[1] Timoteo, kuyay surïno kaptikimi qamta nï: Jesucristo yanapaykäshuptikiqa mana ajayaypa pay munashqanno kaway.
[2] Runakunapa nawpancho yachasishqäta yärakuypaq kaq wawqikunata yachasiy paykunapis wakinta yachasiyänanpaq.
[3] Jesucristupa ali soldädun kaykarqa imano nakarpis pay munashqanno kaway.
[4] Manami pï soldädupis soldädu kaykashqanta kachariykur juk rurayman aywakunsu. Saypa trukanqa mandaqnin nishqantami ruran.
[5] Saynölami yalinakuypa cörriqkunapis premiuta chaskiyänanpaq reglamentu nishqanno cörriyan. Sayno mana cörrirqa manami ima premiutapis chaskiyansu.
[6] Chakra muruq runapis murushqan mikuy wayuptin puntatami yawan.
[7] Kay nishqäkunata shumaq yarpachakuptikiqa Señor Jesucristumi yanapäshunki shumaq tantiyakunaykipaq.
[8] Timoteo, rey Davidpa ayllunpita Jesucristo yurishqanta y wanurkurpis kawarimushqanta mana qonqaypa wilakuy. Saytami noqapis wilakuykä.
[9] Sayta wilakushqäpitami fiyupa nakaykä. Kananpis imayka wanusikuq japuymi carcilcho wichqaraykä. Wichqaraptïpis Jesucristupa wilakuynintaqa imapis manami sapansu.
[10] Saymi imano nakarpis mana ajayaypa Jesucristupa wilakuyninta wilakuykä. Saynöpami akrashqan kaqkuna Jesucristuta chaskikuyaptin Tayta Dios salvanqa gloriacho imayyaqpis kawayänanpaq.
[11] Kay wilakuyqa rasun kaqmi kaykan: Jesucristuwan wanushna kaykarqa paywanmi kawashun.
[12] Nakayta awantarqa paywanmi mandashun. Ñëgashqaqa paypis ñëgamäshunmi.
[13] Promitishqansita mana cumplishqapis payqa cumplinmi. Payqa promitishqanta manami imaypis upa tukunsu.
[14] Kay nishqäkunata wawqi panikunata imaypis yarpäsiy. Tayta Diospa jutincho tantiyasiy manakaq yachasikuykunata mana chaskipäyänanpaq. Saykunata chaskiparqa manami Tayta Dios munashqannösu kawayan. Saynöpis wawqi panikunata pasaypami jaqayäsiyan.
[15] Tayta Diospa shonqunpaqno wilakuyninta shumaq yachasiy. Ali yachasirqa ali arupakuq mana penqakushqannömi qampis penqakunkisu.
[16] Lutan yachasikuqkunawan ama rimanakuysu. Paykunawan rimanakuptikiqa wawqi panikunapa shonqun waranlan waranlanmi chukruyanqa.
[17] Lutan yachasikuyqa imayka cáncer qeshyanömi maysaymanpis chaykan. Himeneuwan Filetumi lutankunata yachasir puriykäyan.
[18] Paykuna nikäyan mayna kawarimushnöna kaykar wanurqa manana kawarimunansipaq kashqantami. Sayno yachasir pantakäsiyaptinmi wakin wawqi panikuna Jesucristuman yärakuyannasu.
[19] Wakinkuna mana yärakuyaptinpis Tayta Dios akrashqan kaqkunaqa ali cimientush wayinömi kaykäyan. Saymi Diospa palabrancho kayno qelqaraykan: “Payman yärakuqkunataqa Tayta Dios reqinmi”. Saynöpis kaynömi nikan: “Tayta Diosman yärakuqkunaqa amana jusalikuyäsunnasu”.
[20] Rïcu runapa wayincho manami qorilapitasu ni qellaylapitasu plätukuna kaykan, sinöqa kaykanmi qerupitapis mitupitapis. Qoripita qellaypita kaq plätukunaqa manami luta manijanansipaqsu kaykan. Qerupita mitupita kaqkunami isanqa waran waran manijanansipaq kaykan.
[21] Pipis qori plätuno kananpaqqa mana jusalikuypa kawasun y lutan yachasikuytapis ama chaskisunsu. Saynöpami qoripita rurash manëjuta rïcu runa utilizashqanno paytapis alita rurananpaq Tayta Dios utilizanqa.
[22] Wakin maqtakuna lutanta rurayaptinpis qamqa ama ruraysu. Saypa trukanqa Tayta Dios munashqanno kaway, payman yärakuy, pïmaytapis kuyay y lapan runakunawanpis ali kaway. Saynöpis Señor Jesucristuta alabar Tayta Dios munashqanno kawaqkunawan imaypis shuntakay.
[23] Lutan yachasikuykunapita wakin runakuna rimanakuyaptinpis sayman ama jatikaysu. Sayno rimanakurqa jaqayäsinakuyanmi.
[24] Señor Jesucristupa sirviqnin kaykarqa piwanpis mana rimanakuylapa kaway. Saynöpis lapan runakunawan ali kaway, shumaq yachasiy y pacienciaykipis kasun.
[25] Contrayki sharkuqkunata ali shimilaykipa tantiyasiy. Sayno tantiyasiptiki capazchir Tayta Dios tantiyasinqa jusalikushqanta wanakur pay munashqannöna kawayänanpaq.
[26] Sayno kawarqa diablupa makincho kaykäyashqanpita yarqur Tayta Diospa makinchönami kawayanqa.