[1] 'Doo'd Kiriistokaaw, alleya bal wihi emeetti Yeesso Kiriistohi Kamureene ichoow kulanki inno ichoow usu ba kulanno miinsan, a atin isoocheekno.
[2] Uus 'doo'di, “Ibeenki Kamur soonokhti a kute,” atin idowo dowwa on atin malalinne, ommos atin kanahin. Chirri icho, “Rubeyti Munyee a nah tusse,” ommos, “Farniin a 'helle,” essaane ommos nane khadaabeenyo a 'heleen, essaan laka, yeedicho araahina.
[3] Uus etoo jitoo kalday ka laka atin ekkeysan. A mehe ibeenkaas ma yateehe ichoowka 'doo'di buure Waakh 'dii'da, toro la ki hugun'darri kaassohti Waakh baabiicho soobaha.
[4] Eta wihi tuummane Waakh layadeeh ommos wihi lawahti tuummane tirrima toro la 'dirihicho isweynaacha, 'dee minki Waakhe buure goya orronta, nane Waakh iskayeela.
[5] Maanti an atin leejire, an waha a atin isoocheeke. Ma kasoo'hessaan a?
[6] Atin la wihi toolla usu jeycho a garattaane, 'dee maanti ibeenki goorat liigooche yitah ka soobaha.
[7] A mehe miigti dagsane hugun'darri toolla laka hole dowta. I'daasenyi eti toolla waha ichohi yateeh jeycho, a jeycha ichoowka Waakh usu meel kabahcha.
[8] Chirraase 'deerka eti amurre tuumman 'dii'do soobaha, Yeessohi Kamure la usu yeedi afiis kasoobaho ka yagiise, toro la ababnaanki maanti us soonokhti us ababo ka bar tira.
[9] Emeetti eta amurre tuumman 'dii'ddan ichoow hili Seytaan haaggicho a israahaan. Wihi beenaate us enenyet tuso a waha, wihi ittaawenye weeli enenyet yeelin iubaa'dan ichoow wahanyeyyohi miigti Waakh tuso ichoow girmo.
[10] Toro la suujoon tuumman ka 'doo'di ki labaabiichee ekkeesta. 'Doo'da jeenteti icho wori rummaat 'doonin i'dii'deene liibaabiicha, 'deerka ribnaan laka waayaan.
[11] Jeentetaas u Waakh ekkeysihi miigenye malicho gessa, 'dee wihi beenaat rummeestaan.
[12] I'dane yeela 'dee jeenteti icho runti icho ribto irummeysanne, i'daasenyi icho suujoonki icho yeelaan ikahamaadaan u, icho tuumman berri sina igoocha.
[13] 'Doo'd Kiriistokaaw, Kamur weyti atin 'doona. Nah jeenteti Waakh orey on atin isoobahsate toro la atin iribuu, Waakkhi nah kala'd ilaabno a imasse. A mehe Waakh hili Rubeyti Munyee munya inno kayeesso ichoow runti Waakhe inno rummeysanni ka a atin riba.
[14] Waakh jirota husub Wori Haaggane nah atin isoocheekne ka a atin wahe, 'dee Yeesso Kiriistohi Kamureene weynaantiisti ababto leegisantaan.
[15] Maantaka 'doo'd Kiriistokaaw, taba, mujjum tolossada, wihi nah atin abinne, wihi nah af ka atin isoocheekne ommos khadaab ka nah atin isoochiirre tuumman eheetteey ka ba, mujjum khuccha.
[16] Yeesso Kiriistohi Kamureene rubeytiis ichoow Waakkhi Aabbaheenenye inno 'doone, haaggiiski buurenye inno imunneynan ka armaanjireen tuumman uur inno miigooche toro la khajjeeli haaggan inno siiche ba,
[17] wihi haaggane atin yeessaan ichoow wihi atin tadeehiin tuumman ka atin faajjiya, toro atin miigoocha.