[1] Yaafohi Issiraayel goyaka la, 'doo'di beenaate 'doo'di Waakh iyeyyeedee a jire. Saggaas on u 'doo'di 'doo'di Waákh íyeyyeedo iskaayyeelo laka goytiin a soogela dagsi ka yeedassi beenaate jit Kiriisto enenyet buucho enenyet abcha. 'Doo'da la Kamuri gatte laka a 'dii'da, baabakki Waakh baabiicho dowwa on isikeenaan.
[2] 'Doo'di buure la soho'ddarriti 'doo'da yeelo raaha, jiti rummaat igafa.
[3] 'Damaankicho ka, yeedassi beenaate atin abchaane atin kakharaawaan. Waakh goorat archiiy on icho hukkume baabakki us icho baabiicho gooche. Waakh ma ur'do gone, wihi us igooche a soodowwaateen.
[4] A mehe Waakh herti Waakhe goorat uskeel yeesse sina a omhiche, ankhari af laa goya kalug'de kaahhide. Intaase fiddiyaane ichoowka ibeenki Waakh enenyet hukkumo yateeh.
[5] Toro la harrati 'doo'di goorat archiiy uskeel yeele baabiiche, 'duley kakhaate. I'daasenyi us Noowahi 'doo'd jiti fissan icheeke ichoow 'doo'doo addane teebeenye toorribe.
[6] Toro la ilkerengeetti Soodom ichoow ti Goomorah baabakki us icho baabiicho igooche, 'dab kagube bombey kayeele. I'da ka Waakh icho 'doo'di berri jiti us 'doono iraahin iyookko ikayeele.
[7] Toro la Loothi fissane soho'ddarriti 'doo'd yeele bolkhisse ribe.
[8] A mehe eta fissan kol dakkhan goychooda yiille, ulla chirri us kol dakkhan uskeeli 'doo'da yeele arge toro la daage rubeytiis ka weyti bolkhe.
[9] Kamur 'deerka saggi us 'doo'di aytiis raaho sinayyohi kajo ikasoobahcho a garta. Toro la 'doo'di uskeel yeelo saggi us sina iomhicho ichoowka ibeenki us 'doo'd hukkumo yateeh laka a garta.
[10] Kach ka la a 'doo'di wihi kheerenye uurassicho goya kijiro uskeel imoono raaho toro weynaan rannyo. Icho wihi icho yeelin 'doonaan ka roorro ma khabaane, rannyaate leeyahiine, toro la wahanyeyyohi i'di herti Waakhe anto khabo liiargine icho leeabaarramaan ma karooraan.
[11] Herti Waakh wahanyeyyoha weyti miig a kakhabta toro weynaan 'dirihicho laka khabta. Eheetteey laka, chi'iche wahanyeyyoha Kamur ortiis ka cheekatti ma abaarto.
[12] I'daasenyi 'doo'da saggi binahi yibaate mal ikhabine ladelo one 'dee lakhabti laabbakkicho iche ijira. Wahanyeyyohi icho foolicho ikhabine saggi suuje ileeabaarramaan. Saggi bina bar liitiro iche icho laka bar liitira.
[13] Saggi icho 'doo'di addan igaameeraan, saggaase icho laka liigaameera. 'Doo'da wihi sarticho 'doonto icho maalim laka yeelaan leelakhaanyo mee. Icho goytiin ka a i'di wihi duksah ichoow el khabo. Geeddi icho atin leegolossataan la ekkeysihicho a kahamaadaan.
[14] Koloo kalday laka uskeel ma 'diichaane, indohicho oboorrihi icho leeur'din 'doonaan on menye, wohoo addan ma khabtaan. 'Doo'di yeed Yeesso goyaka jarakhe ekkeestaane uskeel kalug'daan. 'Doo'da 'damaam on menye wohoo addan ma woyaan. Icho a 'doo'di Waakh fale.
[15] Jiti fissan a bujeene jiti suujenye goorat inam Beeyorki Baalam layadeeh tabe tabeen. Baalam la suujoonki us yeele, chilimmeti us ka'hele a 'doone.
[16] I'daasenyi Baalam jeenteti uskeeli us yeeluu, eheli us khabe hooyi weeli enenyet ka usu leejaakhe. 'Dalanki etaas Waákh íyeyyeedo sooyeelo kasoojeyche.
[17] 'Doo'da a i'di indohi bicche laa ichoow 'duubathi rug woyo. Inti 'doo'da liiabbire a inti mug'dihi reebe.
[18] A mehe icho yeedi ilmarhaatteete kaayyeedaane isatahnoochaan. 'Doo'di yeed Yeesso ka jarakhenye, dowwanoha ka suujoonki us yeele kabahsati wihi uurassicho goya kijiro uskeel imoono ka soho'ddarri isoojiitaane angey gessaan.
[19] Wihi icho enenyet iayyichaan a furnaane, i'daasenyi icho rubeycho a bow'dayyohi uskeel. A mehe wihi kianti iche bow'daticho tahe.
[20] A mehe chirri icho abannaanki Yeesso Kiriistohi Kamureenenye 'Doorribeheene abteen ka, wahanyeyyohi harratane sussuujenye enenyet bi'dirroocho a kasoobahsateene toro la suujoonkaas icho khabte a kahataateene, icho kola jiroti icho jiraan ti oraat laka a kasuuj.
[21] Ichohi goorat jiti fissan iabanne deefta ichohi abte toro amurreti Waakhe munyeenye lasiiche bujo ka.
[22] Wihi icho kayitah a mammahti rummaate goorat, “Kar jilbiibotiissa inokhta,” liidahye, ommos, “Golchati ladikhe toro a nokhatta sub kafadda,” liidah.