<Santiago 5

[1] ¡Rïcukuna, wiyakayämay! ¡Juiciu finalcho fiyupami nakayanki! ¡Sayno kaptinmi qaparayparaq waqayanki!

[2] Imaykata shuntayashqaykipis ismurmi ushakanqa. Mödanaykikunatapis puyumi ushanqa.

[3] Qorikikunapis qellaynikikunapis manami välinqanasu. Ultimu tiempuchöna kaykashqapis riquëzakunata kikilaykikunapaqmi shuntayanki. Saymi juiciu finalcho say shuntayashqayki riquëzaykikuna wachakash kayashqaykipita acusayäshunki. Saykuna salvayäshunaykipa trukanqa ninanömi rupar ushayäshunki.

[4] Mana pägaypa arusiyashqaykipitami minkaynikikuna Tayta Diosta waqapaykäyan. Paykuna manakuyashqanta lapanta mandaq Tayta Dios wiyashnami.

[5] Qellayniki kaptinmi munayashqaykita rurar kay pasacho kawaykäyanki. Sayno kawarmi pishtanapaq werayäsish uywano kaykäyanki.

[6] Qamkunaqa defiendikuyta mana puëdiq jusaynaq runakunatami wanusiyashkanki.

[7] Wawqi panikuna, Señor Jesucristo kutimushqanyaq mana ajayaypa shuyakuyay. Chakra aruqkunapis murupakuyänanpaq tamyataraqmi shuyakuyan. Mikuyninkunata shuntayänanpaqpis usyataraqmi shuyakuyan.

[8] Saynöla qamkunapis lapan shonquykikunawan yärakur mana ajayaypa Señor Jesucristuta shuyakuyay. Payqa kutimunanpaqnami kaykan.

[9] Wawqi panikuna, ama jamuränakuyaysu. Jamuränakuyaptikiqa Jesucristo kutimur juzgayäshunkimi. Runakunata juzgananpaq cercachönami kaykan.

[10] Wawqi panikuna, yarpäyay Tayta Diospa jutincho wilakuq profëtakuna imano kawayashqantapis. Paykunaqa ima nakaycho karpis mana ajayaypami Tayta Dios munashqanno kawayarqan. Saynöla qamkunapis kawayay.

[11] Musyansimi imano nakarpis mana ajayaypa Tayta Dios munashqanno kawaqkunata pay yanapashqanta. Saynölashi Job fiyupa nakarpis Tayta Diosman mana ajayaypa yärakunaq. Sayno yärakuptinshi Tayta Dios ali shonqu y kuyapäkuq kashpan payman bendicionninta churanaq.

[12] Kuyay wawqi panikuna, imatapis awnir ama jurayankisu jana pasacho kaykaqkunapa jutincho ni kay pasacho kaykaqkunapa jutinchöpis. Ama ni imapa jutinchöpis jurayankisu. Saypa trukanqa cumpliyänaykipaq kaptin awniyanki y mana cumpliyänaykipaq kaptinqa ama awnipäyankisu. Sayno kawayaptikiqa Tayta Dios manami castigayäshunkisu.

[13] Lakish karqa Tayta Diosta manakuyay. Kushish karpis Tayta Diosta agradëcikur alabayay.

[14] Mayqaykipis qeshyarqa mayor wawqikunata qayasiyanki Tayta Diosta manakuyänanpaq. Paykunami Jesucristupa jutincho aceitita umaykiman winaparkuyäshushpayki aliyänaykipaq Tayta Diosta manakuyanqa.

[15] Lapan shonqunwan yärakur manakuyaptinqa Tayta Dios aliyäsiyäshunkimi. Jusalikush kayaptikipis perdonayäshunkimi.

[16] Sayno kaykaptinqa jusalikuyashqaykita yärakuq mayikita wilar confesakuyay. Nirkur jukniki juknikipaqpis Tayta Diosta manakuyay. Saynöpami qeshyayashqaykipita aliyäyanki. Tayta Dios munashqanno kawaq runa manakushqantaqa Tayta Dios wiyanmi.

[17] Profëta Elías manakushqantapis Tayta Dios wiyanaqshi. Noqansino runala kaykarpis mana tamyananpaq lapan shonqunwan manakuptinshi kimsa wata soqta killantin tamyanaqsu.

[18] Yapay tamyananpaq manakuptinshi tamyanaq. Sayshi murupakuyashqanpis wayunaq.

[19] Wawqi panikuna, mayqaykipis jusalikuyaptiki pilapis tantiyasishushpaykiqa

[20] wanuypitami salvashunki. Saynöpami mayjina jusalikush karpis perdonash kayanki.