<Santiago 2

[1] Kuyay wawqi panikuna, poderösu Señor Jesucristuman yärakuykarqa lapan runakunata iwal rikashun.

[2] Shuntakäyashqaykiman ali mödanash y qori sortïjash rïcu runa chämuptin y pasaypa lachapa mödanash pobri runa chämuptin

[3] ¿imanirtaq rïcu kaqta ali rikar “kay alinnin bancuman jamaykulay” niyanki y pobri kaqtaqa “qamqa qepalacho ichikuy” o “pasalaman jamakuy” niyanki?

[4] Sayno nir ¿manaku jukninta ali rikaykäyanki y juknintana mana ali rikaykäyanki? Sayno karqa mana ali jueznömi kaykäyanki.

[5] Kuyay wawqi panikuna, wiyayämay. ¿Manaku Tayta Dios pobrikunata akrash wakin runakunapita payman mas yärakuyänanpaq y mandashqancho imayyaqpis kawayänanpaq? Sayno kawayänanpaqmi kuyaqninkunata promitirqan.

[6] Sayno kaykaptinpis qamkunaqa pobrikunata mana alimi rikaykäyanki. ¿Manaku rïcu runakunaqa munayashqanta rurasir nakasiyäshunki? ¿Manaku maqaraykar juezkunamanpis apasiyäshunki?

[7] ¿Manaku paykunaqa salvamaqninsi Jesucristutapis manakaqman churayan?

[8] Tayta Diospa palabran kaynömi nikan: “Kikiki kuyakushqaykino runa mayikita kuyanki”. Say leyta rasunpaypa cumplirqa alitami ruransi.

[9] Rïcu runakunata ali rikar y pobrikunata mana ali rikarqa say leyta mana cumplir jusalikuykansimi.

[10] Mayqanpis “Tayta Diospa lapan leyninkunata cumpliykä” nikashqancho juk mandamientulatapis mana cumplirqa lapanta mana cumpliqnömi kaykäyan.

[11] Tayta Diospa mandamientunkunacho qelqaraykan “majaykita ama jarukunkisu” y “runa mayikita ama wanusinkisu” nir. Sayno kaykaptinqa majanta mana jarukurpis runa mayinta wanusirqa Tayta Diospa leyninkunata manami cumpliykansu.

[12] Sayno kaykaptinqa imata parlayänaykipaqpis y imata rurayänaykipaqpis shumaq yarpachakuyay. Wilakuynin nishqannölami juiciu finalcho Tayta Dios juzgayäshunki.

[13] Runa mayikita mana kuyapäyaptikiqa qamkunatapis Tayta Dios manami kuyapäyäshunkisu. Runa mayikita kuyapäyaptikimi isanqa qamkunatapis kuyapäyäshunki.

[14] Kuyay wawqi panikuna, “Tayta Diosmanmi yärakuykä” nirpis pay munashqanno mana kawashqaqa ¿imapaqtaq yärakushqansipis välin? Sayno kawaq runakunataqa Tayta Dios manami salvanqasu.

[15] Diosman yärakuq mayinsita mödanaynaqta o mikanaykaqta rikaykar

[16] mana yanapashqaqa ¿imapaqtaq välin “Tayta Dios yanapaykuläshunki rakta jatikunaykipaq y pacha junta mikunaykipaq” nishqansipis?

[17] Saynölami runa mayinsita mana yanapashqaqa Tayta Diosman yärakushqansipis manakaqlapaq kaykan.

[18] Wakin runakuna niyan: “Mana yanapäkuq karpis Tayta Diosmanmi yärakü”. Sayno niyaptinpis noqa nï: Mana yanapäkuq karqa manami rasunpaypasu Tayta Diosman yärakuykäyanki. Runa mayikita yanaparmi isanqa Tayta Diosman rasunpaypa yärakuykäyanki.

[19] Tayta Dios juklayla kashqanta criyiyashqayki ali kaptinpis manami say criyiyashlaykiwansu salvakuyanki. Tayta Dios kashqantaqa supaykunapis criyiyanmi. Sayno criyirpis infiernuman qaykush kayänanpaq kashqanta musyarmi mansariywan marmaryaykäyan.

[20] ¡Ama upa yarpayta yarpäyaysu! Runa mayikita mana yanapäyaptikiqa Tayta Diosman yärakuyashqaykipis manakaqlapaqmi kaykan.

[21] Yarpäshun unay ayllunsi Abraham imano kashqantapis. Payshi Tayta Diosta cäsukur surin Isaacta altarcho wanusinanpaq pushanaq. Sayno cäsukuptinshi Tayta Dios payta jusaynaqtano chaskinaq.

[22] Saynöpami Abraham rasunpaypa yärakushqanta musyansi.

[23] Tayta Diospa palabranpis kaynömi nikan: “Tayta Dios nishqanta Abraham criyiptinmi jusaynaqtana chaskirqan”. Saynöpis nikan Abraham Tayta Diospa amïgun kashqantami.

[24] Sayno kaykaptinqa manami yärakushlansipitasu Tayta Dios salvamansi, saypa trukanqa payman yärakur alikunata rurashqansipitami.

[25] Saynöpis tantiyakushun prostitüta warmi Rahab imata rurashqantapis. Israel runakuna Jericó markaman rikapakuq chäyaptinshi wayinman pakaykunaq. Nirkurnashi Jericó runakuna ashiyaptin jukläpana qeshpisinaq. Sayno rurashqanpitami paytapis Tayta Dios jusaynaqtano chaskirqan.

[26] Saymi alikunata mana rurashqaqa Tayta Diosman yärakushqansipis manakaqlapaq kaykan. Cuerpunpita alma yarquptin runa wanush kashqannömi yärakuyninsipis wanushno kaykan.