[1] وَ بَعَدْ دَا، الْمُوَابِيِّينْ وَ بَنِي عَمُّونْ وَ مَعَاهُمْ الْمَعُونِيِّينْ جَوْا لِيِحَارُبُوا الْمَلِكْ يَهُوشَفَطْ.
[2] وَ نَاسْ جَوْا خَبَّرَوْا يَهُوشَفَطْ وَ قَالَوْا لَيَّهْ: «عَسْكَرْ كَتِيرِينْ جَوْا لِيِحَارُبُوكْ وَ هُمَّنْ جَايِينْ مِنْ غَادِي لِلْبَحَرْ الْمَيِّتْ مِنْ بَلَدْ أَدَوْم. وَ هَسَّعْ، قَاعِدِينْ فِي حِلَّةْ حَصُّونْ تَامَارْ الْبِنَادُوهَا عَيْن جِدِي.»
[3] وَ يَهُوشَفَطْ خَافْ بِلْحَيْن وَ دَوَّرْ يَسْأَلْ اللّٰهْ وَ قَرَّرْ صِيَامْ لِشَعَبَهْ فِي كُلَّ بَلَدْ يَهُوذَا.
[4] وَ نَاسْ مَمْلَكَةْ يَهُوذَا جَوْا مِنْ كُلَّ حِلَّالْ الْبَلَدْ وَ لَمَّوْا لِيَشْحَدَوْا اللّٰهْ.
[5] وَ يَهُوشَفَطْ وَقَفْ قِدَّامْ كُلَّ الشَّعَبْ هَنَا بَلَدْ يَهُوذَا وَ سُكَّانْ مَدِينَةْ الْقُدُسْ قِدَّامْ الْفَضَايْ الْجَدِيدَةْ فِي بَيْت اللّٰهْ.
[6] وَ سَأَلْ الرَّبّ وَ قَالْ: «يَا اللّٰهْ رَبّ جُدُودْنَا! إِنْتَ بَسْ الرَّبّ الْقَاعِدْ فِي السَّمَاءْ وَ سِيدْ كُلَّ مَمَالِكْ الْأُمَمْ. وَ إِنْتَ بَسْ عِنْدَكْ الْقُدْرَةْ وَ الْعِزّ وَ مَا فِي نَادُمْ الْيَقْدَرْ يَقِيفْ قِدَّامَكْ.
[7] دَا مَا إِنْتَ إِلٰـهْنَا بَسْ الْقَلَعْت أَرْض سُكَّانْ الْبَلَدْ دِي قِدَّامْ شَعَبَكْ بَنِي إِسْرَائِيلْ وَ أَنْطَيْتهَا لِذُرِّيَّةْ إِبْرَاهِيمْ خَلِيلَكْ الْيِحِبَّكْ إِلَى الْأَبَدْ؟
[8] وَ هُمَّنْ سَكَنَوْا فِي الْبَلَدْ دِي وَ بَنَوْا لَيْك بَيْت مُقَدَّسْ. وَ قَالَوْا:
[9] ‹كَنْ مَصِيبَةْ جَاتْ فَوْقنَا مِثِلْ حَرِبْ وَلَّا عِقَابْ وَلَّا وَبَاءْ وَلَّا جُوعْ، أَنِحْنَ نَجُوا قِدَّامْ الْبَيْت دَا وَ قِدَّامَكْ إِنْتَ أَشَانْ أُسْمَكْ قَاعِدْ فَوْق الْبَيْت دَا. وَ أَنِحْنَ نِكَوْرُكُوا وَ نَطُلْبُوا مِنَّكْ الْفَزَعْ مِنْ الضِّيقَةْ وَ إِنْتَ تَسْمَعْ كُرَوْرَاكْنَا وَ تِنَجِّينَا.›
[10] «وَ هَسَّعْ، دَاهُو بَنِي عَمُّونْ وَ الْمُوَابِيِّينْ وَ نَاسْ جَبَلْ سَعِيرْ جَايِينْ لِيَهْجُمُونَا. وَ إِنْتَ مَا خَلَّيْت بَنِي إِسْرَائِيلْ يُشُقُّوا بُلْدَانْهُمْ وَكِتْ مَرَقَوْا مِنْ مَصِرْ. فِي شَانْ دَا، جُدُودْنَا شَالَوْا دَرِبْ آخَرْ وَ مَا دَمَّرَوْهُمْ.
