[1] Tab 'doo'd Kiriisto kasoo'heliche, 'doo'di anto khabo ichoow karnatohi sirgaal ba a inkaanyiteene wihi lii'doono kol tuumman a raaheene wihi haaggan la a itannabteene a yeeleen.
[2] Toro la kasoo'heliche iicho enenyet hamanne, nebey a kafiddiyeene, 'doo'di samacchaare a yitaaheene, enenyet ortiis ka a isnuglaacheen.
[3] I'di tahe inno rubeyteen laka 'hor 'doo'di 'dalammeenye yeed idaagine leekkeeste, bow'dati wahanyeyyohi noole uurasseen imoonaane toro kahamaadicho on eheet. Jiroteen wihi buuhe a suujoon ichoow kal'darri. A inno la'dii'de inno laka 'doo'di addan a 'dii'dne.
[4] I'daasenyi maanti Waakkhi 'Doorribeheene uuri 'dabakhe inno tuste weeli enenyet 'doonintiis tuste ka,
[5] inno ribe. Waha la jeenteti inno wohoo fissan iyeelle menye, a jeenteti uurnugleeli Waakh on. Usu Rubeyti Munyeenye jiroteen dikhto, delmaatti husub ichoow jiroti husub inno siisso ka, a inno ribe.
[6] Waakh la Yeesso Kiriistohi 'Doorribeheene ka, a inno ibuuhiche Rubeyti Munyee tuum inno isookhube.
[7] Haaggi Waakhe buurenye inno imunneynan ka, 'doo'di fiffissan a inno iekkaache. Waakh waha dakkhane yeele 'dee 'doo'di jiroti jirtuu imassanne inno khajjeello dalho nateeh.
[8] Yeedassaas an idah a wihi lakakhuufo. Atihi yeedassaas katirriinsatti 'dee 'doo'di Waakh rummeeste kol tuumman haag yeelo iche 'doona. Wahanyeyyoha la enenyet a ihaagganyahiine toro la a iroonyahiin.
[9] I'daasenyi iriirti 'dalam ichoow magahenyeti aacchinye ichoow jaakh ichoow amurre Muusati islaleeiriiro kaseeh. I'di tahe waha a wihi ilmarhaatteete indigir laa.
[10] Eti goytiin ka enenyet seley goggoocho, koli oraat ichoow koli lammaatteet tootoocha, chu'us i'daas yeelo sirbi lakigessa idaha. Chirri us uliba sookuto kafirda.
[11] Taba waha tissiba, eti i'dee a khollokkhanyahe, uskeeliis ka la sina isigoocha Waakh ortiis ka.
[12] Uus an Arteema ommos Tuuchiko kisooergo, dowwa ilkerengeetti Nikaboolis ka iamiit. I'di tahe 'dee maanti hayohi roffo yitaaheen, ilkerengeettaase anihi fiddiyo gooche.
[13] Geeddi at tabuu'd hol dowe, Seenahi wakiile ichoow Aboollo gargaare luhlo iyeel.
[14] Wihi an 'doo'deen ka'doono a ichohi geeddi icho yabuu'diin haag yeelin abtaane, 'dee 'doo'di rumanka gargaar 'doono gargaareene, 'dee iicho jiroti indigir laa jirin.
[15] 'Doo'd Kiriistoki inta ka ileejiro tuumman a atin soobariitiche. 'Doo'di Kiriisto kakhuufo inno 'doono bariiti. Waakh ba atin tuumman atin imaala.