[1] Tayta Diospa jutincho y kawaqkunata y wanuqkunata juzgaq [Señor] Jesucristupa jutinchömi qamta nï:
[2] Chaskikuyänan o mana chaskikuyänan kaptinpis Tayta Diospa palabranta imaypis wilakuy. Mana ajayaypa shumaq tantiyasiy, anyapay y shakyäsiy.
[3] Shamuq watakunacho Jesucristupa wilakuyninta manami wiyayta munayanqanasu. Saypa trukanqa lutan yachasikuqkunata ashirmi paykuna yachasiyashlanta chaskikuyta munayanqa.
[4] Manakaqkunalata wiyayta munarmi rasun kaq yachasikuyta chaskikuyanqasu.
[5] Qamqa Tayta Dios munashqanno kawanaykipaq shumaq tantiyakuy. Imano nakarpis payman yärakuy. Wilakuyninta pïmaytapis wilapay. Mana qelanaypa Tayta Diosta sirviy.
[6] Wanuy janächönami kaykan. Sacrificiuman jichashqan vïnu altarcho ushakashqannömi noqapis ushakänäpaqna kaykä.
[7] Ali soldädunömi lapanta cumplishkä. Yalinakuqnömi chänäpaq kaqman chashkä. Yärakushqänölami mana kachaypa imaypis yärakushkä.
[8] Kananqa shuyaraykä ali juzgaq juez Señor Jesucristo kutimunan junaq corönata entregamänanpaq kashqantami. Say coröna kaykan paypa nawpancho jusaynaqta chaskimashqanmi. Manami noqalasu corönata chaskishaq, sinöqa Jesucristuta shuyakuqkuna lapanmi chaskiyanqa.
[9] Timoteo, tinkunansipaq jukla shamuykulay.
[10] Wawqinsi Demasmi kikin munashqanno kawayta munashpan kacharimar Tesalónica markaman aywakush. Crescentita kachashkä Galacia provinciaman, Titutanami Dalmacia markaman.
[11] Lucaslanami noqawan kaykan. Shamurqa Marcusta pushakarkamunki. Payqa Tayta Diospa wilakuyninta wilakuptï alimi yanapämanqa.
[12] Wawqinsi Tíquicutanami Éfesuman kachaykämü.
[13] Troaschömi Carpupa wayincho capötïta kachaykamurqä. Shamurqa capötïtapis librükunatapis apakarkalämunki. Mana qonqaylapa pergamïnükunatapis apakarkalämunki.
[14] Fiërru takaq Alejandrumi pasaypa conträ rikakush. Sayno kashqanpita Señor Jesucristumi juzganqa.
[15] Alejandrupitaqa alcäbu qampis kakunki. Wilakushqansi lutan kashqantami pitapis nikan.
[16] Autoridäkunapa nawpancho puntata declarar sapakuptï manami pipis favornï sharkushsu. Lapanmi japaläta kachariykayämash. Sayno rurayämashqanpita Tayta Dios perdonaykuläsun.
[17] Paykuna kachariyämaptinpis Tayta Diosqa noqawan karmi shakyäsimash. Saymi mana Israel autoridäkunapa nawpanchöpis ali wilakuyninta wilakunäpaq yanapämash. Wanusiyämänanpaq kaykaptinpis leonpa shiminpitanöpis Tayta Diosmi salvamash.
[18] Saynölami lapan mana alikunapitapis salvamanqa. Nirkurmi mandaykashqancho imayyaqpis kawanäpaq pushakamanqa. ¡Tayta Dios imaypis alabash kaykuläsun! Amén.
[19] Salüdüta qoykulanki Priscilatawan Aquilata. Onesíforupa aylluntapis salüdüta qoykulanki.
[20] Corintuchömi Erasto quëdakamush. Trófimutanami Miletucho qeshyaykaqta kachaykamurqä.
[21] Tamya killa manaraq chämushqanyaq imaykatapis kachaykur shamunki. Eubulo, Pudente, Lino, Claudia y wakin wawqi panikunapis salüduntami apasikayämun.
[22] Señor Jesucristo imachöpis yanapaykuläshunki. Saycho kaqkunata lapaykita kuyapaykuyäläshunki. [Amén.]