلَّ الْحِلَّالْ الشَّالَوْهُمْ فِي جِبَالْ أَفْرَايِمْ. وَ هُو جَدَّدْ مَدْبَحْ اللّٰهْ الْقَاعِدْ قِدَّامْ بَيْت اللّٰهْ.
[9] وَ لَمَّ كُلَّ نَاسْ قَبَايِلْ يَهُوذَا وَ بَنْيَامِينْ وَ كُلَّ النَّاسْ الْمِنْ قَبِيلَةْ أَفْرَايِمْ وَ مَنَسَّى وَ شِمْعُونْ الْجَوْا قَعَدَوْا مَعَاهُمْ. وَ كَتِيرِينْ مِنْ مَمْلَكَةْ إِسْرَائِيلْ أَنْضَمَّوْا لِآسَا أَشَانْ هُمَّنْ شَافَوْا كَدَرْ اللّٰهْ إِلٰـهَهْ قَاعِدْ مَعَايَهْ.
[10] وَ هُمَّنْ لَمَّوْا فِي مَدِينَةْ الْقُدُسْ فِي الشَّهَرْ التَّالِتْ فِي سَنِةْ 15 هَنَا حُكُمْ آسَا.
[11] وَ فِي الْيَوْم دَا، هُمَّنْ قَدَّمَوْا 700 بَقَرْ وَ 7 000 غَنَمْ ضَحَايَا لِلّٰهْ مِنْ الْغَنِيمَةْ الشَّالَوْهَا.
[12] وَ هُمَّنْ سَوَّوْا مُعَاهَدَةْ لِيِتَابُعُوا اللّٰهْ رَبّ جُدُودْهُمْ بِكُلَّ قُلُوبْهُمْ وَ بِكُلَّ فِكِرْهُمْ.
[13] وَ شَرْط الْمُعَاهَدَةْ دَا يُقُولْ كَدَرْ أَيِّ نَادُمْ الْمَا يِتَابِعْ اللّٰهْ إِلٰـهْ بَنِي إِسْرَائِيلْ، يَكْتُلُوهْ كَنْ صَغِيرْ وَلَّا كَبِيرْ، كَنْ مَرَةْ وَلَّا رَاجِلْ.
[14] وَ هُمَّنْ سَوَّوْا الْمُعَاهَدَةْ دِي بِحَلِيفَةْ. حَلَفَوْا بِاللّٰهْ بِزَغْرَاطْ وَ حِسّ الْبُرُنْجِي وَ ضَرِبِينْ الْبُوقْ.
[15] وَ كُلَّ نَاسْ مَمْلَكَةْ يَهُوذَا فِرْحَوْا بِالْحَلِيفَةْ السَّوَّوْهَا بِكُلَّ قُلُوبْهُمْ وَ بِنِيِّتْهُمْ الْوَاحِدَةْ لِيِفَتُّشُوا اللّٰهْ. وَ هُو خَلَّاهُمْ يَلْقَوْه. وَ هُو أَنْطَاهُمْ الرَّاحَةْ مِنْ كُلِّ جِيهَةْ.
[16] وَ الْمَلِكْ آسَا مَرَقْ حَتَّى جِدِّتَهْ مَعَاكَةْ مِنْ دَرَجَتْهَا هَنَا الْمَيْرَمْ أَشَانْ هِي صَنَعَتْ صَنَمْ مُحَرَّمْ لِلْإِلٰـهَةْ أَشِيرَةْ. وَ آسَا كَسَّرْ الصَّنَمْ الْمُحَرَّمْ دَا وَ رِحِكَهْ وَ حَرَّقَهْ فِي وَادِي قِدْرُونْ.
[17] وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ فِي بَلَدْ إِسْرَائِيلْ. وَ فِي كُلَّ مُدَّةْ حَيَاتَهْ، آسَا قَاعِدْ يِتَابِعْ اللّٰهْ بِقَلِبْ مُخْلِصْ.
[18] وَ هُو جَابْ فِي بَيْت اللّٰهْ الْفُضَّةْ وَ الدَّهَبْ وَ الْمُعِدَّاتْ الْأَبُوهْ وَ هُو ذَاتَهْ خَصَّصَوْهُمْ.
[19] وَ بَتَّانْ حَرِبْ كَيْ مَا بِقِي لَحَدِّي سَنِةْ 35 هَنَا حُكُمْ آسَا.