[1] Espíritu Santu munashqanno kawaq wawqi panikuna, yärakuq mayiki jusalikuykashqanta musyarqa mana jamuraylapa tantiyasiyanki. Cuidätaq kikikikunapis jusalikuyankiman.
[2] Jukniki juknikipis shakyäsinakur yanapänakuyay. Saynöpami Jesucristo yachasimashqansi mandamientunta cumpliykäyanki.
[3] Imatapis mana musyaykar runa tukurqa kikilaykikunami engañakuykäyanki.
[4] Runa tukuyänaykipa trukanqa kikikikuna imano kawaykäyashqaykitapis tantiyakuyay. Saynöpami ali tukur kushikuyänaykipa trukanqa Tayta Dios munashqanno kawayashqaykipita kushikuyanki.
[5] Lapansimi imano kawashqansipitapis Tayta Diosta cuentata qoshun.
[6] Jesucristupa wilakuyninta yachakuqkunaqa yachasiqninta imalawanpis yanapäyäsun.
[7] Shumaq tantiyakushun. Tayta Diosta manami engañayta kamäpakunsisu. Imatapis murushqansitaqa cosechansimi.
[8] Saynölami jusata rurarqa wanur ushakäshun. Espíritu Santu munashqanno kawarmi isanqa mana ushakaq kawayta tarishun.
[9] Sayno kaykaptinqa mana ajayaypa ali kaqkunalata rurashun. Sayno kawashqami Tayta Dios imay karpis premiuta qomäshun.
[10] Sayta musyaykarqa puëdishqansiman tupu pïmaytapis yanapäshun. Jesucristuman yärakuq mayinsi kaptinqa masraq yanapäshun.
[11] Kay cartapa ushanantaqa kikïmi jatusaq letrakunawan qelqaykämü.
[12] Señalakuyänaykipaq yachasishuqnikikunaqa Israel mayinkuna ali rikayänanta munalarmi yachaykäsiyäshunki. Qatikachäyänanta mansarirmi Jesucristo cruzcho wanushqanpita salvakushqansitaqa yachasiyansu.
[13] Paykuna señalakurpis Moisés qelqashqan leykunata manami cumpliyansu. Sayno karpis leyta cumplisiyashqanpita alabakuyänalanpaqmi señalakuyänaykita munaykäyan.
[14] Noqaqa manami imapitapis alabaküsu. Alabakunäpa trukanqa Señor Jesucristo noqansi rayku cruzcho wanushqanpitami kushikü. Cruzcho wanush kaptinmi kay mundu noqapaq crucificashnöna kaykan y noqapis kay mundupaq crucificashnöna kaykä.
[15] Saymi [Jesucristucho kashqaqa] señalakush kashqansisu ni mana señalakush kashqansisu välin. Mushuq kamash runana kashqansimi isanqa rasunpaypa välin.
[16] Sayta tantiyakuqkunataqa Tayta Dios kuyapar ali rikaykuläsun. Paykunaqa Tayta Dios kuyashqan Israel runakunami kaykäyan.
[17] [Señor] Jesucristupa ali wilakuyninta wilakushqäpita maqayämashqan seräkuna kanmi. Sayno kaykaptinqa yachasishqäta pipis manakaqman amana churasunsu.
[18] Wawqi panikuna, Señorninsi Jesucristo kuyapäyäshushpayki imaypis yanapaykuyäläshunki. Amén.