[1] أَشَانْ كُلَّ الْكَلَامْ دَا، أَنَا الْمَسْجُونْ هِنِي فِي شَانْ رَبِّنَا نِوَصِّيكُو، عِيشُوا بِالْحَالْ الْوَاجْبَةْ لِلنَّاسْ الْاللّٰهْ نَادَاهُمْ.
[2] وَ أَبْقَوْا دَايْماً دَلُولِينْ. وَ سَوُّوا كُلَّ شَيْء بِنَفَسْ بَارِدْ. وَ أَبْقَوْا دَايْماً صَبُورِينْ. وَ صَبُّرُوا نَفِسْكُو أَمْبَيْنَاتْكُو بِالْمَحَبَّةْ.
[3] الرُّوحْ الْقُدُّوسْ جَعَلَاكُو شَعَبْ وَاحِدْ. وَ جَاهُدُوا أَشَانْ الْوِحْدَةْ مَا تَتْلَفْ. وَ أَحْفَضَوْا الْوِحْدَةْ دِي بِالسَّلَامْ.
[4] جِسِمْ الْمَسِيحْ وَاحِدْ بَسْ وَ الرُّوحْ الْقُدُّوسْ هُو كُلَ وَاحِدْ بَسْ. وَ مِثِلْ دَا، الْوَرَثَةْ الْاللّٰهْ نَادَاكُو أَشَانْ تَلْقَوْهَا كُلَ وَاحِدَةْ.
[5] وَ رَبِّنَا هُو وَاحِدْ وَ إِيمَانَّا وَاحِدْ وَ كُلِّنَا غَطَّسَوْنَا بِنَفْس الْغَطِّسِينْ.
[6] وَ اللّٰهْ هُو وَاحِدْ وَ هُو أَبُونَا كُلِّنَا. وَ هُو رَبّ كُلَّ شَيْء وَ قَاعِدْ فَوْقنَا كُلِّنَا وَ مَوْجُودْ مَعَانَا كُلِّنَا.
[7] وَ لَاكِنْ أَيِّ وَاحِدْ مِنِّنَا لِقِي عَطِيَّةْ خَاصَّةْ مِنْ الْمَسِيحْ الْأَنْطَاهَا حَسَبْ نِعْمَتَهْ أَشَانْ بَيْهَا نَخْدُمُوا لَيَّهْ.
[8] وَ أَشَانْ دَا، الْكِتَابْ بُقُولْ <وَكِتْ هُو طَلَعْ فَوْق فِي الْبَكَانْ الْعَالِي، هُو شَالْ مَعَايَهْ مَسَاجِينْ كَتِيرِينْ وَ أَنْطَى لِلنَّاسْ عَطَايَا>.
[9] وَ «هُو طَلَعْ فَوْق» مَعَنَاتَهْ شُنُو؟ مَعَنَاتَهْ الْمَسِيحْ أَوَّلْ نَزَلْ تِحِتْ وَ دَخَلْ فِي لُبّ الْأَرْض.
[10] وَ النَّزَلْ دَا، هُو بَسْ الطَّلَعْ فَوْق فِي السَّمَاوَاتْ أَشَانْ قُدُرْتَهْ تَمْلَأْ كُلَّ شَيْء.
[11] وَ هُو بَسْ الْأَنْطَى عَطَايَا لِلنَّاسْ. وَ نَاسْ وَاحِدِينْ هُو جَعَلَاهُمْ رُسُلْ وَ وَاحِدِينْ جَعَلَاهُمْ أَنْبِيَاءْ وَ وَاحِدِينْ جَعَلَاهُمْ مُبَشِّرِينْ وَ وَاحِدِينْ جَعَلَاهُمْ شُيُوخْ وَ مُعَلِّمِينْ.
[12] وَ أَنْطَاهُمْ عَطَايَا أَشَانْ هُمَّنْ يِجَهُّزُوا شَعَبَهْ الصَّالِحِينْ لِيَخْدُمُوا لَيَّهْ فِي شَانْ أُمَّةْ الْمَسِيحْ تَبْقَى قَوِيَّةْ.
