[1] Noqa Pablo, Tayta Diospa sirviqnin y Jesucristupa apostolnin karmi, Tayta Dios akrashqan kaqkunata wilakuyninta yachaykäsï Jesucristuman yärakur pay munashqanno kawayänanpaq.
[2] Tayta Dios kay pasata manaraq kamar promitishqannölami pay akrashqan kaqkuna gloriacho imayyaqpis kawayanqa. Tayta Diosqa manami lulakunsu, sinöqa promitishqanta imaypis cumplinmi.
[3] Tiempu chämuptinnami wilakuyninta wilakuqkunawan salvamaqninsi Tayta Dios promitishqanta cumpliykan. Sayno cumplirmi noqatapis wilakunäpaq churamash.
[4] Tito, noqa yärakushqäno Jesucristuman yärakurmi kuyay surïno kaykanki. Papäninsi Tayta Dios y salvamaqninsi Jesucristo kuyapäshushpayki ali kawanaykipaq yanapaykuläshunki.
[5] Creta islapita shakamur qamta nirqä arreglaypaq kaqkunata arreglanaykipaq y markan markan aywar wawqi panikuna shuntakäyashqancho mayor wawqikunata churanaykipaqmi.
[6] Mayor wawqi kananpaqqa pïmaypitapis ali rikash kayanman. Saynöpis juk warmiyuqla kayanman. Surinkunapis Tayta Diosman yärakur alilata ruraq y mamantawan taytanta cäsukuq kayanman.
[7] Tayta Diosta sirviq kaykarqa y wawqi panikunata rikaq kaykarqa mayor wawqikuna kayäsun pïmaypitapis mana jamurash, mana runa tukuq, mana ajayshïtu, mana upyaq, mana pelyaq y imatapis mana chaskipakuq.
[8] Saypa trukanqa kayäsun posädasikuq, alilata ruraq, ali yarpayyuq, Tayta Dios munashqanno kawaq y tantiyakuykur imatapis ruraq.
[9] Jesucristupa wilakuyninta yachakuyashqannöla ali yachasiq kayäsun. Saynöpami Tayta Dios munashqanno kawayänanpaq wawqi panikunata shakyäsiyanqa y lutan yachasikuqkunatapis lutanta mana yachasiyänanpaq shumaq tantiyasiyanqa.
[10] Askaqmi lutan yachasikuqkuna puriykäyan wawqi panikunata engañayashpan. Paykuna mana tantiyakurmi Israel runakunano cuerpunta señalakuyänanpaq yachaykäsiyan.
[11] Wakin wawqi panikunata maynami lapan castantinta sayno engañayash. Paykuna lutanta yachaykäsiyan imatapis sakyayänan raykulami. Sayno lutanta yachasiyänanta ama kachapaysu.
[12] Juk Creta runami kayno qelqarqan: “Creta runakunaqa lulami, fiyu uywa japuymi, aläpa mikuqmi y qelami kaykäyan”.
[13] Rasun kaqtami say runa qelqarqan. Saymi lutan yachasikuqkunata olqutupaypa tantiyasinki Tayta Dios munashqanno kawayänanpaq.
[14] Saynöpis tantiyasinki Israel runakuna lutan yachasiyashqanta mana chaskipäyänanpaq. Lutanta yachasikuqkunaqa Tayta Diospa palabranta mana cäsukurmi kikinkunapa yarpaylanpita yachaykäsiyan.
[15] Lutanta yarpaq y mana cäsukuq karmi imapis mana ali kashqanta yarpäyan. Jesucristupa wilakuyninta chaskikuqkunami isanqa tantiyakuyan Tayta Dios kamashqankuna lapanpis ali kashqanta.
[16] Say lutan yachasikuqkuna nikäyan: “Noqakunaqa Tayta Dios munashqannömi kawaykäyä”. Sayno niyaptinpis lutankunata rurar kawayashqanta rikarmi runakuna tantiyayan Tayta Diosta mana cäsukuykäyashqanta. Paykunaqa Diosta mana cäsukur runa mayinta chikiyashpanmi imatapis alitaqa rurayansu.