[11] وَ دَاهُو الْمُكَافَاةْ الْيَنْطُوهَا لَيْنَا النَّاسْ دَوْل! هُمَّنْ جَايِينْ يَقْلَعَوْا مِنِّنَا أَرْض وَرَثَتْنَا الْإِنْتَ أَنْطَيْتهَا لَيْنَا.
[12] يَا رَبِّنَا، مَا تِعَاقِبْهُمْ وَلَّا؟ أَنِحْنَ مَا عِنْدِنَا قُدْرَةْ قِدَّامْ الْعَسْكَرْ الْكَتِيرِينْ الْجَايِينْ ضِدِّنَا وَ مَا نَعَرْفُوا نِسَوُّوا شُنُو. وَ أَشَانْ دَا، أَتْوَكَّلْنَا عَلَيْك إِنْتَ.»
[13] وَ كُلَّ نَاسْ بَلَدْ يَهُوذَا وَاقْفِينْ قِدَّامْ اللّٰهْ مَعَ عَايِلَاتْهُمْ وَ عَوِينْهُمْ وَ عِيَالْهُمْ.
[14] وَ خَلَاصْ، رُوحْ اللّٰهْ نَزَلْ فِي نَادُمْ وَاحِدْ فِي أُسْط الشَّعَبْ دَا. وَ هُو يَحَزِيِيلْ وِلَيْد زَكَرِيَّا وِلَيْد بَنَايَا وِلَيْد يَعِيِيلْ وِلَيْد مَتَّنْيَا. هُو مِنْ قَبِيلَةْ لَاوِي مِنْ عَايِلَةْ أَسَافْ.
[15] وَ يَحَزِيِيلْ قَالْ لَيْهُمْ: «أَسْمَعَوْا، يَا نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ وَ الْمَلِكْ يَهُوشَفَطْ. دَاهُو اللّٰهْ قَالْ: ‹مَا تَخَافَوْا وَ لَا تِنْبَهْتُوا مِنْ الْعَسْكَرْ الْكَتِيرِينْ دَوْل أَشَانْ الْحَرْبَةْ دِي مَا هِنْتُكُو لَاكِنْ هِنْت الرَّبّ.
[16] وَ أَمْبَاكِرْ فَجُرْ، أَنْزُلُوا ضِدّ عُدْوَانْكُو. هُمَّنْ يَجُوا طَالِعِينْ مِنْ قَوْز الزُّهُورْ. وَ تَلْقَوْهُمْ فِي خَشُمْ الْوَادِي الْمُقَابِلْ صَحَرَاء يَرُوِيلْ.
[17] مَا وَاجِبْ لَيْكُو تِحَارُبُوهُمْ. أَمْشُوا وَ أَقِيفُوا بَسْ وَ شِيفُوا النَّجَاةْ النِّجِيبْهَا لَيْكُو أَنَا اللّٰهْ. يَا نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ، مَا تَخَافَوْا وَ لَا تِنْبَهْتُوا! أَمْبَاكِرْ، أَمْشُوا وَاجُهُوهُمْ وَ أَنَا اللّٰهْ نُكُونْ مَعَاكُو.›»
[18] وَ يَهُوشَفَطْ سَجَدْ وَ كُلَّ نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ دَنْقَرَوْا فِي الْأَرْض وَ سَجَدَوْا لِلّٰهْ.
[19] وَ اللَّاوِيِّينْ الْمِنْ ذُرِّيَّةْ قَهَاتْ وَ الْمِنْ ذُرِّيَّةْ قُورَحْ قَمَّوْا يَحْمُدُوا اللّٰهْ إِلٰـهْ بَنِي إِسْرَائِيلْ بِحِسّ عَالِي.
