[1] Pipis wamralaraq karqa herencianta manami chaskinraqsu. Chaskinanpaq kaykarpis ashmaynölami kaykan.
[2] Saymi ashmaqninpa munaylanchöraq kaykan papänin nishqan junaqyaq.
[3] Saynölami noqansipis wamra japuy kashpansi Moisés qelqashqan leykunapa munaynincho karqansi.
[4] Promitishqan tiempu chämuptinnami Tayta Dios Surinta kachamurqan. Paymi noqansino yurir say leykunapa munaynincho karqan.
[5] Sayno karqan leykunapa munaynincho kashqansipita salvamänansipaqmi. Saynöpami paypa wamrankunana kanansipaq legitikamashkansi.
[6] Wamran kashqami Surin Jesucristo promitishqan Espíritu Santuta shonqunsiman Tayta Dios kachamurqan. Espíritu Santumi Tayta Diosta imaypis: “¡Abba, Papä!” nikan.
[7] Saymi ashmaynönasu kaykansi, sinöqa Tayta Diospa wamrankunanami kaykansi. Wamranna kashpansimi promitimashqansi herenciata [Jesucristo kayninpa] chaskishun.
[8] Qamkunaqa Tayta Diosta manaraq reqirmi mana rasunpaypa kaq dioskunata sirviyarqayki.
[9] Kananmi isanqa Tayta Diosta reqiyanki y paypis reqiyäshunki. Sayno kaykaptinqa ¿imanirtaq Moisés qelqashqan leykunata cumpliyta munar ashmay kayman yapay kutiykäyanki?
[10] Saymi qamkunaqa Israel runakuna respitayashqan junaqkunata, killakunata, watakunata y fiestankunata respitaykäyanki.
[11] Sayno kayaptikimi pasaypa lakikü. ¿Walälapaqsuraq Jesucristupa wilakuyninta qamkunata yachasiyashkä?
[12] Noqapis mana Israel runakunanölami Moisés qelqashqan leykunapa munayninchönasu kaykä. Wawqi panikuna, qamkunata ruwakü noqa kashqäno qamkunapis kayänaykipaqmi. Qamkuna alimi chaskiyämarqayki.
[13] Musyayashqaykinöpis qeshyaynïpami qamkuna kaqcho Jesucristupa wilakuyninta wilakurqä.
[14] Sayno qeshyaptïpis qarqayämänaykipa trukan angiltanöraqmi y kikin Jesucristutanöraqmi ali rikayämarqayki.
[15] Kananqa ¿imanakaskiyashkankitaq? Nawpataqa nawikikuna trukasina kaptinqa jorqurirpis nawïman churaparkayämankimanmi karqan.
[16] Kananqa ¿Jesucristupa wilakuyninta yachasishqäpitaku conträ sharkuyashkanki?
[17] Lutan yachasikuqkuna manami Dios munashqanno ali kawayänaykita munarsu yachaykäsiyäshunki, saypa trukanqa noqakunata manakaqman churayämashpan paykuna yachasiyashqanta chaskikuyänaykita munalarmi.
[18] Rasunpaypa ali kawayänaykita munar yachasiyäshuptikiqa alimi kanman. Isanqa qamkunawan kaykaptïpis o mana kaykaptïpis saynöla yachasiyäshunkiman.
[19] Kuyay wamräkuna, Jesucristuno kawayänaykita munarmi wachay nanay sariptin warmi lakikushqanno noqapis qamkunapaq fiyupa lakikü.
[20] ¡Shumaq tantiyasinäpaq qamkuna kaqcho maynapis kaykämanna! Karucho karmi ima ruraytapis kamäpaküsu.
[21] Moisés qelqashqan leykunapa munaynincho kayta munarqa ¿pay qelqashqankuna imata nishqantapis tantiyayankiku?
[22] Saychömi nikan Abraham ishkay suriyuq kashqanta. Jukaq surin karqan ashmaynincho y jukaq surinnami karqan warmincho.
[23] Ashmaynincho kaq surinqa manami Tayta Dios promitishqan kaq surinsu karqan. Warmincho kaq surinmi isanqa Tayta Dios promitishqan karqan.
[24] Say warmikunata ishkay pactuman tinkusiypami tantiyasishayki. Abrahampa ashmaynin Agarmi Sinaí jirkano kaykan. Sinaí jirkachömi Israel runakunawan Tayta Dios pactuta rurar leyninkunata entregarqan. Saymi pipis say leykunapa munaynincho kar ashmayno kaykan.
[25] Arabiacho kaykaq Sinaí jirkanömi Agar kaykan. Saynölami Jerusalénpis y wawankunapis kaykäyan. Sayno kaykäyan Moisés qelqashqan leykunapa munaynincho kayashpanmi.
[26] Abrahampa warmin Saranami Tayta Dios rurashqan mushuq pactuno kaykan. Say pactuta Tayta Dios cumplir salvamaptinsimi noqansipa markansi jana pasacho kaq Jerusalén kanqa.
[27] Jana pasacho kaq Jerusalén aska wawayuq kananpaq kashqanpitaqa Tayta Diospa palabranchöpis kaynömi qelqaraykan: “Qoluq warmi, ¡kushikuy! Wawata mana tarirpis ¡kushikushpayki cantay! Runan kacharish karpis runayuq warmipitapis masraqmi wawata tarinkipaq”.
[28] Wawqi panikuna, sayno kaptinmi noqansiqa Sarapa wawan Isaacno kar Tayta Dios promitishqanta cumplishqanpita paypa wamrankuna kaykansi.
[29] Espíritu Santupa munayninwan yuriq Isaacta Agarpa wawan chikishqannömi kananpis Moisés qelqashqan leykunata cumplisiqkuna chikiykämansi.
[30] ¿Manaku yarpäyanki Tayta Diospa palabran imata nishqantapis? Saychömi qelqaraykan Sara kayno nishqan: “¡Say ashmaytaqa wawantinta jukla qarquy! Say warmipa wawanqa wawä Isaacwan manami herencianta rakipänakuyanmansu”.
[31] Wawqi panikuna, noqansiqa manami ashmay kaq warmipa wawannösu kaykansi, saypa trukanqa Sarapa wawannömi.