[1] At la tabe wahanyeyyohi icho ichoow wori Waakhe rummaat ba israahaan 'doo'd abi.
[2] Makhaaballeti araarrinyee isjeycha, saggoo atin liinkaanyito ifiddiya, 'doo'di samacchaare ateeha idah. Kakhuufnaanki icho Waakh kakhuufaan ichoow 'dooninti icho 'doo'di addan 'doonaan ichoow garrahsihi rumanka icho khabaan abi.
[3] I'daasu la, deyyehoti araarrinyee laka wihi at itadeeh, jiroticho ka, saggi deyyehoti munyee ijira. Iiche enenyet me'de'ddeeline, farsoti sabiib barin. I'daasenyi wihi haaggan enenyet a abisso,
[4] 'dee deyyehoti nunnugul saggi iche makhaaballeticho ichoow nyaakhuticho i'doonto abin a yubaa'deen.
[5] Toro la deyyehoti nunnugul saggi iche isijeyisso, iche jiroti mi'dabe ijirto, iche urmohicho mujjum idakhatti, iche wihi haaggan iyeesso, iche makhaaballeticho aficho ikutin abin a yubaa'deen. I'da ka enenyet Yeedi Waakh ma igafo.
[6] Saggaas on u, tabe mejeli nunnugul laka faajjiye, a isjeycho.
[7] Ati rubeytaah la wihi tuummane at yeesso ka, iyookkoti haaggane icho raahaan iateeh. Saggi at enenyet walah iabisso ka, eloo rucchul laka atusine, wohoo 'dabakhe iikhaatine,
[8] toro la worassi fiffissane wohoo suuje lakacheekin liiubaa'dan cheek. I'da ka 'doo'di kitirrimo lakhaanyo khaatatta a mehe walah suujenye icho inno kacheektaan mele.
[9] Bow'dayyo la mehe itadeeh ya, walah tuumman ka iicho kamurreticho aficho kutine, kamurreticho a kahamaadicheene, iicho yeed ilaabin.
[10] Toro la bow'dayyo iicho kamurreticho hatin. I'daasenyi 'doo'di tuum lakakhuufo a eheetti. I'da ka walahbaaw icho yeelaan ka, yeedi wori rummaate Waakkhi 'Doorribeheene kayamiit saa'do ikeenaan.
[11] A mehe haaggi Waakhe buurenye inno imunneynane ribnaan keeno, weeli enenyet tuumman a liisoobabbakkaahiche.
[12] Haagga la saggi jiroti Waakh ikamalin liijirin ichoow saggi wahanyeyyohi harratane sussuujenye liimoono lii'dii'do iche inno abcha. Toro la harrata ka, 'doo'di isjeycho, fiffissane, jiroti Waakh 'doono jiro, inno abcha.
[13] I'dane yeella geeddi inno khajjeeli buuhi Waakh keeno sugno. Waha la a maanti Yeesso Kiriistohi Waakhenye 'Doorribeheene weynaantiisti ababto inno liisoobabbakkaahicho.
[14] Yeesso la jeentetane jirotiis inno isoobahche, 'dee hugun'darri tuumman inno kasoofura, toro la inno dikha 'dee 'doo'di kiisenye haag kalday imoono nateeh.
[15] Wahanyeyyoha 'doo'd abiche uuricho miigooche, toro la antohi tuum lakisiiche ka leejaakh. Uus etoo kalday laka ki'darraawin.