[1] Qamkunapaq lakikurmi lapan shonqüwan Tayta Diosta imaypis manakuykä. Saynölami manakuykä Laodicea markacho yärakuq mayinsikunapaq y wakin mana reqimaqkunapaqpis.
[2] Qamkunapaq manakuykä Tayta Dios munashqanno kushish kawayänaykipaq y jukniki juknikipis juk shonqula kuyanakur kawayänaykipaqmi. Saynöpis manakuykä Tayta Diospa wilakuyninta shumaq tantiyakuyänaykipaqmi. Saynöpami runakuna mana musyash kayaptinpis tantiyansi Jesucristo kayninpa salvamashqansita.
[3] Jesucristumi tantiyasimansi Tayta Diospa wilakuynin imano kashqanta y pay munashqanno kawanansipaq kashqantapis.
[4] Sayno nikä pipis ali shimilanpa parlapäshushpayki lutanta mana criyisiyäshunaykipaqmi.
[5] Karucho karpis qamkunapaq imaypis yarparaykämi. Tayta Dios munashqanno kawayashqaykita y Jesucristuman imaypis yärakuyashqaykita musyarmi kushikü.
[6] Señor Jesucristuta chaskikushna kaykarqa pay munashqanno imaypis kawayay.
[7] Shumaq jaqwäkush jacha mana lukikashqanno y shumaq cimientush wayi mana juchushqanno paycho imaypis kawayay. Yachakuyashqaykinöla Jesucristuman yärakur imaykapitapis Tayta Diosninsita agradëcikuyay.
[8] Cuidä pipis lutanta criyisiyäshushpayki manakaqkunata yachasiyäshunkiman. Lutanta yachasikuqkunaqa manami Jesucristo munashqannösu yachasiyan, sinöqa runakunapa yarpaylanta y Satanás munashlantami yachasiyan.
[9] Jesucristo runa karpis Diosmi kaykan.
[10] Saymi Jesucristucho kaykarqa salvashna kaykansi. Manami angilkunapis ni supaykunapis payman tinkuyansu.
[11] Saynöpis Jesucristucho karmi señalashna kaykansi. Señalash kanansipaqqa manami runakunasu cuerpunsita señalamashkansi, sinöqa Jesucristumi shonqunsita señalamashkansi. Sayno señalamashkansi jusalikuypa munaynincho kashqansipita jorqamashpansimi.
[12] Bautizakurmi Jesucristuwan pampakushno kashkansi. Saynöpis Jesucristuwan kawarimushnöna karmi mushuq kawaytana kawaykansi. Sayno kaykansi munayninwan Jesucristuta kawarisimuq Tayta Diosman yärakurmi.
[13] Shonqunsi manaraq señalash kaptin y jusansipita manaraq perdonash karqa wanushnömi karqansi. Kananmi isanqa jusansipita perdonashna kar Jesucristuwan kawarimushnöna kaykansi.
[14] Saynölami leyninkunata mana cumplir Tayta Diospa jaqan kar castigash kanansipaq karqansi. Kananmi isanqa Jesucristo cruzcho wanuyninpa Tayta Diospa jaqan kansinasu, sinöqa lapan jusansipita perdonashnami kaykansi.
[15] Jesucristo sayno wanurmi Satanástapis supaykunatapis vincish. Contran soldädukunata rey vinciykur runakuna rikanancho watarkur penqaypaq purisiqnömi Satanástawan supaykunata vincir penqayman churash.
[16] Sayno kaykaptinqa lutan yachasikuqkuna jamurpäyäshuptikipis ama cäsupäyaysu. Paykuna kaynömi nikäyan: “Kayta ama mikuyaysu ni upyayaysu”. Saynöpis nikäyan: “Lulu killa fiestata y wakin fiestakunatapis rurashun. Jamay junaqtapis respitashun”.
[17] Sayno niyaptinpis paykuna yachasiyashqankuna lantuyno päsaqla karmi Jesucristo shamushqanyaqla kash.
[18] Sayno kaykaptinqa ama cäsupäyaysu lutan yachasikuqkuna manakaqkunata yachasiyäshuptiki. Paykuna obligakuyan niyashqankunata cumplinansipaq y angilkunataraq adoranansipaqmi. Saykunata yachasiyänanpaq Tayta Dios sueñuynincho revelashqanta nirpis lulakuykäyanmi. Kikinkunapa yarpaylanpita sayno parlarmi pasaypa yachaq tukuyan.
[19] Jesucristo iglesiapa uman kaptinpis say runakunaqa manami cäsukuykäyansu. Moqunsikunata anku ankunsikuna sararashqannömi noqansitapis Jesucristo makincho sararaykämansi paywan juklaylano kanansipaq. Sayno karmi Tayta Dios munashqanno kawayta yachakunsi.
[20] Jesucristuwan wanushna kaykarqa y supaykunapa yachasikuyninkunata mana cäsuykarqa ¿imanirtaq lutan yachasikuqkuna yachasiyäshushqaykita chaskikuykäyanki?
[21] Paykuna niyäshunki: “¡Sayta ama yataysu! ¡Kayta ama mikuysu! ¡Taqayta ama ni yataylapis yataysu!”
[22] Sayno yachasirqa kikinkunapa jamuylanpitami ushakaqkunalapaq yachaykäsiyan.
[23] Yachasiyashqanta cumplirmi runakuna pasaypa nakayan. Say nakaqkuna religiösu kayashqanta yarparmi wakin runakuna niyan say yachasiyashqan ali kashqanta. Sayno niyaptinpis say yachasiyashqanta cumpliqkuna manami jusankunata kachariyta kamäpakuyansu.