[20] وَ الشَّعَبْ قَمَّوْا بِفَجُرْ بَدْرِي مَرَقَوْا وَ مَاشِينْ عَلَيْ صَحَرَاء تَقُوعَةْ. وَ وَكِتْ هُمَّنْ مَاشِينْ، يَهُوشَفَطْ وَقَفْ بِطُولَهْ وَ قَالْ: «أَسْمَعَوْنِي، يَا نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ. آمُنُوا بِاللّٰهْ إِلٰـهْكُو وَ تَقْعُدُوا ثَابْتِينْ. وَ آمُنُوا بِأَنْبِيَاء اللّٰهْ وَ تَنْجَحَوْا.»
[21] وَ يَهُوشَفَطْ مَعَ الشَّعَبْ أَشَّاوَرَوْا وَ خَطَّ كُبَارَاتْ هَنَا غِنَيْ الشُّكُرْ أَشَانْ يَمْشُوا قِدَّامْ الدَّيْش لِيَشْكُرُوا اللّٰهْ الْقُدُّوسْ. وَ يُقُولُوا: «أَشْكُرُوا اللّٰهْ أَشَانْ رَحْمَتَهْ دَايْمَةْ إِلَى الْأَبَدْ!»
[22] وَ وَكِتْ هُمَّنْ بَدَوْا يِرَقْرُقُوا وَ يَشْكُرُوا اللّٰهْ بِحِسّ عَالِي، اللّٰهْ جَابْ بَرْجَالْ أَمْبَيْن بَنِي عَمُّونْ وَ الْمُوَابِيِّينْ وَ نَاسْ جَبَلْ سَعِيرْ الْجَوْا لِيَهْجُمُوا بَلَدْ يَهُوذَا وَ هُمَّنْ قَمَّوْا يِدَّاوَسَوْا أَمْبَيْنَاتْهُمْ.
[23] وَ بَنِي عَمُّونْ وَ الْمُوَابِيِّينْ كَتَلَوْا نَاسْ جَبَلْ سَعِيرْ لَحَدِّي دَمَّرَوْهُمْ مَرَّةْ وَاحِدْ. وَ وَكِتْ كَمَّلَوْا نَاسْ سَعِيرْ، هُمَّنْ أَلْكَاتَلَوْا أَمْبَيْنَاتْهُمْ.
[24] وَ وَكِتْ عَسْكَرْ مَمْلَكَةْ يَهُوذَا وَصَّلَوْا فِي الْبَكَانْ الْمِنَّهْ يِشِيفُوا كُلَّ الصَّحَرَاء، وَجَّهَوْا عَلَيْ الْعَسْكَرْ الْكَتِيرِينْ. وَ خَلَاصْ، شَافَوْا جَنَازَاتْهُمْ مُدَفِّقِينْ فِي الْأَرْض وَ نَادُمْ وَاحِدْ كُلَ مَا فَضَّلْ!
[25] وَ وَكِتْ يَهُوشَفَطْ وَ نَاسَهْ دَلَّوْا لِيِشِيلُوا غَنِيمَةْ، لِقَوْا خُمَامْ كَتِيرْ مَرَّةْ وَاحِدْ. لِقَوْا بَهَايِمْ وَ لُبَاسْ وَ مُعِدَّاتْ غَالِيِّينْ. خَمَّوْا خُمَامْ كَتِيرْ لَحَدِّي مَا قِدْرَوْا يِشِيلُوهْ. وَ مِنْ الْكَتَرَةْ، هُمَّنْ قَاعِدِينْ يَنْقُلُوا الْخُمَامْ دَا لَحَدِّي تَلَاتَةْ يَوْم.
[26] وَ فِي الْيَوْم الرَّابِعْ، لَمَّوْا فِي وَادِي الْبَرَكَةْ أَشَانْ يِبَارُكُوا اللّٰهْ. وَ بِسَبَبْ دَا، سَمَّوْا الْبَكَانْ دَا وَادِي الْبَرَكَةْ وَ الْأُسُمْ دَا قَاعِدْ لَحَدِّي الْيَوْم.
