<2 Tesalonicenses - Tesalónica markacho taq yärakuq mayinkunaman apóstol Pablo qepa kaq cartata cartakushqan 2

[1] Wawqi panikuna, Señor Jesucristo kutimur shuntakamänansipaq kashqanta shumaq tantiyakuyänaykitami munayä.

[2] Ama cäsupäyaysu “Jesucristo kutimunanpaq kaq tiempu chämushnami” nir pipis yachasiyäshuptiki. Saynöpis ama criyiyaysu “Espíritu Santumi revelamash” nir yachasiyäshuptiki. Saynöpis ama criyiyaysu “kikin Pablumi nish” y “Pablo apasimushqan cartachöpis saynölami nikan” nir yachasiyäshuptikipis.

[3] Imata niyäshuptikipis ama chaskipäyaysu. Jesucristo kutimunanpaqqa puntata aska runakunami Tayta Diospa contran sharkuyanqa. Saynöpis anticristuraqmi yurimunqa. Paytami Tayta Dios infiernuman qaykunqa.

[4] Anticristo shamur manami munanqasu Tayta Diosta ni imatapis runakuna adorayänanta, saypa trukanqa kikilantana adorayänantami munanqa. Saynöpis payta adorayänanpaqmi Dios tukushpan Tayta Diospa templunman yaykur jamanqa.

[5] ¿Manaku yarpäyanki sayno kananpaq kashqanta mayna wilashqäta?

[6] Kanan qamkuna musyayankimi anticristo yurimunanta ima saparaykashqantapis. Sayno saparanqa tiempun chämushqanyaqmi.

[7] Manaraq shamuptinpis Satanásqa maynami runakunata mana tantiyakayla engañaykan Tayta Diosta mana cäsukuyänanpaq. Saparaykashqanta Tayta Dios jorquriptinnami anticristo yurimunqa.

[8] Paytami Señor Jesucristo chipipiykar kutimur juk pükayla ushakärasinqa.

[9] Jesucristo manaraq kutimuptinmi Satanáspa munayninwan anticristo tukuy niraq milagrukunata ruranqa.

[10] Saynöpami infiernuman qaykush kayänanpaq destinash kaqkunata engañanqa. Paykunaqa Jesucristupa wilakuyninta mana chaskikurmi salvakuyanqasu.

[11] Mana chaskikuyashqanpitami Tayta Dios paykunata pantakäsinqa anticristuta chaskikuyänanpaq.

[12] Saynöpami Tayta Diosta mana cäsukur jusalikuqkuna lapanpis infiernucho nakayanqa.

[13] Wawqi panikuna, qamkunataqa Tayta Diosmi kuyayäshushpayki qalaykunanpita akrayäshushkanki salvayäshunaykipaq. Kananqa Jesucristupa wilakuyninta chaskikur payman yärakuyaptiki y Diospa makincho kawayänaykipaq Espíritu Santu yanapäyäshuptikimi salvakuyashkanki. Saypitami Tayta Diosta imaypis agradëcikuyä.

[14] Salvash kayänaykipaqmi paypa ali wilakuyninta wilapaptï qayayäshushkanki. Saymi Señor Jesucristo chipipiykar kutimur pushakuyäshuptiki qamkunapis paypa nawpancho kushish kawayanki.

[15] Wawqi panikuna, sayno kananpaq kaykaptinqa Tayta Diosman shumaq yärakur ama qonqäyaysu cartapapis y shimilapapis yäsiyashqäkunata.

[16] Señor Jesucristo y kuyamaqninsi, shakyäsimaqninsi y nawpanman pushamaqninsi Papäninsi Tayta Dios

[17] yanapaykuyäläshunki mana lakikuyänaykipaq, pïmaytapis ali shimilaykipa parlapäyänaykipaq y ali kaqkunata rurayänaykipaqpis.