[1] Jesucristo libramashqami Moisés qelqashqan leykunapa munaynincho kashqansipita librina kaykansi. Sayno kaykaptinqa say leykunata cumpliyänaykipaq obligayäshuptiki ama cäsupäyaysu.
[2] Noqa nï: Señalakuyaptikiraq Tayta Dios salvayäshushqaykita yarpäyaptikiqa Jesucristuman yärakuyashqaykipis manakaqlapaqmi kaykan.
[3] Yapaypis nï: Pipis señalakuq kaqqa Moisés qelqashqan leykunata lapantaraqmi cumplinman.
[4] Say leykunata cäsukuypa pipis salvakuyta munarqa Jesucristupita y Tayta Diospa kuyakuyninpitapis witikuyashqami.
[5] Noqansimi isanqa Espíritu tantiyasimaptinsi musyansi Jesucristuman yärakur salvakunansipaq kashqanta.
[6] Jesucristuta chaskikush kashqanqa manami señalakush kashqansisu ni mana señalakush kashqansisu välin, sinöqa payman yärakur kuyanakur kawashqansimi.
[7] Jesucristuman yärakur alimi kaykäyarqayki. ¿Pitaq shimita jatipäyäshushkanki rasunpa kaq wilakuyta mana cäsukuyänaykipaq?
[8] Paykuna yachasiyashqanqa manami qayamaqninsi Tayta Diospitasu kaykan.
[9] Say lutan yachasikuyqa walka levadüra mäsata jakasishqannömi kaykan.
[10] Tayta Diostami manakuykä lutan yachasikuqkunata manana chaskipäyänaykipaq. Say runakunataqa pï kaptinpis Tayta Diosmi juzganqa.
[11] Wawqi panikuna, señalakuyänanpaq yachasiptïqa manami qatikachaykäyämanmansu ni Jesucristo noqansi rayku cruzcho wanushqanta wilakushqäpita chikiykäyämanmansu.
[12] “Señalakurraqmi salvakuyanki” nir yachasiyäshuqnikikunaqa penqayninta kutapita chipyaq kusuriykuyäsun.
[13] Wawqi panikuna, Tayta Dios qayayäshushkanki librina kayänaykipaqmi. Librina karpis ama jusalikuyaysu, saypa trukanqa jukniki juknikipis kuyanakur yanapänakuyay.
[14] Diospa leyninchömi nikan: “Kikiki kuyakushqaykino runa mayikita kuyanki”. Say nishqanta cumplirqa lapan leyninkunatami cumpliykäyanki.
[15] Sayno kaykaptinqa cuidädu chikinakuyankiman. Chikinakurqa jaqayäsinakur qarqunakuyankimi.
[16] Saymi nï: Espíritu Santu tantiyasiyäshushqaykinöla kawayay. Sayno kawarqa manami shonquykikuna munashqanno jusalikuyankisu.
[17] Lutan yarpaykunaqa Espíritu Santupa contranmi kaykan y Espíritu Santunami lutan ruraykunapa contran. Saymi ishkan apänakuyaptin alita rurayta munarpis kamäpakuyankisu.
[18] Espíritu Santu tantiyasiyäshushqaykita cäsukurqa manami leykunapa munayninchönasu kaykäyanki.
[19] Lutan yarpashqankunata ruraqkunaqa [majanta jarukuyan,] fornicación jusata jusalikuyan, melanaypaq kaqkunata rurayan, shanaripakur jusalikuyan,
[20] ïdulukunata adorayan, runa mayinta brujyasiyan, runa mayinta chikiyan, rimanakuyan, cëlanakuyan, imalapitapis rabyakuyan, nanaparänakuyan, qarqunakuyan, jaqayäsinakuyan,
[21] envidiösu kayan, [runa mayinta wanusiyan,] upyalaman churakäyan, shinkakurkur lutankunata rurayan y mastami saynöla jusalikuyan. Nawpata nishqänölami kananpis albirtï: Sayno kawaqkunaqa Tayta Dios mandaykashqanman manami chäyanqasu.
[22] Santu Espïritupa munaynincho kawarmi isanqa kuyanakunsi, kushikunsi, jawka kawansi, pacienciakunsi, ali shonqu kansi, yanapäkuq kansi, awnishqansita cumplinsi,
[23] humildi kansi y alilata ruranansipaq tantiyakunsi. Sayno kawarqa manami ima leytapis manakaqman churaykansisu.
[24] Jesucristupana karmi unay kawayninsita cruzcho wanusishkansina. Saymi jusalikuykuna yarpayninsiman shamuptinpis cäsupansinasu.
[25] Espíritu Santupa munaynincho kaykarqa pay tantiyasimashqansino kawashun.
[26] Sayno kawaykarqa pitapis rabyanäsir ama runa tukushunsu ni envidiösu kashunsu.