[13] وَ يِسَوُّوا خِدْمِتْهُمْ لَحَدِّي كُلِّنَا سَوَا نَلْحَقَوْا الْوِحْدَةْ فِي الْإِيمَانْ وَ نَعَرْفُوا إِبْن اللّٰهْ تَمَامْ. وَ كُلِّنَا نَبْقَوْا عَاقْلِينْ لَحَدِّي أَيِّ وَاحِدْ يَبْقَى تَمَامْ مِثِلْ الْمَسِيحْ هُو تَمَامْ.
[14] وَ مِثِلْ دَا، مَا نَبْقَوْا بَتَّانْ مِثِلْ عِيَالْ مَا عِنْدُهُمْ ثَبَاتْ. هُمَّنْ مِثِلْ مَرَاكِبْ دُقَاقْ فِي الْبَحَرْ. مَا عِنْدُهُمْ قُدْرَةْ فَوْق الشَّلَّالْ الْبِوَدِّيهُمْ وَ لَا الرِّيحْ التُّسُوقْهُمْ، أَوَّلْ فِي نُصّ وَاحِدْ وَ بَعْدَيْن فِي نُصّ آخَرْ. وَ فِي الْمَثَلْ دَا، الرِّيحْ وَ الشَّلَّالْ هُمَّنْ التَّعْلِيمْ الْمَا صَحِيحْ الْوَاحِدِينْ يِعَلُّمُوا بَيَّهْ وَ النَّجَاضَةْ الْيُغُشُّوا بَيْهَا النَّاسْ وَ يِوَدُّرُوهُمْ.
[15] أَخَيْر نِبَلُّغُوا الْحَقّ بِمَحَبَّةْ وَ مِثِلْ دَا نَكْبُرُوا نَبْقَوْا عَاقْلِينْ فِي كُلَّ شَيْء بِعَلَاقِتْنَا مَعَ الْمَسِيحْ. هُو بَسْ رَاسْنَا
[16] وَ بَيَّهْ هُو الْجِسِمْ يَبْقَى وَاحِدْ و كُلَّ الْمَفَاصِلْ يِنْرَبْطُوا أَمْبَيْنَاتْهُمْ. وَ وَكِتْ أَيِّ عُضُو يِسَوِّي خِدِمْتَهْ عَدِيلْ، الْجِسِمْ الْكَامِلْ يَكْبُرْ وَ يَبْقَى قَوِي بِالْمَحَبَّةْ.
[17] نِوَصِّيكُو بِأُسُمْ الرَّبّ، أَسْمَعَوْا كَلَامِي عَدِيلْ. مَا تِعِيشُوا بَتَّانْ مِثِلْ النَّاسْ الْمَا بَعَرْفُوا اللّٰهْ. هُمَّنْ يِتَابُعُوا الْفِكِرْ الْبَاطِلْ.
[18] وَ قَاعِدِينْ فِي الضَّلَامْ وَ مَا فَاهِمِينْ الْحَقّ. وَ مَا يَعَرْفُوا الْحَيَاةْ الْاللّٰهْ يِدَوْر يَنْطِيهَا لَيْهُمْ أَشَانْ الْجَهَلْ قَاعِدْ فَوْقهُمْ وَ رَاسْهُمْ بِقِي قَوِي.
[19] قُلُوبْهُمْ مَيْتِينْ وَ سَلَّمَوْا نُفُوسْهُمْ لِشَهْوَاتْهُمْ الْفَسْلِينْ. بِنِيَّةْ وَاحِدَةْ يِتَابُعُوا الْحَالْ الشَّيْنَةْ.
[20] وَ لَاكِنْ إِنْتُوا عَلَّمْتُوا مِنْ تَعْلِيمْ الْمَسِيحْ حَالْ شِقْ مِنْ دِي.
[21] أَكِيدْ، كَلَامْ الْمَسِيحْ سِمِعْتُوهْ وَ بِعَلَاقِتْكُو مَعَايَهْ عَلَّمْتُوا الْحَقّ أَشَانْ الْحَقّ قَاعِدْ فَوْق عِيسَى.