[27] وَ كُلَّ رُجَالْ بَلَدْ يَهُوذَا وَ سُكَّانْ مَدِينَةْ الْقُدُسْ مَعَ يَهُوشَفَطْ فِي رَاسْهُمْ قَبَّلَوْا مَدِينَةْ الْقُدُسْ بِفَرْحَةْ أَشَانْ اللّٰهْ نَجَّاهُمْ مِنْ عُدْوَانْهُمْ.
[28] وَ هُمَّنْ وَصَّلَوْا فِي مَدِينَةْ الْقُدُسْ بِحِسّ الْجِقِنْدِيَّةْ وَ أَمْ سِبَيْبَةْ وَ الْبُرُنْجِي وَ مَشَوْا لَحَدِّي بَيْت اللّٰهْ.
[29] وَ خَوْف الرَّبّ كَرَبْ كُلَّ الْمَمَالِكْ هَنَا الْبُلْدَانْ الْآخَرِينْ أَشَانْ هُمَّنْ سِمْعَوْا كَدَرْ اللّٰهْ حَارَبْ عُدْوَانْ بَنِي إِسْرَائِيلْ.
[30] وَ مَمْلَكَةْ يَهُوشَفَطْ قَعَدَتْ فِي رَاحَةْ أَشَانْ إِلٰـهَّا أَنْطَاهَا السَّلَامَةْ مِنْ كُلِّ جِيهَةْ.
[31] وَ يَهُوشَفَطْ وِلَيْد آسَا حَكَمْ فِي مَمْلَكَةْ يَهُوذَا. وَ هُو عِنْدَهْ 35 سَنَةْ وَكِتْ بِقِي مَلِكْ وَ حَكَمْ 25 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا عَزُوبَةْ بِنَيَّةْ شِلْحِي.
[32] وَ يَهُوشَفَطْ تَابَعْ دَرِبْ أَبُوهْ آسَا وَ مَا بَارَى مِنَّهْ. وَ سَوَّى الْعَدِيلْ قِدَّامْ اللّٰهْ.
[33] وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ وَ الشَّعَبْ مَا ثَبَّتَوْا قُلُوبْهُمْ فِي اللّٰهْ رَبّ جُدُودْهُمْ.
[34] وَ الْبَاقِي مِنْ عَمَلْ يَهُوشَفَطْ مِنْ الْبِدَايَةْ لِلنِّهَايَةْ مَكْتُوبْ فِي كِتَابْ النَّبِي يَاهُو وِلَيْد حَنَانِي السَّجَّلَوْه فِي كِتَابْ مُلُوكْ بَنِي إِسْرَائِيلْ.
[35] وَ يَهُوشَفَطْ مَلِكْ مَمْلَكَةْ يَهُوذَا سَوَّى عَلَاقَةْ مَعَ أَخَزْيَا مَلِكْ مَمْلَكَةْ إِسْرَائِيلْ. وَ الْمَلِكْ أَخَزْيَا يِسَوِّي إِلَّا الْفَسَالَةْ.
[36] وَ يَهُوشَفَطْ سَوَّى عَلَاقَةْ مَعَ الْمَلِكْ دَا وَ عَدَّلَوْا سُفُنْ كُبَارْ الْيَمْشُوا بَعِيدْ لِلتِّجَارَةْ. وَ السُّفُنْ دَوْل عَدَّلَوْهُمْ فِي حِلَّةْ عَصْيُونْ قِيبَرْ فِي خَشُمْ الْبَحَرْ.
[37] وَ لَاكِنْ النَّبِي أَلِعَازَرْ وِلَيْد دُدَاوَا الْمِنْ حِلَّةْ مَرِيشَةْ أَتْنَبَّأْ ضِدّ يَهُوشَفَطْ وَ قَالْ: «أَشَانْ إِنْتَ سَوَّيْت عَلَاقَةْ مَعَ أَخَزْيَا، اللّٰهْ يِكَسِّرْ خِدِمْتَكْ.» وَ السُّفُنْ هَنَا التِّجَارَةْ دَوْل أَلْكَسَّرَوْا قُبَّالْ مَا يَوْصَلَوْا.