[1] Timoteo, shumaq tantiyakuy ultimu tiempucho runakuna aläpa nakayänanpaq kashqanta.
[2] Saymi kayanqa kikilanpaq imatapis munaq, qellaylapaq wachakash, runa tukuq, Tayta Diospa contran parlaq, mamanta y taytanta mana wiyakuq, mana agradëcikuq y Tayta Diospa palabranta manakaqman churaq.
[3] Manami kuyakuynin ni kuyapäkuyninpis kanqasu. Saynöpis kayanqa tumpakuq, mana tantiyakuypa imatapis lutala ruraq, runa mayinta chikiq y ali ruraqkunapa contran sharkuq.
[4] Saynöpis kayanqa traicionëru, mana yarpachakuypa imatapis ruraq y selläma yachaq tukuq. Tayta Dios munashqanta rurayänanpa trukanqa shonqun munashlantami rurayanqa.
[5] Runakuna rikayänalanpaqmi Tayta Diosman yärakuq tukuyanqa. Sayno karpis jusalikurmi kawakuyanqa. Sayno kawaq runakunawan ama shuntakaysu.
[6] Say runakunaqa imaykaläya jusakunata jusalikuq warmikunapa wayinkunamanpis engañayänanpaqmi yaykuyan.
[7] Say warmikuna cadala yachakurpis Jesucristupa wilakuynintaqa manami imaypis tantiyakuyansu.
[8] Janeswan Jambres Moiséspa contran sharkuyashqannömi lutan yachasikuqkunapis Jesucristupa wilakuyninta wilakuqkunapa contran sharkuyan. Lutan yarpaykuna umankunacho kaptinmi Jesucristupa wilakuyninta imaypis tantiyayansu.
[9] Imano yachasiyaptinpis lutan yachasikuq kayashqanta wawqi panikuna tantiyakuyanqami. Saymi Janestawan Jambresta mana cäsupäyashqanno say lutan yachasikuqkunatapis cäsupäyanqanasu.
[10] Qammi isanqa yachasishqäkunata shumaq chaskikushkanki. Kawashqänömi kawaykanki, yarpashqänömi yarpanki, criyishqänömi criyinki, nakarpis awantakushqänömi awantanki, kuyakuq kashqänömi kuyakuq kanki, nakasimaptinpis pacienciakushqänömi pacienciakunki.
[11] Musyankimi Antioquíacho, Iconiucho y Listracho runakuna chikimar qatikachäyämashqanta. Sayno chikiyämaptinpis paykunapa makinpita Señor Jesucristumi salvamash.
[12] Saynölami Jesucristo munashqanno kawaq kaqtaqa pitapis chikir nakasiyanqa.
[13] Yaqa runakuna y engañakuqkunaqa waran waran masmi pantakäyanqa. Wakin runakunata engañayashqannömi kikinkunatapis engañayanqa.
[14] Qam isanqa Tayta Diospa wilakuynin ali kashqanta tantiyakur yachakushqaykinöla shumaq kaway. Yachasishuqnikikuna pï kayashqantapis musyankimi.
[15] Saynöpis musyankimi wamra kashqaykipita pasa Tayta Diospa palabranta yachasiyäshushqaykita. Diospa palabranmi tantiyasishushkanki Jesucristuman yärakur salvakunaykipaq kashqanta.
[16] Tayta Diospa palabrancho lapan qelqaraykaqkunaqa Tayta Diospa yarpayninkunami kaykan. Saymi ali kaykan yachasinansipaq, tantiyasinansipaq, corriginansipaq y Tayta Dios munashqanno kawanansipaqpis.
[17] Tayta Diospa palabranta yachakurmi Tayta Diosman yärakuqkuna imaypis kamarikush kaykäyanqa ali kaqkunata rurayänanpaq.