[22] فِي الشَّيْء الْبُخُصّ الْحَالْ الْإِنْتُو أَوَّلْ عَايْشِينْ بَيْهَا، سِمِعْتُوا لَازِمْ تِخَلُّوهَا مِنْكُو مَرَّةْ وَاحِدْ وَ مَا تِتَابُعُوا بَتَّانْ شَهْوَةْ قُلُوبْكُو الْقَدِيمَةْ. أَوَّلْ شَهْوَتْكُو دِي غَشَّتْكُو وَ تَلَّفَتْ قُلُوبْكُو.
[23] وَ سِمِعْتُوا لَازِمْ تَلْقَوْا من اللّٰهْ الْعَقُلْ الْجَدِيدْ
[24] وَ لَازِمْ تِشِيلُوا مِنَّهْ الْقَلِبْ الْجَدِيدْ وَ تَبْقَوْا نَاسْ جُدَادْ التِّشَابُهُوا اللّٰهْ فِي حَالْكُو. خَلِّي حَالْكُو تَبْقَى عَدِيلَةْ وَ صَالِحَةْ بِالصَّحِيحْ.
[25] وَ أَشَانْ دَا، أَبَداً مَا تَكْدُبُوا. خَلِّي أَيِّ وَاحِدْ يِحَجِّي لِأَخُوهْ بِكَلَامْ صَحِيحْ أَشَانْ أَنِحْنَ كُلِّنَا وَاحِدْ.
[26] كَانْ زِعِلْتُوا مَا تَخْطَوْا. بَرُّدُوا قُلُوبْكُو قُبَّالْ الْحَرَّايْ مَا تَقَعْ.
[27] مَا تَنْطُوا فُرْصَةْ لِإِبْلِيسْ.
[28] كَانْ نَادُمْ أَوَّلْ سَرَّاقْ، خَلِّي مَا يَسْرِقْ بَتَّانْ. فِي بَدَلْ السِّرْقَةْ خَلِّي يَخْدِمْ بِوَغَرَهْ وَ دُرَاعَهْ. وَ مِثِلْ دَا، مِنْ أُجُرْتَهْ يَقْدَرْ يَكْرُبْ نَفْسَهْ وَ يِسَاعِدْ النَّاسْ الْمُحْتَاجِينْ.
[29] أَبَداً مَا تِحَجُّوا كَلَامْ شَيْن. وَاجِبْ تِحَجُّوا دَايْماً كَلَامْ سَمَحْ الْيِقَوِّي النَّاسْ وَ الْكَلَامْ الْمُوَافِقْ لَيْهُمْ أَشَانْ يَبْقَى بَرَكَةْ لِلنَّاسْ الْيَسْمَعَوْه.
[30] مَا تِحَجُّوا بِكَلَامْ فَسِلْ أَشَانْ كَلَامْ فَسِلْ يِوَجِعْ الرُّوحْ الْقُدُّوسْ الْاللّٰهْ نَزَّلَهْ فَوْقكُو. هُو الْوَسِمْ الْاللّٰهْ يِأَكِّدْ بَيَّهْ كَدَرْ فِي الْيَوْم الْأَخِيرْ اللّٰهْ يَفْدَاكُو مَرَّةْ وَاحِدْ.
[31] خَلِّي الزَّعَلْ وَ الْغَبِينَةْ وَ الْغَضَبْ وَ الْهُرَاجْ وَ الْقَطِيَّعَةْ يَبْقَوْا مَا فِيهُمْ أَمْبَيْنَاتْكُو وَ خَلُّوا مِنْكُو الْحَسِيفَةْ.
[32] سَوُّوا الزَّيْن لِأَيِّ نَادُمْ وَ أَلْحَانَنَوْا. وَ أَسَّامَحَوْا أَمْبَيْنَاتْكُو مِثِلْ اللّٰهْ سَامَحَاكُو وَكِتْ نَجَّاكُو بِالْمَسِيحْ.