[1] Éfeso markacho kaykaq salvash kaqkuna: Noqa Pablo, Jesucristupa apostolnin kanäpaq Tayta Dios akramash kaptinmi qamkunapaq kay cartata cartakaykämü. Jesucristo munashqanno kawayashpaykimi Tayta Diospana kaykäyanki.
[2] Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.
[3] ¡Señor Jesucristupa Papänin Tayta Dios alabash kaykuläsun! Jesucristucho kashqami gloriacho kaykaq imaykaläya bendicionninkunata qomashkansi.
[4] Kay pasata manaraq kamarmi Jesucristuman churamashpansi Tayta Dios akramashkansi paypa nawpancho jusaynaq y santu kanansipaq.
[5] Kuyamashpansimi kikin munashqanno destinamarqansi Jesucristo kayninpa wamran kanansipaq.
[6] Kuyashqan Surinwan sayno destinamashqansipitami imaypis payta alabashun.
[7] Kuyapäkuq karmi Surinpa yawarninwan rantimashpansi lapan jusansikunata perdonamashkansi.
[8] Seqaypa kuyapämashpansimi y yachayta qomashpansimi
[9] runakuna mana musyayashqanta Tayta Dios musyasimashkansi.
[10] Saymi musyasimashkansi jana pasacho kaqkunata y kay pasacho kaqkunatapis pay destinashqan junaq Jesucristupa makinman lapanta churananpaq kashqanta.
[11] Kikin yarpashqanno lapantapis ruraq karmi noqansitapis Jesucristucho kaptinsi Tayta Dios destinamashkansi herenciansita chaskinansipaq.
[12] Paymi kamakäsish Israel runakuna Jesucristuman puntata yärakur payta alabayänanpaq.
[13] Qamkunapis ali wilakuyninta wiyarmi Jesucristuman yärakur salvakuyashkanki. Saynöpami promitishqan Espíritu Santuwan Tayta Dios shonquykikunata sëllayäshushkanki.
[14] Espíritu Santuta qomashpansimi Tayta Dios musyasimansi herenciansita qomänansipaq kashqanta y wamran kanansipaq rantimashqansita. Sayno salvamashqansipitami imaypis payta alabashun.
[15] Saymi Señor Jesucristuman shumaq yärakuyashqaykita musyar y wawqi panikunawan kuyanakuyashqaykita musyar
[16] Tayta Diosta qamkunapaq manakur imaypis payta agradëcikü.
[17] Saynöpis Señorninsi Jesucristupa Papänin munayyuq Tayta Diostami manakü Espíritu Santuwan tantiyasiyäshuptiki payta reqiyänaykipaq.
[18] Shonquykikunacho sayno tantiyasiyäshuptikimi musyayanki Tayta Dios qayashushpayki imapaq salvayäshushqaykita, seqaypa ali herenciata chaskiyashqaykita
[19] y payman yärakuqkunata munayninwan shumaq yanapashqanta.
[20] Say munayninwanmi Jesucristuta kawarirkasimur gloriacho aluq kaq nawpanman jamasish.
[21] Saynöpami Jesucristuta Tayta Dios churash kay vïdacho y juk vïdachöpis munayyuq kananpaq. Saymi angilkunapitapis, supaykunapitapis y pïmay runapitapis mas munayyuq kaykan.
[22] Sayno munayyuq kaptinmi lapan imaykatapis paypa munayninman Tayta Dios churash. Iglesiata kuyarmi payta churash lapanpapis mandaqnin kar uman kananpaq.
[23] Noqansinami iglesian kar cuerpun kaykansi. Saymi pay munashqanno kawanansipaq imaypis yanapaykämansi. Paypa makinchömi lapan imaykapis kaykan.