<Santiago 4

[1] ¿Imanirtaq pelyalar y qayapänakular kawaykäyanki? Shonquykikunacho mana ali yarpay kaptinmi sayno kaykäyanki.

[2] Wakinkuna imaykayuqpis kaqta rikarmi qamkunapis paykunano kayta munayanki. Saymi imaykanöpapis tariyta munar runa mayikitapis wanusiyanki. Sayno rurarpis Tayta Diosta mana manakurmi munayashqaykita tariyankisu.

[3] Manakaqkunacho ushayänaykipaq kaptinmi manakurpis chaskiyankisu.

[4] ¡Mana wiyakuq jusasapa runakuna! ¿Manaku musyayanki mana alikunata rurar Tayta Diospa contran kayashqaykita? Pipis mana alikunata rurarqa Tayta Diospa contranmi kaykan.

[5] ¿Manaku criyiyanki Tayta Diospa palabran nikashqanta? Saychömi nimansi mana alikunata ruraptinsi noqansiman kachamushqan Espíritu Santu rabyakushqanta.

[6] Sayno karpis kuyapämansimi. Saymi palabranchöpis kayno qelqaraykan: “Yachaq tukuqkunataqa Tayta Dios manami yanapansu. Humildi kaqkunatami isanqa kuyapar yanapan”.

[7] Sayno kaykaptinqa mana yachaq tukuylapa Tayta Dios nishqanta cäsukuyay. Diabluta ichipäyay. Ichipäyaptikiqa qeshpikunqami.

[8] Tayta Dioswan imaypis kawayay. Sayno kawayaptikiqa paypis qamkunawanmi kaykanqa. ¡Jusasapakuna! Makikikunata awikuyashqaykino jusalikuykunata kachariyay. Janan shonqula cäsukuyänaykipa trukanqa lapan shonquykikunawan Tayta Diosta cäsukuyay.

[9] Jusalikuyashqaykipita seqaypa lakikur waqayay. Asikuyänaykipa trukanqa waqayay. Kushikuyänaykipa trukanqa lakikuyay.

[10] Tayta Diosta cäsukur mana yachaq tukuypa kawayay. Sayno kayaptikiqa yanapäyäshunkimi.

[11] Wawqi panikuna, mayqaykikunapis ama jamuränakuyaysu. Pitapis jamurarqa Tayta Dios kuyanakunansipaq nimashqansi mandamientutami manakaqman churaykansi. Tayta Diospa mandamientunqa manami manakaqman churanansipaqsu kaykan, saypa trukanqa cäsukunansipaqmi.

[12] Tayta Diosmi leyninkunata qomashkansi. Paylami nimäshun jusayuq o jusaynaq kashqansita. Paylami munayyuq kaykan salvamänansipaq o infiernuman qaykamänansipaqpis. Sayno kaykaptinqa ¿pitaq qam kanki runa mayikita jamuränaykipaq?

[13] Wakinnikiqa nikäyanki: “Waraykuna juklä markapa aywar saycho juk wata negociashun aska qellayta gänamunansipaq”. Sayno niqkuna, shumaq wiyakayämay.

[14] Manami musyansisu waraykuna ima päsamänansipaq kashqantapis. Pukutay yurirkamur elaqakäkushqannölami noqansipis ushakaqla kaykansi.

[15] Sayno kaykaptinqa kayno nishwan: “Tayta Dios munaptin kawarqa kaytapis y waktapis rurashunmi”.

[16] Sayno niyänaykipa trukanqa imata rurayänaykipaqpis factaykäyankimi. Sayno parlayashqayki manami alisu.

[17] Alikunata ruranansipaq kashqanta musyaykar mana rurarqa jusalikuykansimi.