[1] Jesucristuwan kawarimushna kaykarqa gloriacho kaqkunata ashiyay. Saychömi Tayta Diospa aluq kaq nawpancho Jesucristo jamaraykan.
[2] Kay pasalacho kawayänaykipaq yarpachakuyänaykipa trukanqa gloriacho kawayänaykipaq yarpachakuyay.
[3] Qamkunaqa jusalikuypaq wanushna karmi Jesucristuwan Tayta Diospa nawpancho kawaykäyanki. Sayno kawayashqaykita runakuna kanan mana rikarpis
[4] kawayta qomaqninsi Jesucristo kutimuptinmi qamkunapis paywan gloriacho kayankipaq.
[5] Sayno kaykaptinqa mana jusalikuypa kawayay. Fornicación jusata ama jusalikuyaysu ni shonquykikuna mana alikunata munashqanta rurayaysu. Rïcuyaylapaqpis ama yarpachakuyaysu. Rïcuyaylapaq yarpachakurqa ïdulukunata adoraqnömi kaykäyanki.
[6] Sayno jusalikuqkunataqa Tayta Dios rabyashpanmi castiganqa.
[7] Qamkunapis nawpataqa saynömi kawayarqayki.
[8] Kananqa pitapis ama rabyapäyaynasu, nanaparäyaynasu ni chikiyaynasu. Ama pipa washantapis rimayaynasu ni manakaqkunata parlayaynasu.
[9] Saynöpis jukniki jukniki lulapänakuyaynasu. Makwa mödanata jitariqno unay kawayashqaykita kacharir
[10] pay qoyäshushqayki mushuq kawaytana kawayay. Mushuq kawayta chaskikuyaptikimi kamamaqninsi Tayta Dios waran waran tantiyaykäsiyäshunki pay kashqanno kayänaykipaq.
[11] Saymi Israel runa o mana Israel runa karpis, señalash o señaläni karpis, mana yachaq karpis, jäpa runa karpis, ashmay o libri karpis Jesucristuta chaskikurqa lapansipis paypa makinchöna kawaykansi.
[12] Tayta Dios akrashqan y kuyashqan santu runakuna kaykarqa jukniki juknikipis kuyapänakur kawayay. Saynöpis yanapänakuyay, mana yachaq tukuypa kawayay, pïmaypaqpis ali shonqu kayay y pacienciakuyay.
[13] Imalapitapis rabyanänaykipa trukanqa awantakuyay. Jaqayäsinakur imarqa perdonanakuyay. Jesucristo perdonayäshushqaykinöla qamkunapis perdonanakuyay.
[14] Imano karpis kuyanakur jukniki juknikipis juk shonqula kawayay.
[15] Jesucristupita ali kawayta chaskikush kaykarqa pïmaywanpis ali kawayay. Juk shonqula kawayänaykipaqmi Tayta Dios qayayäshushkanki. Saynöpis Tayta Diosta imaypis päkilä niyay.
[16] Jesucristupa ali wilakuyninta imaypis yarparäyay. Say wilakuyninta shumaq tantiyakur yachasinakuyay y cäsukuyänaykipaq shakyäsinakuyay. Salmukunata, himnukunata y cörukunata cantar Tayta Diosta lapan shonquykikunawan agradëcikur alabayay.
[17] Imata rurarpis y imata parlarpis Señor Jesucristupa jutincho rurayanki y parlayanki. Jesucristo salvayäshushqaykipita Tayta Diosta imaypis päkilä niyay.
[18] Warmikuna, Señor Jesucristuta chaskikushna kaykarqa runaykikunata cäsukuyay.
[19] Runakuna, warmikikunata kuyayay. Olqutupänaykipa trukanqa ali shimilaykipa tantiyasiyay.
[20] Wamrakuna, mamaykita y taytaykita imaypis cäsukuyay. Sayno cäsukuyänaykitami Señor Jesucristo munan.
[21] Wamrayuq kaqkuna, wamraykikuna mana jaqayäyänanpaq lutalaqa ama olqutupäyaysu.
[22] Ashmaykuna, kay pasacho kaq patronnikikuna niyäshushqaykita rurayay. Rikayäshuptikilaqa ama aruq tukuyaysu, saypa trukanqa Tayta Diosta mansapakur lapan voluntänikiwan aruyay.
[23] Imata rurarpis runakunapaqnölaqa ama rurayaysu, sinöqa Señor Jesucristupaqno lapan shonquykikunawan rurayay.
[24] Musyayankimi Señor Jesucristupita gloriacho herenciata chaskiyänaykipaq kashqanta. Señor Jesucristumi rasunpa kaq patronniki kaykan.
[25] Mana alita ruraqkunataqa pï kaptinpis mana kuyapaypami Tayta Dios castiganqa.